Isaia 23:1-18
23 Maduna metauna Turo latanai:
Tarasisi lagatoidia e, ba taitai;badina be Turo vada e havahua,asi rumana bona asi hetu gabuna.
Kupro tanona amovada e hahedinarai henidia.
2 Kone taumui e, eremui!
Sidono hoihoi taumui e, eremui!
Emui gwaukau taudia na gadobada e hanaia,
3 davara idau-idau momo ai e laolao;emui habou-habou ḡaudia na Sihoro uitina,bona Nilo tanona anianidia;umui na bese idau-idau edia hoihoi taudia.
4 Sidono e, ba hemarai; badina be davara vada e hereva,davara ena gabu aukana vada e hereva, eto:Asina hekamonai, bona asina mara;uhau asina ubudia bona ulato rami-heboudia asina reḡudia.
5 Ina hari na Aigupto ai baine kau negana ai,lalodia bae hisihisi herea, Turo harina dainai.
6 Tarasisi enai ba hanai;kone taumui e, ba taitai!
7 O moalelaia hisi dae hanuana,nega gunadia ai e hadaia hanuana,aena amo ela bona gabu daudau ai ma e nohohanuana binai a?
8 Turo, havava ḡaudia ihenidia hanuana;ena kohu-hoi taudia na lolohia,ena hoihoi taudia na tanobada ese e heatolaidiamu;daika ese ia ihadikana na ini e lalo hadailaia tomamu?
9 Iehova Sabaota ese e lalo hadailaia,e heaḡilaiamu hairaina idoinai baine hamiroa totona,tanobada ai e matauraidiamu taudia iboudiai baine hahemaraidia totona.
10 Tarasisi hahinemu e,emu tano ba da’ania, Nilo sinavaina na heto;asi ilao-ahumu dalana ta mia.
11 Ia ese imana vada e toia roro, davara daenai;basileia vada e haheude-heudedia.Iehova vada e haheḡani Kanaan dainai,ena gabu aukadia bae habuadia tari.
12 Ia eto: Sidono hane-ulato rami-hebouna e,e hahisimumu kekenimu e,basio moale hisi dae lou.A tore isi, Kupro enai ba hanai,a unuseni ai danu basio laḡa ani diba.
13 Kaldea tanona a itaia; besena bunai, dia Asuria. Turo na uda boromadia edia gabu ai bae halaoa eto. Idia ese tano na hanuana e lareba henia; ena lohia rumadia e haheḡiḡidia dobi, bona hanuana e habuaia tari.
14 Tarasisi lagatoidia e, a taitai;badina be emu gabu aukana vada e havahua.
15 Una dina ai, Turo na bae laloa boio ela bona laḡani hitu-ahui bae ore, hanua pavapavana ta ena nega heḡereḡerena. Bena laḡani hitu-ahui dokona ai, kara ta Turo enai baine vara, ariara hahinena anena lalonai na heto:
16 Ariara hahinemu e,vada e lalomu boio.
Gitara avabia,hanua lalonai ba loa eva-eva;ba hataia gaiho-gaiho,ane momo bavabi,bae lalomu tao helaoreana.
17 Laḡani hitu-ahui dokona ai, Iehova ese Turo baine vadivadi henia, bena ena hehoi-nege karana baine lou henia, bona basileia iboudiai tanobada kopina ai ediai baine hehoi nege.
18 Ena hoihoi ḡaudia bona davana na baine hahelaḡadia, Iehova ena; basine haboudia bona basine gogosidia; a ena hoihoi ḡaudia ese Iehova vairanai e nohomu taudia na bae ubudia bona bae hadabua-laidia aniani momo bona dabua namo-hereadia danu.
