May 23, 2023 ai, United States ena helt dipatmen ena dagi bada tauna ta na e gwa, Social Media ese matamata taudia momo edia mauri e hadikaiamu.

•   “Reana natu maraḡidia bona matamata taudia haida ediai Social Media na mai ena namo, to nega momo dika bada e havaraiamu heḡereḡere, mentol helt gorerena e abiamu bona tauanidia e dikamu.”​—Social Media and Youth Mental Health: The U.S. Surgeon General’s Advisory, 2023.

 Hetahu ḡaukarana ta ese e hahedinaraia ina na hekwakwanai ta, bona baita laloa namonamo na namo.

•   Memero kekeni haida edia mauri laḡani na 12 ela 15 huanai ese “hora toi mai kahana na social media ai e haoreamu, una dainai idia momo ese lalohekwarahi gorerena eiava depression e abimu.”

•   Mauri laḡani 14 memero kekeni ese edia nega bada na social media ai e haoreamu dainai asie mahuta namonamomu, online ai e hagaridiamu, tauanidia e dikamu, e hemamimu ta ese se ura henidiamu, bona e lalohekwarahimu. Kekeni ediai una na e vara momomu.”

 Ededia dala ai tama sina ese natudia bae gimadia? Mani Baibul ena sisiba namodia haida aita ita.

 Natumui e karamu ḡaudia ba diba. Tama sina e, social media iḡaukaralaina ena namo bona dika ba dibadia guna, bena gabeai abi hidi ba kara bema natumu ese social media baine ḡaukaralaia eiava lasi.

•   Baibul ena hahekau herevana: “Meromero bema rakalaia dalana na ba hadibalaia.”​—Hereva Lada-isidia 22:6.

•   Diba ma haida bavabi totona, atikol ladana “Should My Child Use Social Media?” ba duahia.

 Bema natumu na gwau maoro o henia social media baine ḡaukaralaia, namona na natumu ese online ai e itamu eiava e karamu ḡaudia ba dibadia. Edena dala ai?

 Natumu na ḡau dikadia amo ba gimadia. Natumu ba durua ḡau dikadia edia idau baine diba bona baine dadarai.

•   Baibul ena hahekau herevana: “Heuda-hanai bona mata-dika bona mata-ḡaniḡani na bogaragimui ai basio herevalai.  . . Lebulebu, kavakava, hevaseha herevadia danu dia nanamo.”​—Efeso 5:3, 4.

•   Hahekau herevadia ba diba totona, atikol ladana “Teaching Your Teenager Social Media Safety” ba duahia.

 Taravatu bavato. Heḡereḡere edena negai, bona hora hida lalodiai natumu ese social media baine ḡaukaralaia diba.

•   Baibul ena hahekau herevana: “Emui raka nahuana ba tohoa; aonega taudia heḡereḡeredia ai ba raka, . . . e henimui negana ba ḡaukaralaia namonamo.”​—Efeso 5:15, 16.

•   Whiteboard animation Intanet Ba Ḡaukaralaia Namonamo ba ḡaukaralaia unu amo natumu ese social media iḡaukaralaina ai taravatu o atomu badina baine lalopararalaia.