Hereva Lada-isidia 21:1-31
21 Hanua pavapavana lalona na sinavai na heto, Iehova imana ai;ena ura gabuna e ha-arua laomu.
2 Tau ta ena dala iboudiai na mamaoro-mamaoro ena ita-ita ai;a Iehova ese ia lalona e dibaiamu.
3 Kara maoromaoro bona hahemaoro ḡoevaḡoeva na Iehova ese e abidia dae badamu,a boubou ḡaudia na e abidia dae maraḡimu.
4 Heaḡi matadia bona hekokoroku lalona,kara dika taudia edia lamepa, unu na didika.
5 Ḡaukara malaka-malaka tauna ena lalo-hadai ese anidia e havara badamu,a lalo-haraḡa taudia iboudiai na bae dabu.
6 Koikoi malana amo e abimu kohudia naninoa lai ese e odaia ohomu na heto; una na mase idoana.
7 Kara dika taudia na edia daḡedaḡe ese baine darodia oho,badina be kara maoromaoro ikarana asie uramu.
8 Kerere tauna ena dala na gageva-gageva,a lalo-ḡoevaḡoeva tauna ena kara na maoromaoro.
9 Tau ta abikau ai baine noho be namo;a hereva momo hahinena ida ruma ai bae noho bou na dika.
10 Kara dika tauna laumana ese dika e ura heniamu,bona dekena tauna se bogaia hisimu.
11 Ḡonaḡona tauna matana e hakaniamu negana ai,lalo-duhu tauna lalona e heaonegamu;aonega tauna e hadibaiamu negana ai,ena lalo-parara e habadamu.
12 Kara maoromaoro tauna ese kara dika tauna ena ruma e itaia taomu;kara dika taudia na e hahebua tarimu.
13 Ogoḡami taudia edia taitai se hakala henimu tauna nasibona baine tai lolololo a ta basine kamonai.
14 Herahia ḡauna e heni hehunimu ese badu e laoa ahumu;bona koikoi henitaona e heni hehunimu ese badu aukana e hamanokaiamu.
15 Hahemaoro ḡoevaḡoevana ese kara maoromaoro taudia na e hamoalediamu,a kara dika taudia na kudoudia e hahetahadiamu.
16 Lalo-parara dalana amo e raka ohomu tauna esemase taudia edia hebou ai baine noho.
17 Moale-kava e ura heniamu tauna na baine ogoḡami;bona vine ranuna bona dehoro e ura henidiamu tauna na basine taḡa.
18 Kara dika tauna na kara maoromaoro tauna ibodohilaina,bona kara koikoi tauna ese kara momokani tauna e bodohiamu.
19 Tau ta tano ḡaḡaena ai baine noho be namo,a e hereva momomu bona e maumaumu hahinena ida baine noho na dika.
20 Kohu namo-hereadia bona dehoro na aonega tauna ena ruma ai mimia,a kavakava tauna ese e ha-orediamu.
21 Kara maoromaoro bona hebogahisi e ḡavamu tauna esemauri bona kara maoromaoro bona heimodai e davarimu.
22 Aonega tauna ese goada taudia edia hanua maḡuna amo e dada daemu;bona edia ruma aukana, e abidadama heniamu ḡauna, e ḡiḡia dobimu.
23 Uduna bona malana e naridiamu tauna nahekwakwanai amo e roho maurimu.
24 Heaḡi bona hekokoroku tauna na “ḡonaḡona tauna” e gwauraiamu;ia na e kara heaḡi-heaḡimu.
25 Lahedo tauna ena ura ese e hamaseamu,badina be ia imana na se uramu ḡaukara.
26 Dina idoinai kara dika tauna na e heḡahusimu,a kara maoromaoro tauna ese ḡau e henimu, se rumu.
27 Kara dika tauna ena boubou ḡauna na dika rohoroho,a mai ena lalo-hadai dikana ida e mailaiamu negana ai ena dika na bada herea.
28 Gwaurai-hedinarai koikoi tauna na baine mase,a kamonai tauna ena hereva do baine hesiriu.
29 Kara dika tauna ese vairana e ha-aukaiamu;a kara maoromaoro tauna ese ena dala e haerodiamu.
30 Asi aonega ta, asi lalo-parara ta, asi lalo-hadai ta eseIehova baine laoa ahu diba.
31 Hosi e heḡaeḡaelaiamu, tuari dinana inanatalaina;a kwalimu na Iehova enai.
