Apokalupo Ioane E Haheitalaia Herevadia 7:1-17
7 Bena aneru hahani na itadia, tanobada daigunidia haniosi ai e gini, tanobada ena lai haniosi e lao ahu, lai ta basine toa tanobada ai eiava davara ai, eiava au ta basine toa henia.
2 Ma aneru ta na itaia, mairiveina kahana amo e dae kau, ikouna toana, Mauri Diravana ena, e abia kau. Bena hari mai siahudia tanobada bona davara bae hadika anerudia hahaniosi ia ese e lolo henidia,
3 eto, Tanobada bona davara bona au basio hadika, ela bona eda Dirava ena hesiai taudia bagudia ai ia toana baita karaia.
4 Bena toadia e kara taudia e hagaudia na kamonai: Israel besena edia iduhu iboudiai amo domaga-ta gerebu-hani daha-hani* toadia e kara:
5 Iuda iduhuna amo gerebu-ta daha-rua,*Ruben iduhuna amo gerebu-ta daha-rua,Gad iduhuna amo gerebu-ta daha-rua,
6 Asere iduhuna amo gerebu-ta daha-rua,Napatali iduhuna amo gerebu-ta daha-rua,Manase iduhuna amo gerebu-ta daha-rua,
7 Simeon iduhuna amo gerebu-ta daha-rua,Levi iduhuna amo gerebu-ta daha-rua,Isakara iduhuna amo gerebu-ta daha-rua,
8 Sebulun iduhuna amo gerebu-ta daha-rua,Iosef iduhuna amo gerebu-ta daha-rua,Beniamina iduhuna amo gerebu-ta daha-rua.
9 Ini ḡau muridiai na roha lao, hutuma bada-herea na itadia, asi iduahidia, bese idau-idau bona iduhu idau-idau bona hanua idau-idau bona gado idau-idau amo, ibouboudiai na terono vairanai bona Mamoe Natuna vairanai e gini, edia dabua na kukuro-kukuro, bona imadia na mai retadia.
10 Idia na e lolo badabada, eto “Hahemauri na iseda Dirava, terono ai e helaimu Diravana, bona Mamoe Natuna, ediai”.
11 Bena terono bona heitatao taudia bona mauri ḡaudia haniosi e ginidia heḡeḡe anerudia iboudiai ese terono vairanai e goru diho, Dirava e toma henia diho,
12 eto “Amen, hahenamo bona hairai bona aonega bona heimodai bona hemataurai bona siahu bona goada na eda Dirava ese baine abi, harihari ela bona hanaihanai; Amen”.
13 Bena heitatao tauna ta ese e nanadaigu, eto, Ini dabua kurokurodia e hadokilai taudia be daidia? Bona ede amo ema?
14 Bena na haere, nato, Ḡauka e, oi dibamu. Ma e hamaorogu, eto, Ini na hisihisi badana amo vada ema, edia dabua na Mamoe Natuna rarana ai e huri, e hakurokuro.
15 Una dainai idia na Dirava ena terono vairanai gigini, bona ena Dubu Helaḡa lalonai ia isiaina e lao heni boimu e lao heni ranimu. Bona terono ai e helaimu Diravana ese edia taruha ai bainela.
16 Idia na basie hitolo lou, basie ranu mase lou; dina eiava siahu ta ese basine raradia.
17 Badina be Mamoe Natuna ese baine reḡudia; e lohilohimu ranudia mauridia badidiai baine hakaudia; bona Dirava ese iruru-matadia iboudiai na matadia amo baine dahu oho.
