Iobu 23:1-17
23 Bena Iobu na e haere, eto:
2 Hari dina ai na maumaumu mai lalo-iditagu ida;ena be na ḡanaḡanamu, to ia imana na metau lau latagu ai.
3 Bama diba edeseni ai ia bama davaria,bena ena helai gabuna bama raka henia kahi;
4 bena lau sibogu herevagu bama herevalai henia,udugu na idurulaigu herevadia ai bema honu;
5 bama diba ede bema haere henigu toma,bona dahaka bema gwaurai henigu negana ai na lalogu bema parara.
6 Ia ese ena siahu hereana amo bema lodu henigu a?Lasi; bema kamonai henigu.
7 Unuseni ai kara maoromaoro tauna na bema hereva henia diba,bona ihahemaoro-henigu tauna ese maorogu bema gwauraia vaitani.
8 A itaia, vairagu kahana na raka laomu, to ia na lasihia;murigu kahana na raka loumu, to asina itaia davarimu;
9 laurigu kahana ai na tahuamu, to asina itaiamu;idibagu kahana ai na raka sirimu, to asina mataia davarimu.
10 A ia na egu lao dalana dibana;ia ese vada baine haḡoevagu murinai lau na gold heḡereḡerena ai baina raka lasi.
11 Lau aegu na ia aena gabudia vada e taodia;iena dala vada na badinaia, asina raka siri.
12 Ia uduna bibinadia haheḡanidia na asina rakatanidia;ia uduna herevadia na lalogu ai vada na baladia heni.
13 A ia na se idaumu. Daika ese baine ha-idaua?Dahaka e uramu, una na baine karaia.
14 Egu ai vada e gwaurai hidi ḡaudia na baine haḡuḡurudia;bona ḡau unuhetomadia momo na ia lalona ai mimia.
15 Taunabunai, ia vairanai na gari dikadikamu;na haeroamu, bena na gari henia badamu.
16 Dirava ese lalogu vada e hamanokaia herea;Siahu-idoinai Diravana ese vada e halalaḡagu;
17 badina be dibura ese e ḡeḡegu daemu,bona dibura badana ese vairagu e ḡovaia ahumu.
