2 Samuel 13:1-39
13 David natuna Absalom na mai taihuna ta, ladana na Tamara; ia na hane namo. Nega ta e kau David natuna ta, ladana na Amnon, ese e ura henia.
2 Heḡahusi ese lalona e gugubaia, bena e gorerea, taihuna Tamara dainai; badina be ia na hane-ulato rami-hebou, bona Amnon na asi ena dala ta ienai.
3 A Amnon na mai turana ta, ladana na Ionadab, David kakana Simea natuna; hari Ionadab na kara heḡui-heḡui tauna.
4 Ia ese Amnon e hereva henia, eto, Hanua pavapavana natuna e, dahaka dainai daba daba medemu e hore e laomu? Basio hamaorogu a? Amnon ese e haere henia, eto, Tadigu Absalom taihuna Tamara na ura heniamu.
5 Ionadab ese e hamaoroa, eto, Emu mahuta patana ai ba hekure, ba gorere koikoi. Bena tamamu ese baine itamu negana ai na ba hamaoroa, baoto “Mani emu kara taihugu Tamara bainema, flaoa baine henigu baina ania, bona aniani taina na vairagu ai baine gabua, baina itaia, bona ia imana amo baina ania”.
6 Taunabunai, Amnon na e hekure, e gorere koikoi; bena hanua pavapavana ema e itaia negana ai, Amnon ese hanua pavapavana e noia, eto, Mani emu kara, taihugu Tamara bainema, ataga rua lau vairagu ai baine gabu, bena ia imana amo baina ani.
7 Bena David ese hereva e siaia Tamara enai; eto, Taihumu Amnon ena ruma aola, ana taina ba ha karaia.
8 Bena Tamara na taihuna Amnon ena ruma ela, e hekureva gabuna ai e raka vareai. Bena ia ese flaoa e hapariparia, e kuia, Amnon vairanai ataga e kara, bena e gabudia.
9 Bena ia vairanai e bubu diho, a ia ese e dadaraidia. Bena Amnon eto, Iboudiai a siaidia lasi. Taunabunai, iboudiai na iena amo e raka lasi.
10 Bena Amnon ese Tamara e hamaoroa, eto, Hari aniani ame vareailai daiutu lalonai, bena oi imamu amo baina ania. Bena Tamara ese e kara atagadia na e abi, daiutu ai e vareailai, taihuna Amnon dekenai.
11 A ianidia totona ia dekena e laohai negana ai, ia ese e rosia, eto, Taihugu e, aoma, aita eno bou.
12 Ia ese e haere henia, eto, Taihugu e, lasi, unu basio karagu toma; badina be kara unuhetomana na Israel ai asie karamu. Ina lebulebu karana basio karaia.
13 Egu hemarai ede baina huaia lao? Bona oi na Israel ai lebulebu tauna ai bae halaomu. Una dainai na noimumu, hanua pavapavana ba hereva henia; badina be ia ese emu amo basine rugu.
14 A ia na erena se kamonai; bena mai goadana dainai e butua tao, e hadikaia.
15 Bena Amnon ese ia e ihi-ihiraia bada; una dainai e ihi-ihiraiava heihi-ihiraina ese e ḡahusia gunava heḡahusina e hereaia. Bena Amnon ese e hamaoroa, eto, A tore isi, lao.
16 A hahine ese e haere henia, eto, Taihugu e, lasi; hari vada o karagu kererena na maraḡi, a o lulugumu kererena na bada. A ia ese asine kamonai henia.
17 Bena ia ese ena hesiai merona e boiria, eto, Ina hahine na vairagu amo avabia oho, bena ia murinai iduara ba koua ahu kunuka-kunuka.
18 Hari hahine ena dabua na dabua latana, imana lata ḡauna; badina be nega gunadia ai hanua pavapavana natuna ulatodia rami-hebou na unu e hadabuadia tomava. Taunabunai, ena hesiai merona ese hahine na e doria lasi murimuri ai, bena ia murinai iduara e koua ahu kunuka-kunuka.
19 Bena Tamara ese kahu na kwarana tubuana ai e atoa, bona hari ena dabua ima-lata e dokia ḡauna na e darea; bena imana tubuana ai e atoa; bena e raka lao mai tai Iolololona ida.
