Esekiel 3:1-27
3 Bena ia ese e hamaorogu, eto, Taunimanima natuna e, na dudui henimu ḡauna na bavania; ina pepa helokuna bavania, bena baola, Israel taudia ba hereva henidia.
2 Taunabunai, lau ese udugu na haḡaia; bena ia ese pepa na e henigu, baina ania.
3 E hamaorogu, eto, Taunimanima natuna e, ina na henimumu pepana bavania, bogamu ba hakunulaia. Bena na ania; udugu ai e gaiho, bada-ranuna na heto.
4 Bena ia ese e hamaorogu, eto, Taunimanima natuna e, Israel besena dekena baola, egu hereva na ba hamaorolaidia.
5 Badina be idau gado aukana ta taudia dekedia asina siaimumu, a Israel besena enai;
6 dia bese idau-idau momo, edia gado na i’idau bona a’auka besedia, ediai. Momokani, unuhetomadia ediai bama siaimu, idia ese bema kamonai henimu.
7 A Israel besena ese basine kamonai henimu, badina be idia na asie uramu lau bae kamonai henigu. Badina be Israel taudia iboudiai na vairadia e huamu bona lalodia e ha-aukamu.
8 A itaia, oi vairamu vada na ha-aukaia, idia edia vaira-auka davana; bona oi vairamu vada na hahuakaia, idia edia vaira-hua davana.
9 Vairamu vada na ha-aukaia, nadi-vasiga ena auka e hereaiamu nadina na heto; idia garidia basio gari bona edia vaira-hua basio garilaia, badina be idia na daḡedaḡe besena.
10 Ma e hamaorogu, eto, Taunimanima natuna e, na herevalai henimumu herevadia iboudiai na lalomu ai bavabi dae, bona taiamu amo ba hakala henidia.
11 Aola, dauhai e hanohodia taudia, emu bese taudia, dekediai, bena ba hamaorodia, baoto “Ḡaubada Iehova na ini e gwau tomamu”; bena bae kamonai eiava kamonai basie ura.
12 Bena Lauma ese e abigu isi; bona Iehova hairaina na gabuna amo e tore isi negana ai tano-laga badana reḡena na murigu kahana ai na kamonai;
13 una na mauri ḡaudia hanidia e hetomu heheni reḡedia bona idia badibadidiai e miava ava-keikeidia reḡedia, e hekara tano-laga reḡena na heto.
14 Lauma ese e abigu isi, dauha e laohaigu; laumagu siahuna iditana ai nala, badina be Iehova imana na auka, lau latagu ai.
15 Bena dauhai e hanohodia taudia dekediai na kau, Telabibi ai; idia na Kebara sinavaina isena ai e nohova. Bena unuseni ai na helai, idia bogaragidiai, laumagu na e daure ela bona dina hitu e ore.
Israel igimana tauna
16 Dina hitu e ore ai, Iehova ena hereva na egu ai e kau, eto,
17 Taunimanima natuna e, lau ese Israel besena igimana tauna ai vada na halaomu; lau udugu herevana ta ba kamonai negadia iboudiai na lau ladagu ai do ba sisiba henidia.
18 Kara dika tauna bama hamaoroa, bama toma “Oi na vada ba mase”, bena oi basioma sisiba henia, una kara dika tauna na ena dala dikana amo ihakau-sirina bona ena mauri irauana herevadia basioma sisibalai henia, una kara dika tauna na ena dika ai baine mase; a ia rarana davana na oi imamu amo baina gwauraia.
19 A kara dika tauna boma sisiba henia, bena ia na ena kara dika amo eiava ena dala dikana amo basine raka siri, ia na ena dika ai baine mase; a oi ese sibomu emu mauri do ba rauaia.
20 Ina danu, kara maoromaoro tauna ta na ena kara maoromaoro amo bema raka siri, bena bema kara havara, bena lau ese hekwakwanai ḡauna ta ia vairanai bama atoa, ia na baine mase; oi ese to sisiba henia dainai ia na baine mase, ena kara dika bagunai, bona ena kara maoromaorodia, guna ia ese e kara ḡaudia, na basie lalodia tao; a ia rarana davana na oi imamu amo baina gwauraia.
21 Ḡau tamona, oi ese kara maoromaoro tauna boma sisiba henia basinema kara dika, bena basine kara dika, ia na do baine mauri, badina be sisiba herevana na e abia dae; bena oi ese sibomu emu mauri do ba rauaia.
Peroveta tauna e mu
22 Unuseni ai Iehova imana na lau latagu ai mia. Bena ia ese e hamaorogu, eto, A tore isi, ba raka lasi, taora baola; unuseni ai baina hereva henimu.
23 Taunabunai na tore isi, na raka lasi, taora nala; unuseni ai Iehova hairaina ginina ai na itaia, Kebara sinavaina isena ai na itaia hairaina heḡereḡerena. Bena na goru diho.
24 A Lauma ese e rohegu, bena ia ese e haginigu tore. Bena e hereva henigu, eto,
Aola, sibomu emu ruma lalonai ba hekou ahu.
25 Taunimanima natuna e, a itaia, oi na varo amo bae ḡuimu, bena taunimanima dekediai basio raka lasi diba.
26 Bena lau ese malamu na udumu atai maona ai baina hakapea dae; taunabunai vada ba mu, bena basio gwau henidia diba; badina be idia na daḡedaḡe besena.
27 A baina hereva henimu negana ai, udumu do baina hahaḡaia, bena ba hereva henidia, baoto “Ḡaubada Iehova na ini e gwau tomamu”. Kamonai e uramu tauna na baine kamonai; bona kamonai se uramu tauna na basine kamonai; badina be idia na daḡedaḡe besena.
