Surasak Suwanmake/Moment via Getty Images
BA GIMA!
Laḡani 2023 ai Tanobada Heḡeḡemadai ai Siahu Na be Bada Hereamu—Baibul be Dahaka E Gwaumu?
Tanobada heḡeḡemadai ai ḡau idauidau e varamu bona disasta daidiai siahu na bada herea. Mani ripoti haida aita ita:
“June ai tanobada heḡeḡemadai ai siahu na bada herea, una na laḡani 174 gunadia e abia rekodina e hereaia.”—National Oceanic and Atmospheric Administration, U.S. Department of Commerce, July 13, 2023.
“Italy, Spain, France, Germany bona Poland ena motumotu haida, heḡereḡere Sicily bona Sardinia ai siahu ena bada na 48°C, Europe ai una siahu ese rekodi gunadia e hereadia.”—European Space Agency, July 13, 2023.
“Tanobada ai siahu na e bada hereamu dainai, gabu momo ai medu bada herea be dihomu, bona una ese abata bada be havaraiamu.”—Stefan Uhlenbrook, director of hydrology, water and cryosphere at the World Meteorological Organization, July 17, 2023.
Ripoti unu bamodia dainai o lalohekwarahimu, a? Mani Baibul ese una topik e herevalaia dalana aita itaia.
Weda e idaumu karana ese Baibul ena peroveta herevana e haḡuḡuruamu, a?
Oibe. Baibul ese eda nega na vada e perovetalaia, tanobada heḡeḡemadai ai siahu bada herea, bona weda e idaumu karana ese una e hamomokaniamu. Heḡereḡere, Iesu na e peroveta eto, ita ese “hahegari ḡaudia” baita itamu. (Luka 21:11) Siahu e bada hereamu dainai taunimanima na e laloamu tanobada ai ta basine nohomu.
Tanobada be ta ese basine noholaiamu, a?
Lasi. Dirava ese tanobada e karaia na taunimanima ese bae noholaia, bona ta ese basine hadikaia diba. (Salamo 115:16; Kohelete 1:4) Danu, e gwauhamata “tanobada ihadikana taudia” hari baine haoredia.—Apokalupo 11:18.
Baibul ese e hahedinaraiamu Dirava ese tanobada na disasta idauidau amo baine gimaia diba.
Dirava ese “lai gubana e gwaua tao, bena e vea, bona davara hurehurena e gaima.” (Salamo 107:29) Dirava na mai ena siahu lai gubana bona unu bamona ḡaudia baine koudia, bona weda ese dika bada e havaramu hekwakwanaidia danu baine haoredia diba.
“Tanobada o vadivadi heniamu, o haparipariamu, uma tanodia o hanamodiamu.” (Salamo 65:9) Dirava ese tanobada be hanamoamu bona paradaiso ai be laomu.
Baibul ena gwauhamata, tanobada na be namo loumu, herevana ai diba ma haida bavabi totona, atikol ladana “Who Will Save the Earth?” ba itaia.
You May Also Like
ABOUT US
Ta Ba Noia Oi Bae Vadivadimu
Baibul ese e haerelaimu henanadaina ta ba herevalaia, eiava Iehova ena Witnes ediai diba ma haida bavabi.
