Apokalupo Ioane E Haheitalaia Herevadia 9:1-21
9 Aneru iha-imana ese ena kibi e hiriria, bena hisiu ta na itaia, guba amo e moru tanobada ai; bena e dobu masemase gurina kina e henia.
2 Guri dobu masemase e kehoa, bena guri amo kwalahu e dae, amu badana kwalahuna na heto. Bena dina bona guba padana e vabura, guri kwalahuna vaburana.
3 Bena kwalahu amo kwadi e lasi tanobada ai; bona siahu e henidia, tanohada doadoadia siahudia na heto.
4 To e haḡanidia, tanobada reina bona tano ai e tubumu ḡaudia bona au basie hadika, a Dirava toana na bagudia ai asie abia taudia mo.
5 E haduadia danu, basie aladia mase, a hua ima bae hahisidia; una hisihisi na doadoa ena hekori hisina na heto.
6 Unu dinadia ai, taunimanima ese mase bae tahua, to basie davaria; bae ura lalo-dika bae mase, to mase ese baine heautanidia.
7 Hari kwadi ita-itadia na tuari hosidia na heheto; kwaradia na e kara gold havava ḡaudia na heheto; vairadia na taunimanima na heheto;
8 huidia na hahine huidia na heheto; isedia na leona isedia na heheto;
9 kemedia na mai ḡaudia, auri na heto. Idia hanidia reḡedia na kariota reḡedia na heheto, hosi momo ese e verimu ḡaudia, tuari ai e heau vareaimu negadia ai.
10 Iudia na doadoa iudia na heheto, mai duridia; bona edia siahu, taunimanima hua ima bae hahisidia, na iudia ai mia.
11 Idia na mai edia pavapava, guri dobu-hereana aneruna bunai; ia ladana Heberu gadodia ai be Abadon, a Helene gadodia ai ladana na Apoluon.
12 Dika ta vada e ore; rua be do mimia.
Kibi ihatauratoina
13 Aneru ihatauratoina ese ena kibi e hiriria, bena gado ta na kamonai, Dirava vairanai e mia patana helaḡana, gold ḡauna, doana haniosi edia amo.
14 Una gado ese aneru mai kibina ihatauratoina e hamaoroa, eto, Aneru hahaniosi, sinavai badana, ladana Eufrate, badibadinai vada e ḡuidia, ba ruhadia nege.
15 Bena unu aneru hahaniosi e ruhadia: anerudia bunu vada e abidia heḡaeḡae, una hora, una dina, una hua, una laḡani, edia; taunimanima tatoi tatoi amo ta ta bae aladia mase.
16 Tuari taudia mai hosidia ihagaudia na kamonai: idia na milion sinahu-rua.*
17 Bena egu mata-hanai ai unu hosi ini na itadia toma: e gui kau taudia na mai kemedia auridia, ita-itadia na lahi bona huakina* bona teio* na heheto; a hosi kwaradia na leona kwaradia na heheto, bona ududia amo lahi bona kwalahu bona teio e lasi.
18 Ini hahedika toiosi daidiai taunimanima tatoi tatoi amo ta ta e mase; hari lahi bona kwalahu bona teio, ududia amo e lasi ḡaudia, ese e aladia mase.
19 Badina be edia siahu na ududia ai bona iudia ai; iudia na gaigai na heheto, mai kwaradia, bena unu amo idia ese taunimanima e hahisidia.
20 Ḡau tamona, tanobada taudia oredia, ini hisihisi ese asie hamasedia taudia, na imadia ḡaukaradia asie helalolai kerehai; lauma dikadia itomadiho-henidia asie hadokoa; gold bona silver bona auri labora-labora bona nadi bona au e karalai kaivakukudia, asie ita asie kamonai asie raka ḡaudia, itomadiho-henidia danu asie rakatania.
21 Edia ala-ala bona edia babalau bona edia heuda-hanai bona edia henao danu asie helalolai kerehai.
Footnotes
^ Milion sinahu rua: 200,000,000.
^ Huakina: Nadi hururu-hururuna ta, asi ladana Motu gado ai dainai Helene gado ai vada e torea.
^ Teio: Nadi ta ladana, Helene gado ai. E aramu, bena bonana dika-hereana e daemu, taunimanima e hamasediamu. Ladana English gado ai na “sulphur”.
