1 Hanua Pavapavadia 6:1-38
6 Israel taudia na Aigupto tanona amo e raka lasi murinai laḡani sinahu-hani taurahani-ahui vada ela, Solomon ese Israel e lohiaia laḡanina ihahanina ai, hua iharuana, ladana Sivi, lalonai, ia ese Iehova ena dubu e haginia matama.
2 Iehova ena dubu King Solomon ese e haginia ḡauna ena lata na kiubit tauratoi-ahui, ena lababa na kiubit* ruahui, bona harana latana na kiubit toi-ahui.
3 Dubu vairanai na dehe ta; ena lata na kiubit ruahui, dubu lababana heḡereḡerena, bona ena lababa na kiubit gwauta, dubu vairanai.
4 Dubu ena gaba-mauru ioradia na au rotonadia amo e kara.
5 Bena hagere-kau rumana e haginia heḡeḡe, dubu mai ena gabu helaḡana ida habadia e koudia heḡeḡe, mai ohena daiutudia e heḡeḡe dae.
6 Henu erena lababana na kiubit ima, bogaragi erena lababana na kiubit tauratoi, ma ere ihatoina lababana na kiubit hitu; badina be dubu habadia ai to-tao ḡaudia e kara, ruma lavadia na dubu habana lalonai basie hetoi vareai helaoreana.
7 Dubu e haginia negana ai, idia ese nadi-ḡei gabuna ai e utu heḡaeḡae nadidia amo e haginia; taunabunai, lavu eiava ira eiava auri ta reḡena na dubu lalonai asie kamonai, e haginia negana lalonai.
8 Hari henu erena raka-vareaina na dubu tahodiho kahana ai; unu amo vadavada ta e dae lao ela bona bogaragi erena; ma unu amo vadavada ta ma e dae lao ela bona ere ihatoina.
9 Taunabunai, ia ese dubu e haginia ela bona e ore; bena guhi lalo-ikouna na sida lavadia bona sida reireidia amo e karaia.
10 Hari hagere-kau rumana e haginia, dubu idoinai e hagerea kau; ere-ta ta haradia na kiubit ima ima amo. Ruma na dubu habana ai e siriua kau, sida audia amo.
11 Iehova ena hereva na Solomon enai e kau, eto,
12 Ina o haginiamu dubuna herevana binai: egu taravatu daladia ai boma raka, bona egu hahemaoro herevadia bona egu haheḡani iboudiai boma badinadia bona boma rakalaidia, lau ese egu hereva, tamamu David na herevalai henia herevana, na oiemu ai baina haginia;
13 bona Israel garana bogaragidiai baina noho, bona egu bese Israel basina rakatania.
14 Taunabunai, Solomon ese dubu e haginia ela bona vada e ore.
15 Haba lalo-ikoudia na sida audia amo e kara, dubu reireina amo ela bona guhi lalo-ikouna toidaedia, bona dubu lalona reireidia na beroso audia amo e koudia.
16 Dubu murina kahana ai kiubit ruahui heḡereḡeredia na sida audia amo e koua ahu, dubu reireina ela bona toidae, helaḡa daiutuna ta dubu lalonai unu e karaia toma; una na helaḡa herea gabuna.
17 Hari helaḡa daiutuna vairanai dubu ena lata na kiubit hari-ahui.
18 Dubu lalonai sida audia na e korodia, ita-itadia na ahu bona au buredia na heheto. Nadi ta se hedinarai; iboudiai na sida audia ese e ḡovadia.
19 Hari helaḡa daiutuna na dubu laloma kahana ai e karaia, Iehova ena taravatu mauana na unuseni ai bae atoa helaoreana.
20 Hari helaḡa daiutuna ena lata na kiubit ruahui, lababana danu kiubit ruahui, bona harana latana danu kiubit ruahui; gold ḡoevaḡoevana amo e ḡovaia. Ihaboulaina patana danu sida audia amo e karaia.
21 Solomon ese dubu laloma kahana na gold ḡoevaḡoevana amo e ḡovaia, bona gold varodia amo helaḡa daiutuna e seroa ahu; ma gold amo e ḡovaia.
22 Dubu idoinai na gold amo e ḡovaia ela bona idoinai vada e ore. Ihaboulaina patana, helaḡa daiutuna lalonai, danu idoinai gold amo e ḡovaia.
23 Helaḡa daiutuna lalonai ia ese kerubi rua olive audia amo e korodia; edia lata na kiubit gwauta.
24 Kerubi ta hanina kahana kahana edia lata na kiubit ima ima amo: hani ta matana amo ela bona ma hani ta matana padadia na kiubit gwauta.
25 Kerubi iharuana danu ihahetohona na kiubit gwauta; kerubi ruaosi ihahetohodia na heḡereḡere bona oromadia na heḡereḡere.
26 Kerubi ta ena lata na kiubit gwauta: iharuana danu unuheto.
27 Kerubi ruaosi na helaḡa daiutuna ai e atodia; hanidia na e hetoi roro, bena kerubi ta hanina ta na haba ta ai e hetomu kau, ma kerubi ta hanina ta na haba kahana ai ma e hetomu kau; a hanidia iharuadia na dubu bogaraginai e hetomu heheni.
28 Hari kerubi na gold amo e ḡovadia.
29 Dubu habadia danu iboudiai e korodia heḡeḡe, ita-itadia na kerubi bona pamu ḡaudia bona au buredia, laloma daiutuna ai bona murimuri daiutuna ai.
30 Dubu reireina danu gold amo e ḡovaia, laloma bona murimuri daiutudia ai.
31 Helaḡa daiutuna raka-vareai iduaradia na olive audia amo e kara; iduara bagubagu audia bona iduara ihua-ihuadia kahadia kahadia audia iboudiai na siri ima.
32 Hari olive audia iduaradia ruaosi na ikoro amo e ha-ahudia, kerubi bona pamu audia bona au buredia laulaudia e koro; bena gold amo e ḡovadia.
33 Dubu raka vareai iduaradia ihua-ihuadia kahadia kahadia audia e abi danu, olive audia kaha haniosi heḡereḡere dudia;
34 bona iduara rua beroso audia amo e kara, iduara ta kaha rua e hahelokudia, ma ta kaha rua e hahelokudia.
35 Idia kopidia e koro, kerubi bona pamu audia bona au buredia laulaudia; bona gold amo e ḡovadia ḡoevaḡoeva.
36 Laloma maḡuna danu e haginia, e utu nadidia ere toi bona sida audia badadia ere ta.
37 Laḡani ihahanina ai, hua ladana Sivi lalonai, Iehova ena dubu badina vada e hadaia.
38 Bena laḡani ihagwauta-tana ai, hua ihataurahanina, ladana Bulu, lalonai, dubu tau-anina regena iboudiai vada e ha-oredia. E lalohadailaiva ḡaudia iboudiai heḡereḡerena ai ia ese una dubu na laḡani hitu lalodiai e ha-orea.
Footnotes
^ “Kiubit” na Heberu taudia edia hahetoho ḡauna ta, ena lata be 44 centimetres sisivana.