20 Bena taihuna Absalom ese e hereva henia, eto, Taihumu Amnon na oiemu ai e raka vareai a? Taihugu e, asio tai, badina be ia na oi taihumu, asio laloa bada. Taunabunai, Tamara na taihuna Absalom ena ruma ai e nohova mai dara-dokona ida.
21 King David ese unu kara iboudiai haridia e kamonai, bena e badu dikadika.
22 A Absalom ese Amnon se hereva henia, namo eiava dika herevana ta se gwauraia; badina be Absalom ese Amnon e inai henia, taihuna Tamara e hadikaia dainai.
Absalom ese Amnon e alaia mase
23 Laḡani heboudia rua e lao bubuni. Bena Absalom ena mamoe huidia iutudia taudia na Baal-hasoro ai, Efraim badinai. Bena Absalom ese hanua pavapavana natuna mamaruanedia iboudiai e vavedia.
24 Absalom danu hanua pavapavana dekena ela, e hereva henia, eto, Mani a kamonai; emu hesiai tauna na mai ena mamoe huidia iutudia taudia haida; mani emu kara hanua pavapavana mai ena hesiai taudia ida na emu hesiai tauna ida baitala.
25 A hanua pavapavana ese Absalom e haere henia, eto, Lasi, natugu e, iboumai ai basiala, baia hahekwarahimu na garina. E noia loulou, to se ura, a ena hahenamo mo e henia.
26 Absalom ma eto, Bema oi basiola, mani emu kara kakagu Amnon na ai ida baiala. Hanua pavapavana ese e nanadaia, eto, Dahaka dainai ia na oi ida baola?
27 A Absalom e noia louIou, ela bona ia ese Amnon bona hanua pavapavana natuna mamaruanedia iboudiai na e kahudia nege, ia ida ela.
28 Bena Absalom ese ena hesiai taudia na e haḡanidia, eto, Amnon ba itaia tao, ela bona vine ranuna ese baine hakekeroa; bena bainato “Amnon bavalaia”, bena bavalaia mase. Basio gari; vada na haḡanimui ani? Ba haheauka, ba goada balaheni.
29 Taunabunai, Absalom ena hesiai taudia ese Amnon na Absalom ena haheḡani heḡereḡerena e kara henia. Bena hanua pavapavana natuna mamaruanedia iboudiai na e tore isi, ta ta ena doniki ena doniki ai e gui, e heau.
30 Idia na dounu dala ai, haida ese hari e laohaia David dekenai, eto, Absalom ese hanua pavapavana natuna mamaruanedia iboudiai vada e aladia mase, ta se mauri.
31 Bena hanua pavapavana na e tore isi, sibona ena dabua e dare, bona tano ai e goru diho. Ena hesiai taudia una gabu ai gigini iboudiai danu sibodia edia dabua e dare.
32 A Ionadab, David tadina Simea natuna, eto, Egu lohia na basine laloa hari eregabe taudia, hanua pavapavana natuna, na iboudiai vada e aladia mase; Amnon sibona vada e mase, Absalom ena haheḡani dainai, badina be lalona unu vada e hadaia toma, hari Amnon ese taihuna Tamara e hadikaia dinana amo ema bona harihari.
33 Taunabunai, egu lohia bona egu pavapava kudouna basine hetaha, basineto hanua pavapavana natuna iboudiai vada e mase; lasi, Amnon sibona vada e mase.
34 A Absalom na e heau. Bena tau eregabe, kito tauna, na e gaga isi, e roha lao, taunimanima hutuma na Horonaimi dalana amo e maiva, ororo gabaena ai.
35 Bena Ionadab ese hanua pavapavana e hamaoroa, eto, A itaia, hanua pavapavana natuna na vada ema; emu hesiai tauna e gwauraia heḡereḡerena, unu vada e vara toma.
36 Ena hereva e doko ai, hanua pavapavana natuna e kau; bena gadodia e habada, e tai lolololo. Hanua pavapavana danu mai ena hesiai taudia iboudiai na e tai dikadika.
37 A Absalom na e heau, Talmai Amihud, Gesuru pavapavana, dekena ela. Bena David na natuna taina e taiva, dina iboudiai.
38 Taunabunai Absalom na e heau, Gesuru ela, laḡani toi unuseni ai e nohova.
39 Bena hanua pavapavana lalona ese Absalom ilao-henina e ura lalo-dikava; e diba Amnon na vada e mase dainai una lalo-hisina amo lalona na vada e hakerua.
