Monday, October 10, 2022, daba ai, Russia ese Ukraine ena siti haida e bomudia, badina dina rua gunanai Ukraine ese Crimea bona Russia padadiai e miava bridge na e bomua. Politik taudia na e gwa reana Aramagedono na kahirakahira be varamu, bena dia daudau unu ḡau e vara.

•   “[U.S. President John F.] Kennedy e gini neganai Cuban Missile Crisis e vara, una negana amo ema bona hari Aramagedono na se vara. . . . Na laloamu nuclear tuari kohudia basita ḡaukaralaidiamu neganai, Aramagedono na basine vara.”​—U.S. President Joe Biden, October 6, 2022.

•   October 8, 2022 ai BBC Nius ese Ukraine President Volodymyr Zelensky e nanadaia nuclear tuari kohudia ba heḡaukaralai ena dika be dahaka, bena ia na e gwa, “Na abia daemu una ese Aramagedono be havaraiamu, bona tanobada ibounai be hadikaiamu.”

 Nuclear tuari kohudia be ḡaukaralaimu neganai, Aramagedono be havaraiamu, a? Baibul be dahaka e gwaumu?

 Lasi. Baibul ai ina hereva “Aramagedono” na nega tamona mo Apokalupo 16:16 ai e hedinarai. Ia na dia bese ta ta huadiai be varamu tuarina, to Dirava bona “tanobada idoinai hanua hanua pavapavadia” huadiai be varamu tuarina. (Apokalupo 16:14) Dirava ese Aramagedono tuarina be ḡaukaralaiamu tanobada lohiadia baine haoredia.​—Daniel 2:44.

 Aramagedono be varamu neganai tanobada be ede bamona, diba ma haida bavabi totona ina atikol ba duahia, What Is the Battle of Armageddon?

 Lasi. Ena be vaira negai lohia taudia na nuclear tuari kohudia be ḡaukaralaimu, to Dirava ese dala na basine kehoa idia ese tanobada bae hadikaia totona. Baibul na e gwaumu:

•   “Tanobada na e mia hanaihanaimu.”​—Kohelete 1:4.

•   “Kara maoromaoro taudia ese tano bae abia, bae noholaia hanaihanai.”​—Salamo 37:29.

 To, Baibul ena peroveta herevadia bona e varamu ḡaudia ese e hahedinaraimu kahirakahira tanobada ai ḡau badadia haida be varamu. (Mataio 24:3-7; 2 Timoteo 3:1-5) Baibul ese vaira negai be varamu ḡaudia ba diba totona, ai ese Baibul kosi asi davana a karaiamu.