2 Korinto 6:1-18
6 Ai danu, ia ida a ḡaukara heboumu taumai, a noimuimu, Dirava ena harihari-bada basio abia kava.
2 Badina be ia na e tomu,
Nega namona ai na kamonai henimu,Hahemauri dinana ai na kahamu.
Benaini, nega namona binai, hahemauri dinana binai.
3 Tau ta asia hahekwakwanaia, emai hesiai ilao-henina baine dika na garina.
4 A emai kara iboudiai daidiai taunimanima bae diba, ai na Dirava ena hesiai taumai: haheauka dainai, hisihisi daidiai, ogoḡami dainai, lalohisihisi daidiai,
5 hekwadi daidiai, dibura rumana nohona dainai, heloḡo-heloḡo daidiai, hekwarahi dainai, hegima daidiai, hitolo dainai,
6 lalo-ḡoevaḡoeva dainai, aonega dainai, lalo-manada dainai, hebogahisi dainai, Lauma Helaḡa dainai, lalokau korikori dainai,
7 hereva momokani dainai, Dirava ena siahu dainai, kara maoromaoro ena tuari ḡaudia imamai idibadia ai bona lauridia ai daidiai.
8 E heatolaimai bona e hahemaraimai. Namomai e gwaurai bona dikamai e gwaurai. Koikoimai e gwaurai, ḡau tamona ai na momokani.
9 Asi harimai eto, ḡau tamona mai harimai. Mase taumai eto, ḡau tamona a maurimu. E dadabamai, to asie alamai mase.
10 Daramai e doko, to nega idoidiai a moalemu. Ogoḡami taumai, to hutuma a hataḡadiamu. Asi emai ḡau ta, to ḡau iboudiai na ai emai.
11 Korinto taumui e, hereva momo a hamaorolaimui; lalomai anidia eme hedinarai emui ai.
12 Emai lalokau emui ai na dia maraḡi; a emui hari eme maraḡi.
13 Na hereva henimuimu, natugu na heheto; na tomu davana ba henimai, emui lalokau na ba habadaia emai ai.
Lalo rua
14 Asie kamonaimu taudia ida basio hebamo. Badina be kara maoromaoro bona kara havara ede bae hetura toma? Eiava diari bona dibura ede bae hebou toma?
15 Keriso bona Beliara ede bae herohemaino toma? Kamonai tauna ahuna be dahaka, asi ena kamonai tauna enai?
16 Dirava ena dubu bona kaivakuku ede bae hatamonadia toma? Badina be ita na Mauri Diravana ena dubu; Dirava ena hereva heḡereḡerena, eto,
Lau na bogaragidiai baina noho bona baina loa eva-eva;Lau na edia Dirava ai bainala, bona idia be egu bese ai baina halaodia.
17 Lohiabada ma eto,
Edia amo ba raka oho, dauhai ba noho;Miro ḡauna enai basio dau kau, bena baina abimui dae;
18 Lau na Tamamui ai bainala, bona umui be natugu mamaruanemuibona hahinemui ai baina halaomui.
Lohiabada siahu-hereadaena unu e gwau toma.
