1 Korinto 8:1-13
8 Kaivakuku ihaboulaidia vamudia herevadia bini: ita dibada iboudai mai eda lalo-parara; to lalo-parara ese hekokoroku e havaraiamu, a lalokau ese goada e havaraiamu.
2 Tau ta lalona baineto mai ena aonega, ia na aonega korikori do asi dibana;
3 a tau ta ese Dirava baine lalokau henia, Dirava ese ia baine dibaia.
4 Taunabunai, kaivakuku ihaboulaidia vamudia herevadia bini: ita dibada kaivakuku iboudiai tanobada ai na asi anidia; Dirava danu tamona mo.
5 Ena be “dirava” e gwauraidiamu ḡaudia na guba ai bona tanobada ai nonoho, dirava hutuma bona lohia hutuma,
6 to ita na mai eda Dirava tamona, ia na Tamada; ḡau iboudiai na iena amo e varamu, ita danu iena. Ita na mai eda Lohiabada tamona danu, Iesu Keriso bunai, ia dainai ḡau iboudiai e varamu, ita danu ia dainai vada ta vara.
7 Ḡau tamona, taunimanima iboudiai lalodia unu asie parara tomamu. Haida be kaivakuku karadia vada e manadalai ema bona harihari; una dainai lalodia ai e abia daemu e aniamu vamuna na helaḡa ḡauna, bena lalodia e manoka-manokamu dainai e hekwakwanaimu.
8 A aniani basine hanamoda Dirava vairanai; basita ania, basita dika; baita ania, basita namo.
9 To nahuamui ba toho, ina emui siahu na manoka taudia ihahekwakwanaidia ḡauna ai bainela na garina.
10 Badina be tau ta ese oi lalo-parara taumu baine itamu, kaivakuku ena dubu ai o ege dihomu, ia lalo-manoka tauna baineto ia danu kaivakuku ihaboulaina vamuna baine ania ani?
11 Bena lalo-manoka tauna, ena be oi varavaramu, ia dainai Keriso vada e mase, to oiemu lalo-parara dainai ia baine mase.
12 Taunabunai, varavarada o kara dika henidiamu, bona edia lalo-manoka o habadaiamu, unu amo Keriso danu o hadikaiamu.
13 Benaini, vamu ese varavaragu baine hahekwakwanaia, lau ese vamu basina ania ela bona hanaihanai, varavaragu baina hahekwakwanaia na garina.
