Hereva Lada-isidia 29:1-27
29 E sisiba henia momomu to aiona e ha-aukaiamu tauna na baine dika taku,asi ihanamona dalana ta.
2 Kara maoromaoro taudia e lohiamu negadia ai na taunimanima e moalemu;a kara dika taudia e lohiamu negadia ai na taunimanima e ḡanaḡanamu.
3 Aonega e ura heniamu tauna ese tamana e hamoaleamu,a ariara hahinedia ida e heboumu tauna ese ena kohu e hapetapetalaiamu.
4 Hahemaoro ḡoevaḡoeva amo hanua pavapavana ese basileia e haginia tutuka-tutukamu,a harihari ḡaudia igwaurai-bagubagudia amo e havahuamu.
5 Dekena tauna e hanamoa koikoimu tauna ese huo e otoamu,ia sibona ihatoalaina.
6 Kara dika tauna na ena kara dika ese e idoaiamu,a kara maoromaoro tauna na ane e abimu bona e moale hisi daemu.
7 Kara maoromaoro tauna na ogoḡami taudia ahudia korikori mai dibana,a kara dika tauna na lalo-parara unuhetomana asi dibana.
8 Heḡonaḡonalai taudia ese hanua e ha-araiamu,a aonega taudia ese badu e laoa ahumu.
9 Aonega tauna na kavakava tauna ida bema hepapahuahu negana ai,kavakava tauna na e badumu bona e kirimu mo, a asie mainomu.
10 Rara ihahebubuna e uramu taudia ese asi ena kerere tauna e inai heniamu,a kara maoromaoro taudia ese ia ihamaurina dalana e tahuamu.
11 Kavakava tauna ese ena badu e halasiamu,a aonega tauna na badu ai e haheaukamu.
12 Pavapava ese hereva koikoidia bema abidia dae negana ai,ia henuna taudia iboudiai na bae kara dika.
13 Ogoḡami tauna bona ia e hahisiamu tauna raruosi e hevaira hehenimu,bena Iehova ese raruosi matadia e hadiaridiamu.
14 Pavapava ese ogoḡami taudia bema hahemaoro henidia mai maoromaorona ida;ena terono baine gini hanaihanai.
15 Hekwadi auna bona sisiba herevadia ese aonega e havaraiamu,a sibona ena ura e karamu merona ese sinana e hahemaraiamu.
16 Kara dika taudia e lohiamu negadia ai na kara havara e bada e laomu,a kara maoromaoro taudia ese edia moru bae itaia.
17 Natumu matana ba hakania, bena ia ese laḡa-ani baine henimu,bona lalomu do baine hamoalea.
18 Lalo-diari lasi negana ai, taunimanima e kara havaramu,a taravatu e badinaiamu tauna na namo.
19 Hesiai tauna na hereva amo mo matana se hakaniamu;badina be lalona e pararamu, a nahuana se tohoamu.
20 Hereva takutaku tauna ta o itaiamu a?
Kavakava tauna na reana baine namo, a una tau basine namo diba.
21 Ena hesiai tauna na merona ai e haḡabuḡabua tauna nadokona ai baine hekwarahi ia dainai.
22 Badu tauna ese heiri-heiri e havaraiamu,bona badu momo tauna ese kara dika momo e havaramu.
23 Tau ta ena hekokoroku ese baine hahekwakwanaia,a manau tauna na bae imodaia.
24 Henao tauna bamona ese sibona ena mauri e inai heniamu;heuduguirai herevana e kamonaimu, to dibana ḡaudia se herevalaidiamu.
25 Taunimanima igari-henidia ese idoa e atoamu,a Iehova e abidadama heniamu tauna na basine dika.
26 Hutuma ese pavapava ena lalo-namo e tahuamu,a Iehova enai tau ta ese hahemaoro ḡoevaḡoeva e abiamu.
27 Kara gageva-gageva tauna na kara maoromaoro taudia ese e inai henia badamu,a dala maoromaoro ai e rakamu tauna na kara dika taudia ese e inai henia badamu.
