Esodo 20:1-26
20 Dirava ini e hereva toma:
2 Lau binai Iehova, emu Dirava: Aigupto taudia edia tano bona edia iḡui rumana amo na hakaumu lasi.
3 Idau dirava ta basio abia lau vairagu ai.
4 Laulau ta basio koroa; ḡau ta laulauna, guba ḡauna ta, eiava tanobada ḡauna ta, tanobada henuna ḡauna ta, basio karaia:
5 basio toma henia diho, bona isiaina basio lao heni. Badina be lau Iehova emu Dirava na vaḡeḡe Diravana: e inai henigumu taudia edia kara dika davadia na natudia bona tubudia latadiai baina kara ela bona uru ihatoina bona ihahanina,
6 a e ura henigumu bona egu taravatu e badinamu taudia baina bogadia hisi ela uru daha.
7 Iehova emu Dirava ladana na basio hatoa kava hatoa kava; badina be Iehova ladana baine hatoa kava tauna na Iehova basineto ia na asi ena kerere.
8 Dina Helaḡa ba laloa, ba hahelaḡaia.
9 Dina tauratoi lalodiai emu ḡaukara idoinai ba karaia,
10 a dina ihahituna na dina helaḡana, Iehova emu Dirava ena. Una dina ai basio ḡaukara, oi eiava natumu maruanena eiava natumu hahinena eiava emu hesiai tauna eiava emu hesiai hahinena eiava emu boromakau, eiava idau tauna emu ruma ai e noho hedoamu.
11 Badina be dina tauratoi lalodiai Iehova ese guba bona tanobada bona davara bona lalodia ḡaudia iboudiai e karadia, bena dina ihahituna ai e laḡa ani. Badina bunai Iehova ese dina ihahituna vada e hanamoa bona e hahelaḡaia.
12 Tamamu sinamu ba matauraidia; unu amo emu mauri dinadia bae hoho, Iehova emu Dirava ese e henimumu tanona ai.
13 Basio ala-ala.
14 Basio heuda hanai.
15 Basio henao.
16 Dekemu tauna basio habadelaia ko8ikoi.
17 Dekemu tauna ena ruma basio ḡahusia, adavana danu basio ḡahusia, eiava ena hesiai tauna eiava ena hesiai hahinena eiava ena boromakau eiava ena doniki eiava ena kohu ta basio ḡahusi.
18 Taunimanima iboudiai na guba rahurahu bona kevaru bona kibi reḡena bona ororo kwalahuna e kamonai bona e ita negana ai, idia na e gari, kudoudia danu e hetaha. Idia na dauhai e gini,
19 Mose e hereva henia, eto, Oi ba hereva henimai, bena baia kamonai henimu; a Dirava basine hereva henimai, baia mase na garina.
20 Bena Mose ese e hamaorodia, eto, Basio gari; badina be Dirava vada ema, baine dibamui totona, bena ia imatauraina dainai umui na basio kara dika.
21 Bena taunimanima na dounu dauhai e giniva, a Mose ese Dirava e noholaiava dagadagana e raka henia kahi.
22 Bena Iehova ese Mose e hamaoroa, eto, Israel taudia na ini ba hamaorodia toma, baoto: Umui na vada o diba, lau gadogu na guba amo vada ema.
23 Silver diravadia eiava gold diravadia na basio kara.
24 Ihaboulaina patana na tano amo ba larebaia, ia latanai emu boubou ḡaudia, heḡole-oho ḡaudia bona herohemaino ḡaudia, mamoe bona boromakau, ba henigu. Lau ladagu ilalolaina vada na atoa gabudia iboudiai lau baina vasi bona baina henamomu.
25 A ihaboulaina patana na nadi amo boma larebaia, e utu nadidia amo basioma larebaia, badina be iutulaidia aurina ese bema hamirodia.
26 Ina danu: egu ihaboulaina patana na vadavada amo basio dae henia, ḡaḡaemu ai bae itamu na garina.
