Ieremia 39:1-18
39 Sedekia, Iuda pavapavana, ena lohia laḡanina ihataurahani-tana huana ihagwautana lalonai, Nebukadresara, Babulono pavapavana, bona ena tuari oreana idoinai ese Ierusalem e daea bona e koua heḡeḡe;
2 bena Sedekia ena lohia laḡanina ihagwauta-tana huana ihahanina dinana ihataurahani-tana ai, hanua maḡuna e gwadaia uru.
3 Ierusalem e abia negana ai, Babulono pavapavana ena lohia taudia iboudiai ema, bogaragi ikoukouna ai e helai: Neregala-saresere, Samagara-nebo, Sarasekimi (ena dagi be Rabsarisi), Neregalasaresere (ena dagi be Rabmaga), bona Babulono pavapavana ena tuari lohiadia oredia iboudiai.
4 Sedekia, Iuda pavapavana, bona tuari taudia iboudiai ese e itadia negana ai, idia na e heau; hanuaboi ai hanua e rakatania pavapava ena uma-uma bogaragina amo, bena maḡu ruaosi padadia ikoukouna amo e raka lasi, Araba dalana ai ela.
5 A Kaldea tuari oreana ese e hahavadia; bena idia ese Sedekia e lasia tao Ieriko taoradia ai. E abia mauri, bena Nebukadresara, Babulono pavapavana, dekena e laohaia, Ribla ai, Hamat tanona ai; bena ia ese ena kerere ahuna e gwauraia.
6 Bena Babulono pavapavana ese Sedekia natuna mamaruanedia na ia vairanai e aladia mase, Ribla ai; Babulono pavapavana ese danu Iuda lohiadia iboudiai e aladia mase.
7 Bena ia ese Sedekia matana e hakepuludia, bona auri gadeadia ai e ḡuia, Babulono baine laohaia totona.
8 Kaldea taudia ese pavapava ena ruma e doua, bona taunimanima edia ruma danu e dou, bona Ierusalem maḡuna e ḡiḡia dobi.
9 Bena Nebusaradana, hegima oreana biaguna, ese taunimanima oredia dounu hanua ai nonoho na e laohaidia, Babulono ai e hanohodia, ienai e hanai taudia bona taunimanima oredia danu.
10 Nebusaradana, hegima oreana biaguna, ese ogoḡami taudia haida, asi edia kohu taudia, na Iuda tanona ai e rakatanidia, bona una negana ai vine imeadia bona biru tanodia e henidia.
Nebukadresara ese Ieremia e bogaia hisi
11 Nebukadresara, Babulono pavapavana, na Nebusaradana, hegima oreana biaguna, ena amo e haheḡani, Ieremia dainai, eto,
12 Avabia, ba naria namonamo, basio hadikaia, a ia ese baine hamaorolaimui heḡereḡerena ai ba kara henia.
13 Taunabunai, Nebusaradana, hegima oreana biaguna, bona Nebusasabana, Rabsarisi tauna, bona Neregala-saresere, Rabmaga tauna, bona Babulono pavapavana ena tuari lohiadia badadia iboudiai na
14 e hesiai, Ieremia na hegima taudia edia maḡu amo e abia. Idia ese Gedalia, Ahikama Safana natuna, imana ai e atoa, iena ruma baine laohaia totona. Taunabunai ia na taunimanima bogaragidiai e nohova.
Iehova ese Ebede-melek e hanamoa
15 Ieremia na hegima taudia edia maḡu ai e hekouva negana ai, Iehova ena hereva na ienai e kau, eto,
16 Aola, Ebede-melek, tau Etiopia, ba hamaoroa, baoto, Iehova Sabaota, Israel Diravana, na ini e gwau tomamu: A itaia, egu hereva baina hamomokanidia, ina hanua ihadikana ai, baina hadikaia, basina hanamoa. Una dina ai egu hereva anidia do bae vara oi vairamu ai.
17 A Iehova na e tomu: Una dina ai lau ese baina hamaurimu, o gari henidiamu taudia imadia ai basio heato.
18 Badina be momokani lau ese baina hamaurimu, dare ai basio mase; a emu mauri bavabia, kwalimu ahuna ai bainela, badina be lau vada o abidadama henigu. Iehova na e herevamu.
