2 Hanua Pavapavadia 8:1-29
8 Elisaia ese natuna e hamauria lou hahinena na vada e hamaoroa, eto, A tore isi, emu ruma taudia ida aola, ba noholaia diba gabuna ta ai vada ba noho; badina be Iehova ese doe vada e gwauraia, bena ina tano na baine doe ela bona laḡani hitu.
2 Taunabunai, una hahine na e tore isi, Dirava ena tau ena hereva heḡereḡerena e karaia; ia na ela, ena ruma taudia ida, Filistia taudia edia tano ai e nohova, laḡani hitu.
3 Laḡani hitu e ore ai, hahine na Filistia taudia edia tano amo e lou lao, bena ia na hanua pavapavana dekena ela, baine noia totona; ena ruma bona ena tano iabi-loudia herevadia baine gwaurai.
4 Una negana ai hanua pavapavana na Gehasi, Dirava ena tau ena hesiai tauna, ida e hereva-herevava ai, hanua pavapavana na eto, Elisaia ena kara badadia iboudiai sivaraidia ba hamaorolaigu.
5 Hari tau ese hanua pavapavana na Elisaia mase merona e hamauria sivaraina e hamaorolaiava lalonai, hari natuna e hamauria lou hahinena ese hanua pavapavana e noia, ena ruma bona ena tano herevadia e gwaurai. Bena Gehasi eto, Pavapava e, egu lohia, hari hahinena binai, bona natuna danu, Elisaia ese e hamauria lou merona.
6 Hanua pavapavana ese hahine na e nanadaia, bena ia ese sivarai ma e gwauraia. Taunabunai, hanua pavapavana ese ena ḡaukara itataona tauna ta e haḡania, eto, Ena ḡau iboudiai ba henia lou, bona uma anidia iboudiai danu, e raka oho dinana amo ema bona hari.
Hasaele ese Suria e lohiaia matama
7 Elisaia na Damasko ai e kau. Una negana ai Ben-hadad, Suria pavapavana, na e gorerea. Bena haida ese e hamaoroa, eto, Dirava ena tau vada ema.
8 Bena hanua pavapavana ese Hasaele e hamaoroa, eto, Herahia ḡauna avabia kau, baola, Dirava ena tau ida ba hedavari; bena iena amo Iehova ba nanadaia, ina gorere amo baina mauri lou eiava?
9 Taunabunai, Hasaele na ia ihedavari-henina totona ela, herahia e laohai, Damasko kohudia idau-idau, kamelo hari-ahui edia huahua. Ia na ela, vairanai e gini, eto, Natumu Ben-hadad, Suria pavapavana, ese vada e siaigu dekemu ai, e tomu “Ina gorere amo baina mauri lou eiava?”
10 Elisaia ese e haere henia, eto, Aola, ba hamaoroa, baoto “Momokani, vada ba mauri lou”; ḡau tamona, Iehova ese vada e haheitalaigu, momokani ia na baine mase.
11 Bena e raraia tao ela bona e hemarai. Bena Dirava ena tau e tai.
12 Bena Hasaele eto, Egu lohia e, dahaka dainai o taimu? Ia na e haere, eto, Badina be Israel taudia ede ba hadikadia toma na vada dibagu: edia kohoro ba doudia, edia eregabe taudia na dare amo bavaladia mase, natudia maraḡidia ba huaridia, bona edia rogorogo hahinedia ba dapadia.
13 Bena Hasaele eto, Emu hesiai tauna be daika, ia na una kara badana baine karaia? Ia na sisia mo. Elisaia na e haere, eto, Iehova ese vada e haheitalaigu, oi na Suria pavapavana ai baola.
14 Bena una tau ese Elisaia e rakatania, biaguna dekena e lou lao; bena biaguna ese e nanadaia, eto, Elisaia be dahaka eto? Ia na e haere, eto, E hamaorogu, oi na momokani ba mauri lou.
15 A daba ai ia ese hetaru ḡauna e abia, ranu ai e urua diho; bena hanua pavapavana vairana e ḡovalaia ela bona e mase. Bena Hasaele na ia gabuna ai e lohia.
Iehoram ese Iuda e lohiaia
16 Ioram Ahaba, Israel pavapavana, ena lohia laḡanina iha-imana ai, Iehoram, Iuda pavapavana Iehosafat natuna, na e lohia matama.
17 E lohia matama negana ai, ena mauri laḡanidia na toi-ahui rua; ia na Ierusalem ai e lohia, laḡani taurahani.
18 Ia na Israel pavapavadia edia dala ai e rakava, Ahaba ena iduhu taudia e karava heḡereḡerena, badina be adavana na Ahaba natuna hahinena. Ia na Iehova vairanai e kara dikava.
19 Ḡau tamona, Iehova ese Iuda na se habuaia tari, ena hesiai tauna David dainai, badina be vada e gwau hamata, lamepa ta ia baine henia bona ia garana baine henidia ela bona hanaihanai.
20 Iena nega ai Edom ese Iuda ena helohia e dadaraia, sibodia edia pavapava ta e haginia.
21 Bena Ioram e hanai, mai ena kariota iboudiai ida, Sairi kahana ela. Bena hanuaboi ai e tore isi; bena ia bona ena kariota biagudia ese Edom oreana, ia e daia heḡeḡe taudia, na e rahudia mase. A ena tuari taudia na e heau, edia hanua ela.
22 Taunabunai Edom ese Iuda ena helohia e dadaraiamu ema bona ina dina. Libna ese danu una nega tamona ai e dadaraia.
23 Ioram ena kara orena, e kara karadia iboudiai, na Iuda Pavapavadia Sisigadia Bukana ai vada eme hetore, ani?
24 Bena Ioram na tubu tama dekediai e mahuta, senena ida e guridia hebou, David ena hanua ai. Bena ia natuna Ahasia ese ia gabuna ai e lohia.
Ahasia ese Iuda e lohiaia
25 loram Ahaba, Israel pavapavana, ena lohia laḡanina ihagwauta-ruana ai, Ahasia, Iuda pavapavana Iehoram natuna, na e lohia matama.
26 E lohia matama negana ai, Ahasia ena mauri laḡanidia na ruahui rua; ia na laḡani tamona Ierusalem ai e lohia. Sinana ladana na Atalia, Omri, Israel pavapavana, tubuna.
27 Ia danu Ahaba ena iduhu edia dala ai e rakava, bona Iehova vairanai e kara dikava, Ahaba ena iduhu taudia e karava heḡereḡerena; badina be ia na Ahaba iduhuna ravadia.
28 Ia na Ioram Ahaba ida ela, Hasaele, Suria pavapavana, e tuari henia, Ramoto-gilead ai; unuseni ai Suria taudia ese Ioram e haberoa.
29 Bena King Ioram na e lou ela, Iesrele ai ena bero bae namo totona. Unu bero be Suria taudia edia amo e davaridia Rama ai, ia ese Hasaele, Suria pavapavana, e tuari henia negana ai. Bena Ahasia Iehoram, Iuda pavapavana, na Iesrele ela, Ioram Ahaba baine igoa ita totona, badina be ia na e gorereava.
