Levitiko 8:1-36
8 Iehova ese Mose e haduaia, eto,
2 Aaron mai natuna ida bavabidia, dabua helaḡadia bona dehoro helaḡana bona kara-rea boromakauna bona mamoe mamaruanedia ruaosi bona asie hatubua flaoana boseana danu bavabi.
3 Bena taunimanima iboudiai na hebou kalagana iduarana badinai bae hebou.
4 Bena Mose na Iehova ena hahedua heḡereḡerena e karaia, bona taunimanima iboudiai na hebou kalagana iduarana ai e hebou.
5 Mose ese hebou taudia e hamaorodia, eto, Iehova ese ini vada e hahedua toma.
6 Bena Mose ese Aaron mai natuna ida e abidia, ranu ai e hadigudia.
7 Bena ia ese hahedoki badana bona gaba ḡauna e hakaralai, bona muri hahedokina bona hahedoki helaḡana e hadokilai, bona gaba ḡauna, e hatua ḡauna, gabana ai e ḡeḡea.
8 Bena hahemaoro vainana e ha-inulaia; vaina lalonai Urim bona Tumim* e uda.
9 Kwara iḡeḡelaina dabuana danu kwarana ai e ḡeḡea, bona bagunai gold koronana helaḡana e atoa, Iehova ese Mose e haduaia heḡereḡerena.
10 Bena Mose ese dehoro helaḡana e abia, dubu bona dubu lalonai e miava ḡaudia iboudiai e horolaidia, e hahelaḡadia.
11 Ihaboulaina patana mai kohuna idoinai, bona digu ranuna dihuna mai ihahelai-kauna ḡauna ida, na nega hahitu e horodia, ihahelaḡadia totona.
12 Aaron kwarana danu dehoro amo e horoa, e hahelaḡaia.
13 Una murinai Mose ese Aaron natuna e abidia, hahedoki badadia bona gaba ḡaudia bona kwara ḡaudia e hakaralaidia, Iehova ese e haduaia heḡereḡerena.
14 Bena ia ese kara-rea boromakauna e abia. Aaron mai natuna ida ese imadia na boromakau kwarana ai e ato kau;
15 bena Mose ese e alaia mase, rarana e abia, imana kwakikwakina amo ihaboulaina patana ai doa e dahulai, ihaboulaina patana e hahelaḡaia. Bena rara orena na ihaboulaina patana badinai e bubua nege, unu amo e hahelaḡaia bona e haḡoevaia.
16 Bena boga bona bogarau urubina bona ase digarana bona nadinadi ruaosi mai digaradia ida e abi, ihaboulaina patana ai e haḡole oho, hari Mose ese.
17 A boromakau tau-anina, mai kopina bona hidiona bona taḡena ida, taruha murimurinai e haḡolea oho, Iehova ese Mose e haduaia heḡereḡerena.
18 Una murinai ia ese mamoe maruanena, ḡole-oho boubouna ḡauna, e hakaua lasi. Aaron mai natuna ida ese imadia na ia kwarana ai e ato kau;
19 bena Mose ese e alaia mase, rarana na ihaboulaina patana latanai bona badinai e nevaria heḡeḡe.
20 Bena e ivaia parara, kwarana bona tau-anina bona digarana be ihaboulaina patana latanai e haḡole oho, hari Mose ese.
21 A bogana bona bogarauna bona imana bona aena na ranu ai e huridia guna; bena mamoe idoinai na Mose ese e gabua, ihaboulaina patana latanai, lahi ese e ḡolea oho, bonana namo ḡauna, ḡole-oho boubouna, Iehova ena, Iehova ese Mose e haḡania heḡereḡerena.
22 Bena ia ese mamoe maruanena iharuana, idia ihahelaḡadia ḡauna, e hakaua lasi. Bena Aaron mai natuna ida ese imadia na mamoe kwarana ai e ato kau.
23 Bena Mose ese e alaia mase, rarana taina e abia, Aaron idiba taiana abona bona idiba imana sinabadana bona idiba aena sinabadana e dahulai.
24 Aaron natuna danu e abidia, idiba taiadia abodia bona idiba imadia sinabadadia bona idiba aedia sinabadadia e dahulai. Bena Mose ese rara orena na ihaboulaina patana latanai bona badinai e nevaria heḡeḡe.
25 Bena ia ese digarana e abia, bona iuna mai digarana ida, bona boga bona bogarau urubina, bona ase digarana, bona nadinadi ruaosi mai digaradia ida, bona aena idibana.
26 Bena asie hatubua flaoana boseana, Iehova vairanai e miava ḡauna, amo dikea kavakava ta bona dikea mai dehorona ta bona ataga ta e abi, hari mamoe digarana bona aena idibana latadiai e ato kau.
27 Bena ia ese ini ḡau iboudiai Aaron imana ruaosi nuadia ai bona natuna imadia nuadia ai e atodia; bena e davedia. Unu na davedave boubouna Iehova vairanai.
28 Bena Mose ese idia imadia amo ma e abidia lou, ihaboulaina patana latanai e gabudia, ḡole-oho boubouna ida: una na hahelaḡa boubouna, bonana namo ḡauna, ḡole-oho boubouna Iehova vairanai.
29 Bena Mose ese mamoe kemena e abia, e davea, davedave boubouna Iehova vairanai: una na Mose ahuna, hahelaḡa boubouna amo e abia, Iehova ese Mose e haduaia heḡereḡerena.
30 Bena Mose ese dehoro taina e abia, bona ihaboulaina patana latanai e miava rarana taina, Aaron mai dabuana ida bona Aaron natuna mai dabuadia ida e nevarilaidia: unu amo Aaron mai ena dabua ida bona Aaron natuna mai edia dabua ida e hahelaḡadia.
31 Bena Mose ese Aaron mai natuna ida e haḡanidia, eto, Hidiona na ranu ai ba nadua, hebou kalagana iduarana badinai, unuseni ai bavania, bona bosea helaḡana lalonai e miamu flaoana danu, lau na hahedua heḡereḡerena, nato “Aaron mai natuna ida bae ania”.
32 A vamu bahuna bona flaoa bahuna na lahi ai ba haḡole oho.
33 Hebou kalagana iduarana amo basio raka lasi dina hitu lalodiai, ela bona ihahelaḡamui dinadia bae ore; badina be ihahelaḡamui dinadia bae hitu.
34 Hari dina eda kara na Iehova ena hahedua karadia: umui na ia ida ba herohemaino totona.
35 Dina hitu hanuaboi hitu ba gima boi ba gima rani Iehova ena hebou kalagana iduarana ai, ba mase garina. Unu vada e haduagu toma.
36 Bena Iehova ese Mose e haḡanilai karadia iboudiai na Aaron mai natuna ese e karadia ḡuḡuru.
Footnotes
^ Urim bona Tumim na mari nadidia rua.
