Daniel 7:1-28
7 Belesasara, Babulono pavapavana, ena lohia laḡanina gini-gunana ai, Daniel na e nihi, bona mata-hanai ḡaudia haida na kwarana lalonai e hedinarai, ena mahuta patana ai e hekureva negana ai. Bena ia ese nihi sivaraina e torea, bona anina e hahedinaraia.
2 Daniel eto,
Hanuaboi ai na mata hanai bena na itaia, guba laina haniosi ese gadobada e hahurehurea.
3 Bena mauri ḡaudia badadia hani na davara lalona amo e dae, ita-itadia na idau-idau.
4 Gini-gunana na leona na heto, a mai hanina, ugava hanina na heheto. Bena na itaiava ai na hanina e butudia oho, bena tano ai e haginia tore, aena ruaosi ai e haginia, taunimanima na heto, bona taunimanima darana e henia.
5 Bena mauri ḡauna ta ma na itaia, iharuana, bea na heto. E haginia tore, gini-gunana ohena ai, bona uduna ai na rudu turiadia autoi, isena padadiai. Ta ese e hamaoroa, eto, A tore isi, vamu momo bavani.
6 Una murinai na roha lao, ta ma na itaia, taiga na heto, a manu hanidia hani na doruna ai; bona una mauri ḡauna na mai kwarana hani danu; bena lohia siahuna na e henia.
7 Una murinai, hanuaboi mata-hanaidia ai, mauri ḡauna ihahanina na itaia, mai garina bona mai kudou-hetahana; ia na goada dikadika danu. Isena na auri ḡaudia, bona bada herea; bena ia ese ḡau e aniva, e dare patapatava, bona momoruna na aena amo e moia patapatava. Ia na idau, dia e gunalaia ḡaudia heḡereḡeredia; ia doana na gwauta.
8 Doana na haerodia, bena na itaia, doa ma ta idia bogaragidiai e tubu, maraḡi-maraḡina; bena ia vairanai unu doa gunadia toi e heraḡa oho. Na itaia danu, una doa na mai matana, tau matana na heto; bona mai uduna, hereva badadia e gwaurai.
9 Na itaiava ai na terono haida na hehelai, bena ḡauka ta na e helai diho; ena dabua na kuroka-kuroka, snow na heto, bona kwarana huina na mamoe huina ḡoeva-daena na heto; ena terono na lahi hururu-hururudia, ava-keikeina na e aramu lahina.
10 Ia vairanai lahi e aru lasiva, sinavai na heto; daha daha ese ia isiaina e lao heniva, gerebu gerebu na ia vairanai e giniva, hahemaoro tauna na e hahemaorova, bona buka na e hekehova.
11 Bena hereva badadia, hari doa ese e gwaurai ḡaudia, daidiai na roha lao. Bena na roho laova ai, hari mauri ḡauna na e alaia mase, tau-anina na e habuaia tari, e heni, Iahi ese baine ḡolea oho.
12 Hari mauri ḡaudia oredia na edia lohia siahuna na e abia oho, a edia mauri na nega taina e hadaudaua ela bona nega ta.
13 Bena hanuaboi mata-hanaidia ai na itaia, ta na guba oridia ai ema, ia na taunimanima natuna na heto; ia na Ḡauka dekena ema, bena vairanai e hakaua lao.
14 Bena lohia siahuna e henia, bona hairai bona basileia danu, bese idau-idau bona basileia idau-idau bona gado idau-idau iboudiai ese ia isiaina bae lao heni helaoreana; iena lohia siahuna na mia-hanaihanai siahuna, basine puki oho ḡauna, bona ena basileia danu ta ese basine habuaia tari.
15 A lau Daniel na laumagu e daure, bona kwaragu mata-hanaidia ese e hagarigu.
16 Bena unuseni ai e giniva taudia ta na raka henia kahi, na nanadaia, ina idoinai anina korikori be dahaka. Taunabunai ia ese e hamaorogu, bona unu ḡau anidia e hadibalaigu, eto,
17 Ini mauri ḡaudia badadia haniosi na pavapava hahani, tanobada ai bae tore isi.
18 A Herea Mikamika Diravana ena helaḡa taudia ese basileia bae abia, basileia na bae ḡaunaia hanaihanai, oibe, ela bona hanaihanai.
19 Bena na ura baina diba, hari mauri ḡauna ihahanina herevana korikorina be dahaka. Ia na idau, dia oredia iboudiai heḡereḡeredia. Ia na mai gari-badana; isena na auri bona kahauna na auri labora-labora. Ia ese ḡau e aniva, e dare patapatava, bona momoruna na aena amo e moi patapatava.
20 Bona doa gwauta kwarana ai herevadia danu, bona una doa ta, e tubu bena ia vairanai doa toi e moru ḡauna, mai matana bona mai uduna bena hereva badadia e gwaurai bona ita-itana ese bamona ita-itadia na e hereadiava ḡauna, herevana.
21 Lau na roha laova ai, una doa ese helaḡa taudia e tuari henidia bona e hadareredia,
22 ela bona Ḡauka na ema, bena ia ese hahemaoro e karaia, Herea Mikamika Diravana ena helaḡa taudia maorodia e gwaurai; bena negana e gini dae helaḡa taudia ese basileia e abia.
23 Taunabunai ia eto, Mauri ḡauna ihahanina na iniheto:
Basileia ihahanina na tanobada latanai baine vara;ia na baine idau, dia basileia iboudiai heḡereḡeredia;ia ese tanobada idoinai baine hadonoa,baine moia tao, baine hamakohia patapata.
24 Unu doa gwauta be pavapava gwauta,una basileia lalona amo bae tore isi;bona idia muridiai ma ta baine tore isi.Ia baine idau, dia unu gunadia heḡereḡeredia,ia ese pavapava tatoi baine hadareredia.
25 Ia ese Herea Mikamika Diravana baine ḡonaḡonalaia,bona Herea Mikamika Diravana ena helaḡa taudia edia goada baine ha-orea;ia ese nega bona taravatu iha-idaudia daladia baine lalo hata,bena ia imana ai bae heni,laḡani ta bona laḡani rua bona laḡani kahana ai.
26 A hahemaoro tauna ese hahemaoro baine karaia,bena iena lohia siahuna bae abia oho,bae ha-orea bona bae habuaia tari ela bona dokona.
27 Bena basileia bona lohia siahuna,bona guba idoinai henunai e miamu basileiadia siahudia danu naHerea Mikamika Diravana ena helaḡa taudia bae henidia;edia basileia na mia-hanaihanai basileiana ai bainela,bona orea mai siahudia iboudiai eseisiaidia bae lao heni bona bae kamonai henidia.
28 Hereva dokona binai. A lau Daniel egu lalo-hadai ese e hagarigu bona na labora ḡuḡuru; a ina hereva na lalogu ai na dogoa tao.
