Esodo 15:1-27
15 Bena Mose bona Israel taudia na ina ane e abia, Iehova ena; eto,Lau na ane baina abia, Iehova ena, badina be ia na vada e kwalimu herea;Hosi bona e gui tauna davara ai vada e tahodia dobi.
2 Iehova na egu goada bona egu ane,Ia ese vada e hamaurigu.Egu Dirava binai, lau ese baina heatolaia;Tamagu ena Dirava binai, lau ese baina imodaia.
3 Iehova na tuari tauna; ia ladana be Iehova.
4 Farao ena kariota bona ena tuari oreana na davara ai vada e tahodia dobi,Ena tuari lohiadia hereadia Davara Kakakakana ai vada e hamaloadia.
5 Utu-utu ese vada e habubunidia;Dobu gabudia ai vada e mutu nadi na heto.
6 Iehova e, oi imamu idibana siahuna na herea-dae;Iehova e, oi imamu idibana ese inai taudia vada e habuadia tari.
7 Emu siahu herea-daena ese e inai henimumu taudia e hadarerediamu;Emu badu ese e aradia oremu, rei kakoro na heto.
8 Hurehure o hahodi heni, bena e hahebou,E aru bou, e heabi isi;Dobu gabudia gadobada ai vada e auka.
9 Inai tauna eto: Baina hahavadia, baina lasidia tao,Edia kohu baina hari, egu ura ediai baina kara;Egu dare baina lasi, lau imagu ese baine habuadia tari.
10 Emu lai o siaia, bena davara ese e habubunidia;Idia na gadobada ai e mutu, auri metauna na heto.
11 Iehova e, dirava loḡora bogaragidiai oi heḡereḡeremu be daika?Oi idaimu be daika? Helaḡa ai o herea daemu;Mai garidia ida e imodaimumu; hoa karadia o karamu.
12 Oi imamu idibana o toia roro, bena tano ese e hadonodia.
13 O hamauria besena na emu hebogahisi ai vada o hakaua;Emu goada ai vada o hakaua ema bona gabu helaḡana.
14 Bese idau-idau na e kamonaimu, bena e garimu;Filistia taudia na kudoudia e hetahamu;
15 Edom lohiadia na daradia e dokomu;Moab edia siahu taudia na gari ese e butudia taomu;Kanaan taudia iboudiai e veve ohomu.
16 Gari bona kudou-hetaha ese e butudia tao;Oi imamu goadana dainai idia na nadi heḡereḡeredia ai ela, asie marere,Ela bona oi Iehova emu orea taudia vada e raka hanai,Oibe, oi ese o hoidia taudia e raka hanai.
17 Oi ese ba hakaudia vareai, oi ahumu ai vada o halaoa ororona ai ba hadaidia,Oi Iehova emu noho gabuna ai vada o halaoa gabuna,Oi Iehova imamu ese vada e haginia dubuna.
18 Iehova baine lohia hanaihanai.
19 Badina be Farao ena hosi bona ena kariota bona ena hosi-gui taudia na davara lalona amo ela; bena Iehova ese davara hurehuredia amo e habubunidia. A Israel taudia na tano kaukauna ai e raka, davara bogaragina ai.
20 Bena Miriama, peroveta hahinena, Aaron taihuna, ese tareko e abia imana ai; bona hahine iboudiai edia tareko e abi, ia murina amo ela mai mavarudia ida.
21 Bena Miriama ese tatau edia ane davana e halou henidia, ane e abia, eto,
Ane avabia, Iehova ena, badina be ia na vada e kwalimu herea;Hosi bona e gui tauna davara ai vada e tahodia dobi.
Israel taudia ranu e masedia
22 Bena Mose ese Israel taudia na Davara Kakakakana amo e hakaudia lao, tano ḡaḡaena ladana Suru amo e hakaudia hanai. Dina toi tano ḡaḡaena ai eha laolao, ranu asie davaria.
23 Bena gabu ladana Mara ai e lasi, a una gabu ranuna asie inua diba, badina na idita; una dainai una gabu ladana e hatoa Mara.*
24 Bena laolao taudia ese Mose e maumauraia, eto, Ai na dahaka baia inua?
25 Bena ia ese Iehova e noia; bena Iehova ese au ta e haheitalaia: ia ese una au ranu e urua diho, bena ranu gaiho vada e davaria.
Una gabu ai Iehova ese taravatu bona haheḡani e henidia, e dibadia,
26 eto, Oi ese Iehova emu Dirava gadona boma hakala henia, bona ia vairanai boma kara maoromaoro, ena haheḡani boma badina bona ena taravatu boma kara, lau na hisihisi idau-idau amo basinama hahisimu, Aigupto taudia na hahisidia heḡereḡeredia; badina be lau na Iehova, oi ihamaurimu Diravana.
27 Bena idia na Elim ai e kau; unuseni ai ranu guridia na gwauta-rua, bona pamu audia na hitu-ahui. Bena unu ranu badidiai e taruha.
Footnotes
^ “Mara” anina be “Idita”.
