1 Sisiga 14:1-17
14 Hirama, Turo pavapavana, ese gwaukau taudia na David dekena e siaidia; bona sida audia, bona nadi iḡaukaralaidia taudia, bona kamuta taudia, iena ruma auta bae haginia totona.
2 Bena David lalona e parara, Iehova ese ia vada e haginia, Israel pavapavana, bona ena basileia danu vada e hadaea herea, ena orea taudia Israel bagudiai.
David natuna haida e vara Ierusalem ai
3 David ese hahine haida ma e adavadia Ierusalem ai, bona natuna mamaruanedia bona natuna hahinedia haida e havaradia.
4 Natuna Ierusalem ai e havaradia taudia ladadia bini: Samua, Sobab, Natan, Solomon,
5 Ibihara, Elisua, Elpelete,
6 Noga, Nefeg, Iafia,
7 Elisama, Beliada, Elifelete.
David ese Filistia taudia e hadareredia
8 Filistia taudia na e kamonai David vada e horoa, Israel idoinai pavapavana; bena Filistia taudia iboudiai na David itahuna e dae ela. David e kamonai, bena e raka lasi, baine tuari henidia.
9 Filistia taudia na vada ema, Refaim kourana taudia tuari e lasi henidia.
10 Bena David ese Dirava e nanadaia, eto, Bainala, Filistia taudia baina tuari henidia a? Imagu ai bavatodia eiava? Iehova ese e hamaoroa, eto, Aola, lau ese oi imamu ai baina atodia.
11 Bena ia na Baal-perasimi ela; unuseni ai David ese e hadareredia. David eto, Dirava ese inaigu na lau imagu amo vada e haheḡiḡidia dobi, abata ese ḡau ta bema ḡiḡia dobi na heto. Una dainai una gabu ladana e hatoamu Baal-perasimi.*
12 Edia kaivakuku diravadia na unuseni ai e rakatanidia; bena David na e haheḡani, bena e doudia.
13 Filistia taudia ese koura taudia tuari ma e lasi henidia.
14 Bena David ese Dirava ma e nanadaia lou negana ai, Dirava ese e hamaoroa, eto, Basio ḡavadia; ba raka heḡeḡe, baka* audia italaidia amo ba mai henidia.
15 Bena reḡe ta baka audia doridia ai ba kamonai, e kara tuari taudia e raka hanaimu na heheto, vada ba raka lasi, ba tuari henidia; badina be Dirava vada e raka lasi guna oi vairamu ai, Filistia edia tuari taudia irahu-masedia totona.
16 Bena David ese Dirava ena haheḡani heḡereḡerena e karaia; bena Filistia taudia e rahudia mase, Gibeon amo ela bona Gesere.
17 Bena David harina na tano iboudiai e piua rohoroho, bona Iehova ese ia garina igari-henina e havaraia, bese iboudiai ediai.
Footnotes
^ “Baal-perasimi” anina be “ḡau ihaheḡiḡi-dobidia lohiana”.
^ “Baka” be au ta ladana Heberu gado ai.
