Daniel 6:1-28
6 Ena ura dainai, Darauese ese heitatao taudia sinahu-ta ruahui e duanaidia, basileia na bae biagua, basileia kahadia iboudiai;
2 bona idia daediai hekwara taudia tatoi e atodia, ta be Daniel. Hari heitatao taudia ese edia ḡaukara sivaraidia na hekwara taudia bae hamaorolaidia, hanua pavapavana ena ḡau ta basine boio helaoreana.
3 Bena hari Daniel ese hekwara taudia bona heitatao taudia iboudiai e hereadia, badina be lauma herea-daena ese e rohea; bena hanua pavapavana ese e laloa hata, basileia idoinai ikwarana ai baine halaoa eto.
4 Bena hari hekwara taudia bona heitatao taudia ese hahebade badina ta e tahua, basileia ḡaukarana dainai Daniel bae habadelaia eto; a hahebade badina ta eiava kerere ta asie davaria; badina be ia na e kara maoromaoro, bena kara rea ta eiava kerere ta ienai asie davaria.
5 Bena unu tatau eto, Ina Daniel ihabadelaina badina ta basita davaria, a reana ena Dirava ena taravatu dainai ta baita davaria.
6 Bena hari hekwara taudia bona heitatao taudia na e raka bou ela, hanua pavapavana dekenai, e hereva henia, eto, King Darauese e, ba mauri hanaihanai!
7 Basileia ena hekwara taudia, ena lohia, ena heitatao taudia, ena hahealo taudia bona ena hegunalai taudia iboudiai ese lalodia vada e hatamonadia, hanua pavapavana ese taravatu ta baine haginia bona baine ha-aukaia, baineto dina toi-ahui lalodiai taunimanima iboudiai ese oi pavapava taumu sibomu bae ḡurimu diba, a ta ese dirava ta eiava tau ta bema ḡuria, vada bae abia, leona kohuana lalonai bae tahoa vareai.
8 Pavapava e, harihari taravatu ba haginia, bona iha-aukana pepana ai ladamu ba torea, bena basie ha-idaua diba, Mede bona Parasa taudia edia taravatu dalana heḡereḡerena ai basie hadokoa diba.
9 Taunabunai, King Darauese ese ladana e torea una taravatu pepana ai.
10 Daniel e diba pepa na e hetore, bena ena ruma ela. Ena ruma atai daiutuna na mai gaba-mauruna haida, Ierusalem italaina ai. Bena dina ta ta ai ia ese nega hatoi tuina e hadaiva, e ḡuriḡuriva bona ena Dirava e hanamo heniava, vaevae e karava heḡereḡerena.
11 Bena unu tatau na e raka bou ela, Daniel e davaria, ena Dirava vairanai e ḡuriḡuriva bona e noinoiva.
12 Bena idia ese hanua pavapavana e raka henia kahi, taravatu e herevalai henia, eto, Pavapava e, oi ese taravatu pepana o torea, ani, oto dina toi-ahui lalodiai taunimanima iboudiai ese oi pavapava taumu sibomu bae ḡurimu diba; a ta ese dirava ta eiava tau ta bema ḡuria, vada bae abia, leona kohuana lalonai bae tahoa vareai. Hanua pavapavana e haere, eto, Hereva vada e auka midimidi, Mede bona Parasa taudia edia taravatu dalana heḡereḡerena ai basie hadokoa diba.
13 Bena idia na hanua pavapavana vairanai e haere, eto, Pavapava e vanegai Daniel, Iuda amo e mailaidia taudia ta, ese se kamonai henimumu, bona vada o torea taravatu pepana se badinaiamu, a dina ta ta amo nega hatoi e ḡuriḡurimu.
14 Unu hereva e kamonai negana ai, hanua pavapavana lalona vada e hisihisi herea, bona lalona e hadaia Daniel ede baine hamauria toma; ia na e hekwarahi ela bona dina e diho, Daniel ihamaurina totona.
15 Bena unu tatau na hanua pavapavana dekena e raka bou ela, e hereva henia, eto, Pavapava e, ba diba, Mede bona Parasa taudia edia taravatu na iniheto: hanua pavapavana ese e haginiamu taravatuna na ta ese basine ha-idaua diba.
16 Bena hanua pavapavana e haheḡani; bena haida ese Daniel e mailaia, leona edia kohua lalonai e tahoa vareai. Hanua pavapavana ese Daniel e hamaoroa, eto, Emu Dirava, o toma henia diho louloumu Diravana, ese baine hamaurimu.
17 Bena nadi ta e mailaia, kohua iduarana e koulaia; bena hanua pavapavana ese ia toana bona ena lohia taudia toadia na una nadi ai e kara, Daniel enai vada e kara ḡaudia na ta ese basine ha-idau helaoreana.
18 Bena hanua pavapavana na ena ruma ela, e anivaga rani, lalona ihakeruna ḡaudia haida ia dekena asie laohai, bona se mahuta.
19 Daba e kinia, bena hanua pavapavana e tore isi, leona edia kohua e lao henia haraḡa.
20 Daniel e atoa kohuana na e raka henia kahi, bena mai ḡanaḡanana ida e boi lolo, Daniel e boi henia, eto, Daniel e, Mauri Diravana ena hesiai tauna, emu Dirava, o toma henia diho louloumu Diravana, ese ihamaurimu mai dibana eiava?
21 Bena Daniel ese hanua pavapavana e haere henia, eto, Pavapava e, ba mauri hanaihanai.
22 Egu Dirava ese ena aneru ta e siaia mai, bena ia ese leona ududia e hakapudia, bena asie hadikagu; badina be ia vairanai lau na asi egu kerere, bona oi vairamu ai danu, pavapava e, lau na asina kara kerere.
23 Bena hanua pavapavana na e moale dikadika, bena e haheḡani, Daniel na kohua lalona amo bae abia lasi. Taunabunai Daniel na kohua lalona amo e abia lasi; bena bero ta ienai asie davaria, badina be ia ese ena Dirava vada e abidadama henia.
24 Bena hanua pavapavana ma e haheḡani, bena unu Daniel e habadelaia taudia na e mailaidia, leona edia kohua lalonai e tahodia vareai, idia bona natudia bona adavadia danu. Bena dounu moru-dobidia ai, leona ese e daredia, turiadia iboudiai e hakwaidudia patapata.
25 Bena King Darauese ese revareva ta e torea, bese idau-idau bona basileia idau-idau bona gado idau-idau taudia iboudiai, tanobada idoinai latanai e nohomu taudia, ediai, eto: Maino na emui ai baine bada.
26 Na haheḡanimu, lau ese na lohiaiamu basileiana idoinai lalonai taunimanima na bae heude-heude bona bae gari, Daniel ena Dirava vairanai.
Badina be ia na Mauri Diravana,e mauri hanaihanaimu;ena basileia na basie habuaia tari ela bona hanaihanai,ena siahu na baine hesiriu ela bona dokona.
27 Ia na e hahemaurimu bona e herauamu,toa bona hoa karadia ia ese e karamu,guba ai bona tanobada ai danu.Ia ese Daniel vada e hamauria,leona edia siahu amo.
28 Bena hari Daniel ena namo e badava, Darauese ena lohia negana ai, bona Kurese, tau Parasa, ena lohia negana ai.
