2 Hanua Pavapavadia 24:1-20
24 Iena nega ai Nebukadnesara, Babulono pavapavana, na ema; bena Iehoiakim ese ia isiaina e lao heni ela bona laḡani toi e ore; bena e hegiro, e gwau edeede henia.
2 Bena Iehova ese tuari oreadia na Kaldea bona Suria bona Moab bona Amono amo e siaidia, ia bae tuari henia bona Iuda tanona bae habuaia tari totona, Iehova ena hereva, ena hesiai peroveta taudia ududia amo e gwauraia, heḡereḡerena.
3 Momokani, ina na Iehova ena haheḡani dainai Iuda latanai e kau, ia vairana amo bae heabi oho totona, Manase ena kara dika, e kara karadia iboudiai, daidiai,
4 bona asi edia kerere taudia raradia ia ese e hahebubua dainai. Badina be ia ese Ierusalem na asi edia kerere taudia raradia amo e hahonua; bona Iehova ese una kara na se laloa nege.
5 Iehoiakim ena kara oredia, e kara karadia iboudiai, sivaraidia na Iuda Pavapavadia Sisigadia Bukana ai vada e hetore, ani?
6 Taunabunai, Iehoiakim na tubu tama ida e mahuta, bona ia natuna lehoiakini na ia gabuna ai e lohia.
7 Una negana ai Aigupto pavapavana na ena tano amo se raka lasi lou, badina be Babulono pavapavana ese Aigupto pavapavana ena tano, Aigupto sinavaina amo ela bona Eufrate sinavaina, iboudiai vada e abidia.
Iehoiakini, Iuda pavapavana
8 Iehoiakini e lohia matama negana ai, ena mauri laḡanidia na gwauta-taurahani; ia na hua toi hona Ierusalem ai e lohia. Sinana ladana na Nehusuta, Elnatan, Ierusalem tauna, natuna.
9 Ia na Iehova vairanai e kara havara, tamana ena kara iboudiai heḡereḡeredia ma e kara.
Iehoiakini e abia mauri
10 Una negana ai Nebukadnesara, Babulono pavapavana, ena hesiai taudia ese Ierusalem e dae henia, bona hanua e koua heḡeḡe.
11 Bena Nebukadnesara, Babulono pavapavana, ena hesiai taudia ese hanua e koua heḡeḡeva lalonai, ia na hanua ai e kau.
12 Bena Iehoiakini, Iuda pavapavana, na sibona Babulono pavapavana imana ai e heato, ia bona sinana bona ena hesiai taudia, bona ena lohia taudia bona ena ruma itataona taudia. Babulono pavapavana ese e abia mauri, ena lohia laḡanina ihataurahanina ai;
13 bona Iehova ena dubu kohudia iboudiai bona pavapava ena ruma kohudia e laohaidia, bona gold ḡaudia iboudiai Iehova ena dubu ai e miava, Solomon, Israel pavapavana, ese e kara ḡaudia, na e utudia sisi-sisi, Iehova ese vada e gwauraia guna heḡereḡerena.
14 Ierusalem taudia iboudiai na e laohaidia, lohia iboudiai bona tuari taudia mai goadadia iboudiai, iḡui taudia gerebu ta;* bona ima namo taudia bona auri iḡaukaralaina mai dibadia taudia. Tau ta se noho, ogoḡami dikadika taudia mo.
15 Ia ese Iehoiakini na Babulono e laohaia; hanua pavapavana sinana danu, bona adavana hahidaosi, bona ena heitatao taudia bona tano lohiadia, e ḡuidia, Ierusalem amo e laohaidia, ela bona Babulono.
16 Babulono pavapavana ese tuari taudia daha-hitu, bona ima namo taudia bona auri iḡaukaralaina mai dibadia taudia daha-ta, na Babulono e laohaidia; iboudiai na mai goadadia bona tuari mai dibadia.
17 Bena Babulono pavapavana ese Matania, Iehoiakini tamana lahaina, na pavapavana ai e halaoa, ia gabuna ai, bona lada matamatana e henia, e nemaia Sedekia.
Sedekia, Iuda pavapavana
18 Sedekia e lohia matama negana ai, ena mauri laḡanidia na ruahui-ta; ena lohia laḡanidia Ierusalem ai na gwauta-ta. Sinana ladana na Hamutala, Ieremia, tau Libna, natuna.
19 Ia na Iehova vairanai e kara havara, Iehoiakim ena kara iboudiai heḡereḡeredia ma e kara.
20 Iehova ena badu dainai unu kara e vara, Ierusalem ai bona Iuda ai, ela bona negana e kau bena idia na ia vairana amo e negedia daure. Bena Sedekia ese Babulono pavapavana e gwau edeede henia.
Footnotes
^ Gerebu-ta = 10,000.
