2 Korinto 4:1-18
4 Iena hebogahisi dainai ina hesiai ḡaukarana vada a abia; taunabunai ai na asia hesikumu.
2 Ai na hemarai karadia hehunidia vada a nege; dibaka karadia asia loalaimu; Dirava ena hereva asia hagagevaiamu. A hereva momokanidia a gwaurai hedinaraimu Dirava vairanai; unu amo taunimanima lalodia a hanamodiamu emai ai.
3 Emai sivarai namo bema hehuni, ia na mase e lao heniamu taudia mo ediai bema hehuni.
4 Ina tanobada diravana ese asi edia abidadama taudia lalodia vada e hadiburadia, Keriso namona, Dirava ihaḡoina tauna, ena sivarai namo diarina ediai baine tata dae roha na garina.
5 Badina be emai haroro badina na dia ai sibomai, to Keriso Iesu, ia na Lohiabada, bona ai, umui isiaimui ilao-henina taumai Iesu dainai.
6 Badina be Dirava eto “Dibura amo diari baine tara”; Diravana bunai ai lalomai ai e taramu, Dirava hairaina Iesu Keriso vairana ai baia itaia helaoreana.
7 A ina kohu namona na e kara hodu lalodiai a abiamu na heto; taunabunai siahu herea-daena na Dirava ena amo bainema, dia ai emai amo.
8 Ini amo unu amo hahedika e aru maimu, to asia dareremu; a daradaramu, to daramai asie dokomu;
9 e daḡedaḡe henimaimu, to bamomai asie rakatanimaimu; e haketomaimu, to asia masemu.
10 Nega idoinai tau-animai ai Iesu ena mase a loalaiamu, Iesu ena mauri danu tau-animai ai baine hedinarai helaoreana.
11 Badina be dina idoidiai, ai mauri taumai taomai e tore Iesu dainai, Iesu ena mauri ai hidiomai ai baine hedinarai helaoreana.
12 Benaini, ai lalomai ai mase e ḡaukaramu, a umui lalomui ai mauri e ḡaukaramu.
13 Emai kamonai be e torea herevana heḡereḡerena, eto, Lau na kamonai, bena na hereva; ai danu a kamonaimu, bena a herevamu.
14 Ai dibamai Lohiabada Iesu e hatorea isi Diravana ese ai danu Iesu ida baine hatoremai isi, bena ai bona umui ia vairanai baita gini.
15 Badina be ini ḡau iboudiai na umui daimui ai; hutuma ese harihari-bada bae abia bena Dirava bae imodaia badabada helaoreana.
16 Taunabunai, ai na asia hesikumu. Tau-animai e manokamu, a daba daba idoinai lalomai e hamatamatamu.
17 Badina be emai hisihisi taina, asi metauna bona asi vanahana ḡauna, ese emai namo bada-hereana ta e havaraiamu, mai metauna bona mia-hanaihanai ḡauna.
18 A itamu ḡaudia na asia raraidiamu, to mata-tuna ḡaudia a raraidiamu; badina be a itamu ḡaudia na mai negadia, to mata-tuna ḡaudia na bae mia hanaihanai.
