2 Hanua Pavapavadia 9:1-37
9 Bena peroveta tauna Elisaia ese peroveta oreana tauna ta e boiria, e hamaoroa, eto, Emu rami ba hekasilaia, ina dehoro kavabuna na imamu ai bavabia, Ramoto-gilead baola.
2 Ba kau negana ai, Iehu, Iehosafat Nimisi natuna, ba tahua. Ba raka vareai, ba hamaoroa, ia na bamona bogaragidia amo baine tore isi; bena laloma daiutuna lalonai ba hakaua vareai.
3 Bena dehoro kavabuna bavabia, dehoro na ia kwarana ai ba bubua, baoto “Iehova na ini e gwau tomamu: lau ese na horomumu, Israel pavapavana”. Bena iduara ba kehoa, ba heau; basio halahe.
4 Taunabunai, hari tau peroveta eregabena na Ramoto-gilead ela.
5 E kau negana ai, tuari lohiadia na e henega bouva; bena ia eto, Lohia e, lau na mai egu hereva emu. Iehu eto, Ai daika enai? Ia eto, Lohia e, oiemu.
6 Taunabunai, ia na e tore isi, ruma lalonai e raka vareai; bena hari eregabe tauna ese dehoro na kwarana tubuana ai e bubua, e hamaoroa, eto, Iehova, Israel Diravana, na ini e gwau tomamu: lau ese na horomumu, Iehova ena orea, Israel, pavapavana.
7 Biagumu Ahaba ena iduhu taudia na ba rahudia mase; unu amo egu hesiai taudia, peroveta taudia, raradia bona Iehova ena hesiai taudia iboudiai raradia davadia na Iesebel ena amo baina abi.
8 Badina be Ahaba ena iduhu taudia iboudiai bae mase ore; Ahaba garana mamaruanedia iboudiai Israel ai, e ḡuidia taudia bona asie guidia taudia, na baina aladia ore.
9 Ahaba ena iduhu na Ieroboam Nebata ena iduhu bona Baasa Ahia ena iduhu heḡereḡeredia ai baina halaodia.
10 Bona Iesebel na sisia ese bae ania, Iesrele tanona ai; ta ese basine guria. Bena eregabe tauna na iduara e kehoa, bena e heau.
11 Iehu na biaguna ena hesiai taudia dekedia ma e raka lasi, bena idia ese e nanadaia, eto, Namo eiava? Badina be dahaka una kavakava tauna na dekemu ema? Ia ese e haere henidia, eto, Una tau be dibamui, ena hereva danu dibamui.
12 Idia eto, O koikoimu, harihari a hamaoromai. Ia eto, Unu ini e hamaorogu, eto, Iehova na ini e gwau tomamu: lau ese na horomumu, Israel pavapavana.
13 Bena idia iboudiai ta ta ena dabua e doki oho haraḡa-haraḡa, ia henuna vadavadadia kavakava latadiai e laha. Bena kibi e hiriria, eto, Iehu na pavapava.
Iehu ese Ioram e alaia mase
14 Bena Iehu, Iehosafat Nimisi natuna, ese Ioram ihadikana dalana e tahua. (Hari loram na Israel taudia iboudiai ida Ramoto-gilead ai vada e hegima, Hasaele, Suria pavapavana, ilao-ahuna totona,
15 a King Ioram na vada e lou Iesrele, Hasaele, Suria pavapavana, e tuari heniava negana ai Suria taudia ese e haberoa berodia ihanamodia totona.)
Taunabunai, Iehu eto, Bema lalomui na iniheto, bena ta na hanua amo basine heau helada, harina basine ha piua Iesrele ai.
16 Bena Iehu na ena kariota ai e gui, Iesrele ela; badina be loram na unuseni ai. Ahasia, Iuda pavapavana, danu Ioram igo-itana totona vada ema.
17 Kito tauna ta na Iesrele kohorona ai gini, bena Iehu ena orea e maiva ai e itaia, eto, Orea ta na itaiamu. Ioram eto, Hosi-gui tauna ta bavabia, ba siaia lao, idia ida bae hedavari, bena baineto “Maino ai oma a?”
18 Taunabunai, tau ta na hosi ai e gui, ela, ia ida e hedavari, eto, Hanua pavapavana na ini e gwau tomamu: maino ai oma a? Iehu eto, Maino be dahaka ikaralaina emu ai? A hegiro, murigu ai a raka.
Bena kito tauna ma e hereva, eto, Gwaukau tauna na dekediai e kau, to se lou maimu.
