Deuteronomi 2:1-37
2 Una murinai ta Iou lao, tano ḡaḡaena ai ta loaloa, Davara Kakakakana kahana ai, Iehova ese e haḡanigu heḡereḡerena. Dina hoho Seiri ororona ta rakaia heḡeḡe.
2 Bena Iehova ese e hereva henigu, eto,
3 Ina ororo badi-tanona ai vada o loa daudau; harihari mirigini kahana baola.
4 Bona Israel taudia ba hamaorodia, baoto: Harihari umui na varavaramui, Esau garana, edia tano amo ba raka hanai; idia na Seiri ai e nohomu. Idia ese umui garimui bae gari. Taunabunai, nahuamui ba toho:
5 basio tuari henidia, badina be edia tano taina basina henimui; oibe, aemu palapalana bema moia heḡereḡerena na basina henimui, badina be Seiri ororona na Esau na henia, ena tano.
6 Idia ediai aniani ba hoia, moni davana, bena bavania; bona idia ediai ranu ba hoia, moni davana, bena ba inua.
7 Badina be Iehova emui Dirava ese vada e hanamomui, imamui ḡaukaradia iboudiai Ialodiai; emui loaloa ina tano ḡaḡaena badana ai ia dibana. Ini laḡani hari-ahui lalodiai Iehova emui Dirava ese vada e bamomuiva; ḡau ta ai asio dabu.
8 Taunabunai ta laolao, varavarada Esau garana, Seiri ai e nohomu taudia, ta rakatanidia, Araba dalana danu ta rakatania, bona Elata bona Esiono-gebere ta rakatanidia.
Bena ta lou lao, Moab tano-ḡaḡaena dalana ai tala.
9 Bena Iehova ese e haduagu, eto, Moab taudia na basio daḡedaḡe henidia bona basio tuari henidia; badina be edia tano taina basina henimu; badina be Ara na Lot garana vada na henidia, edia tano.
10 (Gunaguna Emim besena unuseni ai e nohova: idia na hutuma bona taunimanima badadia; edia lata na Anakim taudia edia lata heḡereḡerena.
11 Haida ese ladadia e hatomu “Refaim”, Anakim taudia e gwauraidiamu heḡereḡerena; a Moab taudia ese ladadia e hatomu “Emim”.
12 Hori taudia danu gunaguna Seiri ai e nohova, a Esau garana ese e luludia lasi, e habuadia tari, bona edia tano e abia, Israel na Iehova ese e henidia tanona e kara henia heḡereḡerena.)
13 A tore isi, eto, Serede sinavaina ba hanaia. Taunabunai, ita na Serede sinavaina ta hanaia.
14 Kade-baranea ta rakatania ela bona Serede sinavaina ta hanaia na eda laolao laḡanidia na toi-ahui taurahani; una negana ai una uru ena tuari taudia iboudiai vada e mase ore eda taruha ai, Iehova ena hereva heḡereḡerena.
15 Badina be Iehova imana ese e inai henidia, e habuadia, ela bona e mase ore.
16 Ina bese ena tuari taudia iboudiai e mase ore murinai,
17 Iehova ese e hereva henigu, eto,
18 Hari dina ai Moab ena tano hetoana ba hanaia, Ara ai;
19 bena Amono garana edia tano hetoana ba raka henia kahi negana ai, basio daḡedaḡe henidia bona basio tuari henidia, badina be Amono garana edia tano taina basina henimui; badina be una tano na Lot garana vada na henidia, edia tano.
20 (Una tano ladana ta be “Refaim”, badina be gunaguna Refaim taudia unuseni ai e nohova. A Amono taudia ese ladadia e hato “Samsumim”:
21 idia na taunimanima badadia, bona hutuma, edia lata na Anakim taudia edia lata heḡereḡerena. A Iehova ese e habuadia tari; bena Amono taudia ese gabudia e abi bona edia tano e abia:
22 Esau garana Seiri ai e kara henidia heḡereḡerena, ia ese Hori taudia e habuadia tari, bena Esau garana ese edia tano e abia bona e noholaiamu ema bona harihari.
23 Avim besena danu unuheto: idia na hanua maraḡidia e noholai ela bona Gasa. A Kaftorim taudia na Kaftoro amo ema, e aladia ore, bena edia tano e abia.)
24 A tore isi, eto, emui laolao baola, Aranon kourana ba hanaia; Sihon, Amoro tauna, Hesebon pavapavana, na umui imamui ai, ena tano danu vada na henimui; ba raka vareai, ba tuari henia.
25 Hari dina ai lau ese gari baina havaraia guba henunai e nohomu besedia iboudiai lalodia ai; idia ese umui harimui bae kamonai, bena garimui bae gari; kudoudia bae hetaha bona daradia bae doko umui daimui ai.
26 Taunabunai, Kedemoto tano-ḡaḡaena amo lau ese gwaukau taudia na siaidia, Sihon, Hesebon pavapavana, dekenai, maino herevadia bae gwaurai, baeto:
27 Mani emu kara emu tano amo baina raka hanai; dala ai mo baina raka hanai, basina raka siri, idiba kahana amo eiava lauri kahana amo.
28 Aniani na emu ai baina hoia, moni davana, bena baina aniani; ranu danu oiemu amo baina abia, moni davana, bena baina inua. Ḡau tamona ba gwau maoro, aegu amo baina raka hanai.
29 Esau garana, Seiri ai e nohomu, na unu e karagu toma, bona Moab taudia, Ara ai e nohomu, na unu e karagu toma; unu mo baina kara toma, ela bona Ioridane sinavaina baina hanaia. Iehova emai Dirava vada e henimai tanona ai baina raka vareai.
30 A Sihon, Hesebon pavapavana, ese e gwauda tao, basita raka hanai eto; badina be Iehova emui Dirava ese laumana e ha-aukaia bona lalona e hagoadaia, umui imamui ai baine atoa helaoreana, hari ina dina ai heḡereḡerena.
31 Bena Iehova ese e hamaorogu, eto, A itaia, Sihon bona ena tano ina harihari aina henimu; avabia, ba noholaia.
32 Bena Sihon e raka lasi, mai ena orea taudia iboudiai, e tuari henida Iahasa ai.
33 Bena Iehova eda Dirava ese ita imada ai e atoa; ia bona natuna bona ena orea idoinai ta hadareredia.
34 Una negana ai ena hanua iboudiai ta abidia, ta habuadia tari, tatau bona hahine, memero bona kekeni, ta aladia ore, ta se roho mauri.
35 A ta abi boromakaudia bona ta habuadia tari hanuadia kohudia ta laohai.
36 Aroere, Aranon kourana isena ai, bona koura hanuana amo ela bona Gilead, hanua ta se auka, iboudiai ta abidia; Iehova eda Dirava ese ita imada ai e atodia.
37 A Amono taudia edia tano, Iabok sinavaina isena ai, bona ororo hanuadia, na asio raka henidia kahi, Iehova, eda Dirava, ese e gwau tao gabudia iboudiai asio raka henidia kahi.
