Kolose 4:1-18
4 Biagu e, kara maoromaoro ai bona kara namo ai emui hesiai memerodia ba kara henidia; ba diba, umui danu mai Biagumui guba ai.
2 Ba ḡuriḡuri goada, basio hadokoa; ba ḡuriḡuri dudukau, Dirava ba hanamoa.
3 Dirava ba noia emai ai, ia ese iduara ta baine kehoa emai, Keriso herevana hehunina baia harorolaia. Ina iḡui ai na nohomu badina bunai.
4 Taunabunai do baina gwauraia hedinarai; e henigu ḡaukarana binai.
5 Murimuri taudia vairadiai ba raka mai aonegamui ida; nega emui ai mia na ba ḡaukaralaia namonamo.
6 Nega idoinai ba hereva mai gado-namomui ida; emui hereva na damena ai ba damenaia. Bena taunimanima ta ta ba haere henidia mai dibamui ida.
Hahetoni herevadia
7 Sivaraigu idoinai Tukiko ese baine hamaorolaimui. Ia na varavaragu, egu lalokau; ia danu hesiai tauna namona ta, ai raruosi ese Lohiabada isiaina a lao heni heboumu.
8 Na siaia vasimu badina binai: ai sivaraimai baine hamaorolaimui, bena lalomui baine hakeru.
9 Onesimo danu ia ida na siaidia vasimu; ia danu varavarada namona ta, ai emai lalokau bona umui bamomui. Idia ese iniseni ai e varamu karadia iboudiai bae hadibalaimui.
10 Aristako, lau bamogu dibura rumana ai, bona Banaba tadina Mareko, raruosi ese e hahenamo henimuimu. Mareko dainai hahedua vada o abia: bema vasi, boma abia dae.
11 Iesu, ladana ta be Iusto, ese danu e hahenamo henimuimu. Peritome taudia na idia tatoiosi mo sibodia lau ida a ḡaukara heboumu, Dirava ena basileia iharorolaina ai; idia ese danu lalogu vada eme hakerua.
12 Bamomui Epafra, Keriso Iesu ena hesiai tauna, ese e hahenamo henimuimu. Nega idoinai umui daimui ai e ḡuriḡurimu, e noinoimu, ba gini tutuka-tutuka, ba namo ḡuḡuru, bona Dirava ena ura ba diba ḡoeva.
13 Na hamaoromui momokanimu, ia na e hekwarahi bada, umui daimui ai, bona Laodikea taudia daidiai, bona Hieropoli taudia daidiai.
14 Egu lalokau Luka, muramura tauna, bona Dema, raruosi ese e hahenamo henimuimu.
15 Varavarada Laodikea ai ba hanamodia. Numufa, bona ekalesia oreana iena ruma ai e heboumu, danu ba hanamodia.
16 Ina revareva na bogaragimui ai ba duahia murinai Laodikea hebouna ai danu bae duahia. Bona Laodikea taudia edia revareva na umui danu ba duahia.
17 Akipo ba hamaoroa, ia ese hesiai ḡaukarana, Lohiabada enai e abia, na nahuana baine tohoa, karana baine karaia ḡuḡuru.
18 Ina hahenamo na lau Paulo imagu amo na toreamu. Ba laloa tao, lau na iḡui ai na nohomu. Harihari-bada na dekemui ai baine mia.
