Isaia 63:1-19
63 Una na daika Edom amo e maimu?
Daika mai dabuana kakakakana ida Bosra amo e maimu?
Mai dabuana herea-daedia bona mai goada bada-hereana idae rakamu tauna be daika?
Tauna na lau, igwaurai-maorona na gwauraimu;mai siahugu ida baina hahemauri.
2 Dahaka dainai emu dabua na kakakaka,bona emu hahedoki na vine huahuadia e moimoilaimu tauna ena dabua heḡereḡeredia?
3 Sibogu vine huahuadia vada na moimoilai;asi tauna ta lau ida, bese idau-idau edia amo.Egu badu ai na moimoilaidia,egu badu ḡaraḡara ai na moidia tao;edia mauri raradia ese egu hahedoki vada e nevaridia,egu dabua iboudiai vada na hamirodia.
4 Badina be dika davana ikarana dinana na lalogu ai e miava,bona egu raua-raua laḡanina vada e kau.
5 Lau na roha lao, to asi idurugu ta;daragu e doko, to asi imudagu ta;taunabunai, sibogu imagu amo kwalimu na abia,bona egu badu ḡaraḡara ese e imudagu.
6 Egu badu ai bese idau-idau na moidia tari,egu badu ḡaraḡara amo na hakekerodia,bona edia mauri raradia na tano ai na hahebubudia.
Iehova ena hahenamo Israel enai
7 Iehova ena hebogahisi baina herevalaia,bona Iehova i’imodaina danu,Iehova ese vada e henida ḡaudia iboudiai heḡereḡeredia,bona Israel besena ihanamodia karadia badadia danu,ia ese vada e henidia ena hebogahisi heḡereḡerena,ena lalokau bada-hereana heḡereḡerena.
8 Badina be ia eto “Momokani idia na lauegu bese,lau natugu, basie kara koikoi”;bena ia na Ihamauridia Diravana ai ela,
9 edia hisihisi iboudiai ia ese e hisihisilai,bona ia vairana amo ema aneruna ese e hamauridia;ena lalokau bona ena hebogahisi ai ia ese e rauadia,nega gunadia iboudiai lalodiai ia ese e abidia isi bona e dosidia.
10 A idia na e daḡedaḡe,bona iena Lauma helaḡana e hahisihisia;taunabunai, ia na e kerehai,adia inai tauna ai ela,ia sibona ese e tuari henidia.
11 Bena ia ese nega gunadia e helalolai une,ena hesiai tauna Mose negana.Ena mamoe serina ireḡuna tauna nadavara lalona amo e hakaua dae Diravana be edeseni ai?
Ena Lauma helaḡana idia bogaragidiai e atoa,
12 bona ia imana herea-daena ese Mose imana idibana e bamoava,bona vairadiai ranu e hapararadia,mia-hanaihanai ladana ta sibona baine abia totona,
13 bona dobu gabudia amo e hakaudia hanai,Diravana be edeseni ai?
Hosi tano ḡaḡaena ai na heto,idia na asie hetutuhi;
14 boromakau koura ai e hekei dihomu na heheto,Iehova ena Lauma ese laḡadia e ha-ani.
Taunabunai oi ese emu bese taudia o hakaudia,lada herea-daena sibomu bavabia totona.
Hebogahisi bona Hekaha inoilaina
15 Guba amo ba roha dobi,emu noho gabuna helaḡana bona herea-daena amo ba itaia.Goadamu bona siahumu be edeseni ai?
Emu lalokau bona emu hebogahisi na lauegu amo vada o rua.
16 Badina be oi na ai Tamamai;ena be Abraham asi dibana ai,bona Israel ese besena ai se halaomaimu,to oi Iehova na ai Tamamai;oi ladamu na ai Irauamai,nega gunadia amo.
17 Iehova e, dahaka dainai emu dala ai o hakereremaimu,bona lalomai o ha-aukadiamu, bena asia gari henimumu?Emu hesiai taudia, oi dihimu besena,daidiai ba lou mai.
18 Nega taina emu bese helaḡana ese emu gabu helaḡana e noholaia;a inaimai ese vada e moia tari.
19 Ai na nega ta so lohiadia taudia heḡereḡeredia ai vada ala,oi ladamu asie henemailai taudia heḡereḡeredia ai.