Isaia 45:1-25
45 Iehova ena hereva, e horoa tauna Kurese enai;ia imana idibana vada na kahua tao,bese idau-idau na ia vairanai baina hadarerediabona pavapava baina hamanokadia totona,iduara na ia vairanai baina kehodiabona ikoukou na basie hekou helaoreana.
2 Lau na oi vairamu ai bainala,ororo baina hahedagadia maoro;auri labora-labora iduaradia baina hamakohidia rohoroho,bona auri baina utudia parara.
3 Dibura gabudia kohudia baina henimu,bona gabu hehunidia ai e habou ḡaudia;bena ba diba lau Iehova, Israel Diravana, eseoi ladamu vada na hatoa.
4 Egu hesiai tauna Iakob,egu abi-hidi tauna Israel, dainai,oi ladamu na hatoamu;ena be asi dibamu lau,to ladamu ta na hahenemailaimu.
5 Lau binai Iehova, idauna ta na lasi;asi dirava ta, lau mo sibogu.
Ena be asi dibamu lau,to lau ese na hagoadamumu;
6 bena dina-dae kahana amo bona dina-diho kahana amo,taunimanima na bae diba idauna ta na lasi;lau binai Iehova, idauna ta na lasi.
7 Diari na karaiamu, bona dibura na havaraiamu;namo na karaiamu, bona dika na havaraiamu;lau na Iehova, ini ḡau iboudiai na karamu.
Iehova, ḡau iboudiai ihavaradia
8 Guba e, kara maoromaoro ba hadihoa;guba amo baine diho, medu na heto.
Tanobada baine parara, hahemauri baine tubu dae totona;kara maoromaoro danu baine hatubua dae;lau Iehova ese vada na havaraia.
9 Ia ikarana Diravana e heai heniamu tauna, madi ihabaina;ia na uro ikarana tauna e heai heniamu urona na heto!Raro ese iḡaukaralaina tauna e gwau heniamu a?E tomu “Dahaka o karamu?” eiava “O karaiamu ḡauna na asi imana” a?
10 Tama ta e hamaoroamu, e tomu “Dahaka o havaraiamu?”
eiava hahine ta e hamaoroamu, e tomu “Dahaka ḡau na bogamu ai?”
tauna na madi ihabaina!
11 Iehova, Israel ena Helaḡa Diravana bona Ikarana Diravana,ini e gwau tomamu: Ba nanadaigu natugu daidiai,eiava ba haḡanigu imagu ese e kara ḡaudia daidiai, a?
12 Lau ese tanobada na karaia,bona taunimanima na havaradia ia latanai;lau imagu ese guba e idia roro,bona ena orea iboudiai na haḡanidia.
13 Lau ese kara maoromaoro ai vada na hatorea isi,bona ena dala iboudiai baina hamaoromaorodia;ia ese egu hanua badana baine haginia,bona dauhai na hanohodia tao taudia baine ruhadia nege,dia dava dainai eiava hahenamo ihalouna dainai;Iehova Sabaota na unu e gwau tomamu.
14 Iehova na ini e gwau tomamu:Aigupto ena taḡa bona Etiopia ena hoihoi ḡaudia, bona Sabea taudia, taunimanima ḡaulatalatadia,na oiemu ai bae hanai, oiemu taunimanima ai baela, oi murimu ai bae raka;mai gadeadia ida emu ai bae hanai,bona bae toma henimu diho.
Bae noi henimu, baeto:
Dirava na oi mo ida, idauna ta na lasi;asi dirava ta, ia mo sibona.
15 Momokani, oi na o noho hehunimu Diravana;Israel Diravana, Hahemauri Diravana.
16 Idia iboudiai na bae hemarai bona bae baia;kaivakuku ikaradia taudia na mai lalo-heḡonudia ida e raka heboumu.
17 A Israel na Iehova ese vada e hamauria,vada e hamauria hanaihanai;oi na basio hemarai bona basio baia,ela bona hanaihanai.
18 Badina be Iehova, guba ikarana Diravana, ini e gwau tomamu.
Ia na Dirava; ia ese tanobada e hadaia bona oromana e henia,bona e haginia tutuka-tutuka;ia ese se karaia ḡau asi oromana,a haida ese bae noholaia totona e karaia.
Ia na e tomu: Lau na Iehova; idauna ta na lasi.
19 Lau asina hereva hehuni dibura tanona ai;Iakob garana asina hamaorodia, asinato“Gabu asi oromana ai ba tahugu”.
Lau Iehova na hereva momokanimu;hereva maoromaorona na gwauraiamu.
Babulono Kaivakukudia
20 Basileia kwabukwabumui e, a hegogo mai;ba raka kahi hebou.
Edia au kaivakukudia e loalaidiamu taudia na asi aonegadia;ihamauridia asi dibana diravana na idia ese e ḡuria louloumu.
21 Emui gini-kau herevana ba gwauraia hedinarai;idia ese bae henegalaia hebou.Ina na daika ese nega gunana ai e gwauraia?Daika ese idau nega ai e gwauraia hedinarai?Lau Iehova, ani?
Asi dirava idauna ta, lau mo sibogu;Kara Maoromaoro Diravana, Hahemauri Diravana,idauna ta na lasi.
22 Tanobada dokodia iboumui ai,lau ba haḡeregu, bena ba mauri;badina be lau na Dirava, idauna ta na lasi.
23 Lau sibogu daigu ai vada na gwau hamata;basine lou herevana na kara maoromaoro ai lau udugu amo vada e lasi,e tomu “Lau vairagu ai tui iboudiai bae hadai,bona mala iboudiai bae gwau hamata”.
24 Bae herevalaigu, baeto:
Kara maoromaoro bona goada na Iehova mo enai;e badu heniamu taudia iboudiai naia dekena baema, bena bae hemarai.
25 Israel garana iboudiai na Iehova bagunai bae kwalimu,bona ia bae imodaia.