2 Sisiga 19:1-11
19 Iehosafat, Iuda pavapavana, na ena ruma e lou henia, Ierusalem ai, mai namona ida.
2 A Iehu Hanani, mata-hanai tauna, na ihedavari-henina totona e raka lasi, bena ia ese King Iehosafat e gwau henia, eto, Kara dika taudia o durudiamu bona Iehova e inai heniamu taudia o ura henidiamu be maoro a? Ina dainai Iehova ena badu na oi latamu ai vada e kau.
3 Ḡau tamona, namo taina lalomu ai e miamu, badina be kaivakuku na tano idoinai o habuadia tari, bona lalomu vada o hadaia Dirava ba tahua oto.
Iehosafat ese hahemaoro taudia e haginidia
4 Iehosafat na Ierusalem ai e nohova. Bena ia na ma e raka lasi, taunimanima bogaragidiai ela, Bere-sieba amo ela bona Efraim ororodia, e harakadia kerehai, Iehova, senedia edia Dirava, enai.
5 Ia ese hahemaoro taudia e haginidia, Iuda hanuadia mai maḡudia iboudiai lalodiai.
6 Unu hahemaoro taudia na ia ese e hamaorodia, eto, Emui kara nahuadia ba toho; badina be emui hahemaoro be dia tau ta ena a Iehova ena; ia na umui ida, hahemaoro ḡaukaradia ai.
7 Benaini, Iehova garina na latamui ai baine mia; emui kara nahuadia ba toho, badina be Iehova, eda Dirava, ese hahemaoro se hagagevaiamu, bona tau ta se matauraiamu, bona hahemaoro ihagagevana davana se abiamu.
8 Ierusalem ai danu Iehosafat ese Levi taudia bona hahelaḡa taudia haida bona Israel iduhudia ikwaradia taudia haida danu e haginidia, Iehova ena hahemaoro karadia bae kara, bona heiri-heiri taudia bae hahemaoro henidia. Edia ḡaukara gabuna be Ierusalem ai.
9 Bena ia ese e haduadia, eto, Ini ba kara toma, Iehova garina ai bona heabidadama ai bona mai lalomui idoidiai ida:
10 tadikakamui edia hanua lalodiai e nohomu na hahemaoro totona dekemui baema, rara ihahebubuna dainai, eiava haheḡani eiava taravatu eiava hahedua herevadia daidiai, negadia iboudiai na ba hadibadia, bena idia na Iehova vairanai basie kerere, bona badu na umui bona tadikakamui latamui ai basine kau. Unu ba kara toma, bena basio kerere.
11 A itaia, biagumui Iehova ena ḡaukara lalodiai na Amaria, hahelaḡa tauna badana; bona biagumui hanua pavapavana ena ḡaukara lalodiai na Sebadia, Ismael natuna, Iuda iduhuna lohiana; a Levi taudia na idurumui taudia ai baela. Ba ḡaukara mai boga-aukamui ida; Iehova na kara maoromaoro taudia ida baine noho.
