Esodo 8:1-32
8 Bena Iehova ese Mose ma e haduaia, eto, Farao dekena aola, ba hamaoroa, baoto “Iehova na ini e gwau tomamu: Egu orea taudia a kahudia nege, baela, bae toma henigu diho;
2 a basio kahudia nege, lau na parapara baina siadia emu tano idoinai bae hadikaia.
3 Sinavai na parapara ai bae honu; bena bae dae emu ruma ai, bona emu mahuta gabuna ai, bona emu mahuta patana ai, bona emu hesiai taudia edia ruma ai, bona emu orea taudia edia ruma ai, bona emu amu lalodiai, bona emu dihu lalodiai.
4 Harihari parapara na oi latamu ai bae dae, bona emu orea taudia latadiai, bona emu hesiai taudia iboudiai latadiai”.
5 Iehova ese Mose ma e hamaoroa, eto, Aaron ba haduaia, baoto “Emu itotohi imamu ai bavabia, ba toia roro sinavai badadia bona maraḡidia bona gohu daediai, parapara ba hadaedia Aigupto tanona idoinai”.
6 Taunabunai, Aaron na imana e toia roro Aigupto ranudia daediai, bena parapara na ranu amo e dae kau, Aigupto tanona e hahonua.
7 A mea taudia na una kara heḡereḡerena ma e kara, edia mea daidiai, parapara ma e hahohodia Aigupto tanona idoinai.
8 Bena Farao ese Mose bona Aaron e boiridia, eto, Iehova ba noia, parapara na lauegu amo bona egu orea taudia edia amo baine abi oho, bena emui orea taudia baina kahudia nege, baela, Iehova bae boua.
9 Bena Mose ese Farao e haere henia, eto, Mani a hereva, edena nega ai baina noinoi oi daimu ai bona emu hesiai taudia daidiai bona emu orea taudia daidiai, bena parapara na umui emui amo bona emui ruma amo bae heabi oho, sinavai ai mo bae noho.
10 Ia eto, Kerukeru. Bena Mose eto, Emu hereva heḡereḡerena baine hekara; bena vada ba diba, Iehova, ai emai Dirava, na asi idaina.
11 Parapara ese oi bae rakatanimu, emu ruma bona emu hesiai taudia bona emu orea taudia danu bae rakatanidia, sinavai ai mo bae noho.
12 Taunabunai, Mose bona Aaron ese Farao e rakatania, e raka lasi. Bena Mose ese Iehova e noia, hari parapara, Farao e hadikalaiava ḡaudia, herevadia e gwaurai.
13 Bena Iehova ese Mose e kamonai henia; bena ruma ai bona ariara ai bona uma ai parapara e mase ore.
14 E haboudia bena vada e bodaga, bonadia na tano idoinai e dae.
15 A Farao ese e itaia, vada e madinamo, bena lalona ma e ha-aukaia, se kamonai henidia, Iehova ese e gwauraia heḡereḡerena.
Hahehisi ihatoina: Namo
16 Bena Iehova ese Mose e hamaoroa, eto, Aaron ba haduaia, baoto “Emu itotohi ba toia roro tano ḡahuna daenai, namo ai bainela, Aigupto tanona idoinai”.
17 Bena unu e kara toma: Aaron ese ena itotohi e abia, tano ḡahuna e botaia, bena namo e kau, taunimanima bona boromakau e koridia; tano ḡahuna idoinai Aigupto tanona ai namo ai ela.
18 Bena mea taudia ese edia mea amo namo e havaradia toho, to ihavaradia asi dibadia. A namo ese taunimanima bona boromakau e koridia.
19 Bena hari mea taudia ese Farao a hamaoroa, eto, Ina na Dirava imana kwakikwakina. A Farao lalona ma e auka, se kamonai henidia, Iehova ese e gwauraia heḡereḡerena.
Hahehisi ihahanina: Lao
20 Bena Iehova ese Mose e hamaoroa, eto, Daba vaburana ai ba tore isi, Farao ba naria, digu bainela negana ai, bena ba hereva henia, baoto “Iehova ini e gwau tomamu: Egu orea taudia a kahudia nege, bae toma henigu diho.
21 Badina be basioma kahudia nege, lau na lao momo baina siaidia, oi latamu ai bona emu hesiai taudia bona emu orea taudia bona emui ruma latadiai bae kau; Aigupto taudia edia ruma bona edia tano be lao ai bae honu.
22 Una negana ai oiemu tano bona Gosen tanona, egu orea taudia edia tano, baina hapararadia; unuseni ai lao basie kau. Unu amo vada ba diba lau be Iehova, tanobada bogaraginai.
23 Lauegu orea taudia bona oiemu orea taudia baina hapararadia: kerukeru ina toa ba itaia”.
24 Bena Iehova na unu e kara toma: lao momo herea e kau, Farao ena ruma ai bona ena hesiai taudia edia ruma ai; Aigupto tanona idoinai vada e dika rohoroho, lao daidiai.
25 Bena Farao ese Mose bona Aaron e boiridia, eto, Aola, ina tano ai emui Dirava ba boua.
26 A Mose eto, Unu baia kara toma na dia maoro; badina be Iehova emai Dirava ibouna ai baia aladia ḡaudia na Aigupto taudia ese e dadaraidiamu ḡaudia, bena idia vairadiai unu baia kara toma, idia ese nadi amo bae hodomai.
27 A baia laolao tano ḡaḡaena ai, dina toi baia raka, Iehova, emai Dirava, baia boua, baine haḡanimai heḡereḡerena.
28 Bena Farao eto, Baina kahumui nege; Iehova, emui Dirava, do ba boua tano ḡaḡaena ai; ḡau tamona dauha basiola, bona lau daigu ai ba ḡuriḡuri.
29 Bena Mose eto, Oi vairamu amo aina raka lasi, Iehova baina noia, ini lao momo be Farao ena amo bona ena hesiai taudia edia amo bona ena orea taudia edia amo kerukeru bae heabi oho. Ḡau tamona, Farao na basine koikoi lou, emai taunimanima na Iehova ibouna baela, basine rudia.
30 Taunabunai Mose na Farao vairana amo e raka lasi, Iehova e ḡuria.
31 Bena Iehova ese Mose ena noinoi heḡereḡerena e karaia: lao momo be Farao ena amo bona hesiai taudia edia amo bona ena orea taudia edia amo e abi oho, ta se miava.
32 A Farao na lalona ma e ha-aukaia lou, Heberu taudia se kahudia nege.
