Heberu 7:1-28
7 Hari Melkisedek na Salem pavapavana bona Herea Mikamika Diravana ena hahelaḡa tauna. Ia na Abraham ida e hedavari, Abraham ese hanua pavapavadia iala-masedia amo e lou negana ai, bena e hanamoa.
2 Abraham ese danu kohu e karoa, karoa gwauta, bena karoa ta ia e henia. Ia ladana gunana anina be Kara Maoromaoro Lohiana. Ma ladana ta Salema Pavapavana, anina be Maino Lohiana.
3 Ia na asi tamana, asi sinana, asi iduhuna, asi ena vara dinana, asi ena mauri dokona; a Dirava Natuna ihaḡoina ai vada e halaoa, hahelaḡa tauna, e noho hanaihanaimu.
4 Una tau ba haeroa, ede e herea tomava. Seneda Abraham ese tuari ai e abi kohudia e karoadia, karoa ihagwautana e henia.
5 Momokani, Levi natuna haida ese danu hahelaḡa dagina e abia, bena mai siahudia ida taunimanima edia kohu e karoadia, karoa ihagwautadia bae abi, taravatu heḡereḡerena. Ena be varavaradia, Abraham besena taudia, to e abi.
6 A ia, ena be dia idia edia iduhu tauna, to Abraham ena kohu karoana ihagwautana e abia, bona Dirava ese e gwau hamata henia tauna na ia ese e hahenamo henia.
7 A dibada vaitani, dagi maraḡina tauna na dagi badana tauna ese e hahenamo heniamu.
8 Harihari, bae mase taudia ese kohu e karoadiamu, karoa ihagwautadia e abimu; a una negana ai, sivaraina e piuamu doini e maurimu e tomamu tauna ese e abiva.
9 Bona e kara Levi, karoa ihagwautadia iabidia tauna, ese danu ena kohu karoana ihagwautana e henia na heto, Abraham dainai;
10 badina be ia na tamana tau-anina ai, Melkisedek na tamana ida e hedavari negana ai.
11 Eda bese taudia ese Levi iduhuna hahelaḡa taudia edia amo taravatu e abia; ḡau tamona hahenamo ḡoeva-daena na idia edia amo bema vara, hahelaḡa tauna idauna ta, dia Aaron ena iduhu tauna a Melkisedek ena orea tauna, bema gini anina be dahaka?
12 Badina be hahelaḡa taudia bae idau, taravatu danu baine idau.
13 Badina be ini e herevalaia tomamu tauna na ena iduhu na idau; bona iena iduhu tauna ta ese pata helaḡana ḡaukaradia do se kara.
14 Badina be tame diba eda Lohiabada be Iuda iduhuna amo e vara, a Mose ese hahelaḡa taudia haida una iduhu ai se gwauraidia.
15 Ina na tame diba ḡoevaḡoeva, badina be hahelaḡa tauna idauna ta vada e vara, Melkisedek ihaḡoina;
16 ena dagi danu vada e henia, dia tau-anina taravatuna ibadinana totona, a mauri hanaihanai siahuna ai.
17 Badina be ini e gwauraia tomamu:
Oi na hahelaḡa tauna, o noho hanaihanaimu,Melkisedek ena orea taumu.
18 Benaini, taravatu gunana vada eme heabi oho, badina be ia na manoka-manoka bona asi anina,
19 bona ḡau ta se haḡuḡurua. A helaro matamatana bona namo-hereana ese ia gabuna vada eme abia: unu amo Dirava ta raka henia kahimu.
20 Bona ina na mai gwauhamata helaḡana.
21 Idia na hahelaḡa taudia ai e halaodiava na asi edia gwauhamata, a ia na mai gwauhamatana ida hahelaḡa tauna ai e halaoa. E gwau hamata Diravana ese e hereva henia, eto,
Lohiabada na vada e gwau hamata vaitani,Lalona danu basine ha-idaua;E tomu “Oi na hahelaḡa tauna,O noho hanaihanaimu”.
22 Taunabunai, Iesu na herohemaino matamatana ihamomokanina.
23 Ina danu: unu hahelaḡa taudia na hutuma, badina be mase ese e butudia taova, edia dagi ai basie noho hanaihanai;
24 a ina hahelaḡa tauna na e noho hanaihanaimu, asi ibolona.
25 Badina bunai ia na mai goadana, ia bagunai Diravana e raka henia kahimu taudia baine hamauridia ḡuḡuru, badina be e noho hanaihanaimu, bona ita daidai e noinoi hanaihanaimu.
26 Hahelaḡa tauna badana unuhetomana vada e namo ita eda: helaḡa tauna, asi ena dika, asi bebeka-bebekana, asi ahuna kara dika taudia ediai, guba doriva-dorivana ai vada e dae.
27 Ia na dia unu hahelaḡa taudia badadia na heheto: idia ese daba iboudiai boubou ḡaudia e hahelaḡadiava, guna idia sibodia edia dika irohodia, gabe amo hanua taudia edia dika irohodia. A ia ese nega tamona boubou ḡauna e hahelaḡaia vaitani, ia sibona boubou ḡauna ai e hahelao negana ai.
28 Badina be taravatu ese manoka-manoka taudia na hahelaḡa taudia ai e halaodiava; a gwauhamata herevana, taravatu e gabelaia ḡauna, ese Natuna na hahelaḡa tauna badana ai vada e halaoa. Ia eme ḡoeva dae ela bona hanaihanai.