19 Bena ia ese hosi-gui tauna ihararuana e siaia lao. Ia na dekediai e kau, eto, Hanua pavapavana na ini e gwau tomamu: maino ai oma a? Iehu e haere, eto, Maino be dahaka ikaralaina emu ai? A hegiro, murigu ai a raka.
20 Bena kito tauna ma e hereva, eto, Dekediai e kau, to se lou maimu; kariota ihaheauna danu Iehu Nimisi ena kariota e heaumu na heto, badina be ia na vaia ena kariota e haheaua lalo-dikamu.
21 Ioram eto, A heḡaeḡae. Bena idia ese ena kariota e heḡaeḡaelaia. Bena loram, Israel pavapavana, bona Ahasia, Iuda pavapavana, na e tore isi, ta ta ena kariota ena kariota ai e gui, Iehu ida bae hedavari totona ela; bena ia ida e hedavari, Naboto, Iesrele tauna, ena tano ai.
22 loram ese Iehu e itaia, bena eto, Iehu e, maino ai oma a? Ia na e haere, eto, Maino be ede baine vara toma, sinamu Iesebel ena lebulebu karadia bona ena mea karadia na doini momo herea negana ai?
23 Bena Ioram ese ena kariota e veria hegiro, e heau, bona Ahasia na e boi henia, eto, Ahasia e, tao tore!
24 Bena Iehu ese ena peva e marea mai goadana idoinai ida, loram na larolarona padadiai e tarakia, bena diba ese kudouna e daia uru, bena tauna na ena kariota ai e hetaba diho.
25 Bena Iehu ese iduruna tauna Bidikara e hamaoroa, eto, Avabia isi, Naboto tau Iesrele ena tano ai ba negea. Badina be ba laloa, ita raruosi na tamana Ahaba murina amo ta laova negana ai, Iehova ese ia ihadikana herevana e gwauraia guna, eto
26 “Lau Iehova ini na gwau tomamu: Naboto rarana bona natuna raradia varani na ita heḡereḡerena, davana na ina tano latanai do baina halou henimu”. Taunabunai, avabia isi, una tano ai ba negea, Iehova ena hereva heḡereḡerena.
Iehu ese Ahasia e alaia mase
27 Ahasia, Iuda pavapavana, ese una kara e itaia, bena ia na Bete-hagana dalana ai e heau lao. Bena Iehu ese e hahavaia, eto, Ia danu ba tarakia. Bena ena kariota ai e tarakia, Guru dara-daena ai, Ibleam badibadinai. Bena e heau, Megido ela, unuseni ai e mase.
28 Ena hesiai taudia ese kariota ai e laohaia, Ierusalem ela; bena senena ida ena gara ai e guria, David ena hanua lalonai.
29 (Ioram, Ahaba natuna, ena lohia laḡanina ihagwauta-tana ai, Ahasia ese Iuda e lohiaia matama.)
Iesebel e mase
30 Iehu na Iesrele ai e kau negana ai, Iesebel e kamonai, bena ia ese matana e umudia bona kwarana heraheradia e kara; bena gaba-mauru amo e ha igo.
31 Bena Iehu na ikoukou amo e heau vareai negana ai, hahine na eto, Simiri e, biagumu iala-masena taumu, maino ai oma a?
32 Bena Iehu na gaba-mauru e roha dae henia, eto, Daika na lauegu kaha ai? Daika? Bena hesiai taudia rarua eiava tatoi na e igo lasi, e itaia.
33 Ia eto, A tahoa dobi. E tahoa dobi; bena rarana pisipisidia na haba ai bona hosi ediai e kau. Bena hosi ese e moimoilaia.
34 Bena Iehu na e raka vareai, e aniani, e inuinu; bena eto, Hari e uduguiraia hahinena na bavabia, ba guria; badina be ia na pavapava natuna.
35 A idia ese igurina ela negana ai na ḡau ta asie davaria, kwarana koukouna bona aena bona imana palapaladia mo.
36 Bena idia na ela, e hamaoroa. Bena ia eto, Iehova ena hereva, ena hesiai tauna Elia, tau Tisbe, uduna amo e gwauraia, herevana binai: Iesrele tanona ai sisia ese Iesebel hidiona bae ania,
37 bona Iesebel tau-anina na Iesrele tanona kopina ai baine mia, hosi taḡena na heto; taunabunai tau ta basine hereva diba, basineto “Iesebel binai”.
