Esra 8:1-36
8 King Aratasasta ena lohia negana ai lau ida Babulono tanona amo a dae ala taudia edia iduhu kwaradia bona edia uru ladadia bini.
2 Fineha garana amo: Geresom. Itamara garana amo: Daniel. David garana amo: Hatusu;
3 ia be Sekania natuna ta. Paroso garana amo: Sekaria; ia ida tatau sinahu-ta imahui ladadia e hetore.
4 Pahata-moab garana amo: Eliehoenai Serahia, bona tatau sinahu-rua ia ida.
5 Satu garana amo: Sekania lahasiel, bona tatau sinahu-toi ia ida.
6 Adini garana amo: Ebed Ionatan, bona tatau imahui ia ida.
7 Elam garana amo: Iesaia Atalia, bona tatau hitu-ahui ia ida.
8 Sefatia garana amo: Sebadia Mikael, bona tatau taurahani-ahui ia ida.
9 Ioab garana amo: Obadia Iehiele, bona tatau sinahu-rua gwauta-taurahani ia ida.
10 Bani garana amo: Selomiti Iosifia, bona tatau sinahu-ta tauratoi-ahui ia ida.
11 Bebai garana amo: Sekaria Bebai, bona tatau ruahui-taurahani ia ida.
12 Asgada garana amo: Iohanan Hakatan, bona tatau sinahu-ta gwauta ia ida.
13 Adonikama garana amo haida na gabeai ema: Elifelete bona Ieuele bona Semaia, bona tatau tauratoi-ahui idia ida.
14 Bigvai garana amo: Utai bona Sakuru, bona tatau hitu-ahui idia ida.
15 Ahava e aru laomu sinavaina badinai na haboudia, bona dina toi unuseni ai a taruha. Taunimanima bona hahelaḡa taudia na nenedia negana ai, asi tauna ta unuseni ai Levi garana amo.
16 Bena Eliesere, Ariele, Semaia, Elnatan, Iaribi, Elnatan, Natan, Sekaria bona Mesulama, orea igunalaina taudia, bona loiaribi bona Elnatan, lalo-parara taudia, na boiridia;
17 bena na siaidia lao, Ido, gabu ladana Kasifia ikwarana tauna dekenai, bona na hamaorodia, hari Ido bona tadikakana, dubu ena hesiai taudia, ede bae hereva henidia toma, gabu ladana Kasifia ai. Herevana binai: idia ese eda Dirava ena dubu ena hesiai taudia na dekemai ai bae siaidia mai.
18 Bena eda Dirava imana namona na ai latamai ai dainai, idia ese lalo-maoro tauna ta, Mali, Levi Israel natuna, garana ta, e hakaua mai. Una tau ladana na Serebia; ia na natuna bona varavarana ida ema, tatau gwauta-taurahani.
19 Hasabia danu e hakaua mai, bona ia ida Merari garana tauna ta ladana lesaia, bona varavarana mai natudia ida, tatau ruahui.
20 Dubu ena hesiai taudia sinahu-rua ruahui danu e hakaudia mai; unu na David bona ena heitatao taudia ese e gwauraidia, Levi taudia isiaidia bae lao heni. Ini iboudiai na ladadia e hegwaurai.
21 Bena anivaga ta na gwauraia, hari Ahava sinavaina badibadinai, eda Dirava vairanai baia hahemanau bona dala maoromaorona ta iena amo baia tahua, ai emai bona natumai edia bona emai ḡau iboudiai ediai.
22 Badina be hanua pavapavana inoina na hemarai, emai raka dalana ai tuari taudia bona hosi-gui taudia oreana ta ese inaimai edia amo baine gimamai: badina be ai ese hanua pavapavana vada a hamaoroa, ato “Emai Dirava imana na namo, ia e tahuamu taudia iboudiai latadiai, bona ena badu siahuna ese iena amo e raka ohomu taudia na e inai henidiamu”.
23 Taunabunai ai na a anivaga, bona eda Dirava unu a noia toma; bena ia ese emai noinoi e hakala henia.
24 Bena hahelaḡa taudia badadia gwauta-rua na gwauraidia hidi: Serebia bona Hasabia, bona varavaradia gwauta idia ida.
25 Bena silver bona gold bona ḡau idau-idau, hanua pavapavana mai ena hahealo taudia bona ena lohia taudia ida, bona Israel taudia unuseni ai vada e hebou danu, edia herahia ḡaudia vada e heni eda Dirava ena dubu ḡaudia, na hahetoho, na henidia hagau-hagau.
26 Na hahetoho bona idia imadia ai na ato ḡaudia bini: silver talent sinahu-tauratoi imahui, bona silver ḡaudia talent sinahu-ta davana; bona gold talent* sinahu-ta,
27 bona gold kibokibodia, davadia na dariki daha-ta; bona auri labora-labora namo-hereana bona kimore-kimorena, davana na gold davana ida heḡereḡere, ḡaudia rua.
28 Bena na hereva henidia, nato, Umui na hehelaḡa Iehova ena, bona ini ḡau danu hehelaḡa, bona hari silver bona gold na herahia ḡaudia, lalo-namo ai e heni, Iehova, senemui edia Dirava, ena.
29 Ba gimadia bona ba baladia heni, ela bona hahelaḡa taudia badadia bona Levi taudia bona Israel iduhu kwaradia vairadiai ba hahetohodia, Ierusalem ai, Iehova ena dubu daiutudia lalodiai.
30 Taunabunai hahelaḡa taudia bona Levi taudia ese silver bona gold bona ḡau idau-idau metaudia idoinai e abi, eda Dirava ena dubu Ierusalem ai bae laohai totona.
31 Bena hua gini-gunana dinana ihagwauta-ruana ai, ai na Ahava sinavaina amo a raka oho, Ierusalem baiala totona. Eda Dirava imana na latamai ai, bena ia ese inai taudia imadia amo bona dala ai e bani henimai taudia edia amo e hamaurimai.
32 Ai na Ierusalem ai a kau, bena dina toi unuseni ai a noho.
33 Dina ihahanina ai, eda Dirava ena dubu lalonai, hari silver bona gold bona ḡau idau-idau na e hahetohodia, hahelaḡa tauna Meremoto Uria imana ai e atodia. Ia ida be Eleasara Fineha, bona Levi taudia Iosabad Iesua bona Noadia Binui.
34 Iboudiai na e hagaudia bona e hahetohodia, bona iboudiai metaudia e tore.
35 Una negana ai, abi-mauri taudia, edia noho-hedoa amo vada e lou taudia, ese ḡole-oho boubou ḡaudia na e hahelaḡadia, Israel Diravana ena: boromakau mamaruanedia gwauta-rua Israel idoinai dainai, bona mamoe mamaruanedia taurahanita-ahui tauratoi bona mamoe natudia hitu-ahui hitu; bona nani mamaruanedia gwauta-rua danu, kara dika boubouna ḡaudia. Ina idoinai na ḡole-oho boubouna Iehova ena.
36 Idia ese hanua pavapavana ena hahedua pepadia na hanua pavapavana ena tuari biagudia bona Sinavai Badana inikahana basileiana lohiadia e henidia; bena idia ese taunimanima bona Dirava ena dubu e durudia.
Footnotes
^ Ini gold bona silver ḡaudia iboudiai davadia na readia K1,900,000 sisivana, ita eda moni ai.
