Evanelia Luka 19:1-48
19 Iesu na Ieriko amo e raka hanaiva lalonai,
2 tau ta ladana Sakaio, tax gogo taudia biagudia ta, ia danu taḡa tauna,
3 e ura dikadika Iesu baine itaia; to hutuma daidiai se itaia, badina tau kwadogi.
4 Bena e heau guna ela, budoa ta ai eha dae, Iesu raka-hanaina ai baine itaia eto.
5 Iesu na una gabu ai e kau, e roha dae, e itaia, bena e hamaoroa, eto, Sakaio e, a diho haraḡa, badina be hari dina emu ruma ai baina noho.
6 Bena e diho haraḡa-haraḡa, ena ruma ai e abia dae mai moalena ida.
7 E itaia taudia iboudiai ese e maumauraia, eto, Ia ese dika tauna e vadivadi heniamu.
8 A Sakaio e gini tore, Lohiabada e hereva henia, eto, Lohiabada e, a itaia, egu kohu kahana na ogoḡami taudia aina henidia, bona ena kohu vada na abia kava tauna na nega hani baina henia lou.
9 Iesu eto, Harihari hahemauri na ina ruma ai vada eme kau; badina be ia danu Abraham natuna.
10 Badina be Taunimanima Natuna na boio taudia itahudia bona ihamauridia totona ema.
Sivarai heḡereḡerena: Hesiai taudia moni e reḡuva
11 Bena e kamonaiva taudia na Iesu ese sivarai heḡereḡerena ta ma e hamaorodia; badina be Ierusalem vada e kahira-kahira, bona idia banava eto Dirava ena basileia una negana ai baine hedinarai.
12 Ia eto, Lohia ta hanua daudauna ela, pavapava dagina baine abia bena ma baine lou mai eto.
13 Una dainai ena hesiai taudia gwauta e boiridia guna, gold monidia ladadia mina ta ta amo e henidia, eto, Ba hoihoilai ela bona lau baina lou mai.
14 To ena hanua taudia ese e lalo dika heniava; bena hesiai haida ia murina amo e siaidia, baeto “Ai na asia uramu emai pavapava ai bainela”.
15 Pavapava dagina e abia, bena e lou, moni e henidia taudia e boiridia, edia hoihoi ai e davari ḡaudia baine diba eto.
16 Ginigunana ema, eto, Ḡaubada e, emu mina ta amo mina gwauta vada na davari.
17 Ia ese e hanamoa, eto, Namo herea; oi na hesiai taumu namona; ḡau maraḡina o balaia heni namonamo dainai, hanua gwauta lohiadia ai baola.
18 Ihararuana danu ema, eto, Ḡaubada e, emu mina ta amo mina ima vada na davari.
19 Bena ia eto, Hanua ima lohiadia ai baola.
20 Ta ma ema, eto, Ḡaubada e, emu mina tamona binai; dabua ai na kumia, na balaia heni;
21 badina be oi garimu na gariva, oi na gwautora taumu, to atoa diho ḡauna o abia isimu, to hadoa ḡauna o utuamu.
22 A ia eto, Oi na hesiai taumu dikana; sibomu emu hereva amo baina hahemaoro henimu. Oi na dibamu lau na gwau-tora taugu, asina atoa diho ḡauna na abia isimu bona asina hadoa ḡauna na utuamu.
23 Matogana: edeheto egu moni na bank taudia dekedia to laohaia; bena bama lou mai, bama abia lou mai ato-kauna ida?
24 Bena dekenai e gini taudia e haduadia, eto, Enai mina na avabihaia, mina gwauta tauna ba henia.
25 Idia eto, Ḡaubada e, ia na mai ena mina gwauta.
26 Ia ma eto, Lau na hamaoromuimu, mai ena ḡau tauna na ḡau momo bae henia; to asi ena ḡau tauna enai sina miana ḡauna do bae abihaia.
27 A lau inaigu, asie urava baina lohiadia taudia, a mailaidia, vairagu ai bavaladia mase.
Iesu Ierusalem ai e dara dae
28 Una hereva muridiai Iesu ese e gunalaidia, Ierusalem ai eha dara dae.
29 Ia na e raka lao, ela bona Betefage bona Betania, Olive ororona hanuadia, vada e kahira-kahira. Bena ena hahediba rarua e siaidia guna,
30 eto, Vairada hanuana aola, bena ba raka vareai gabuna ai doniki natuna ta hemata-kauna ai ba itaia, latanai tau ta do se helai kau; ba ruhaia, ba mailaia.
31 A ta ese baine nanadaimui, baineto “Dahaka dainai ena doniki natuna o ruhaiamu?” umui baoto “Lohiabada ese e ura heniamu”.
32 E siaidia taudia na vada ela, e hamaorodia heḡereḡerena ai vada e davaria.
33 ldia ese doniki natuna e ruhaiava ai, doniki biaguna ese e nanadaidia, eto, Dahaka dainai doniki natuna o ruhaiamu?
34 Idia eto, Lohiabada ese e ura heniamu.
35 Idia ese doniki natuna na Iesu dekena e hakaua lao, bona edia dabua na doruna ai e laha; bena Iesu e helai kau.
36 Laona ai, idia ese edia dabua na dala ai e laha.
37 Hanua vada e kahikahi, Olive ororona e hekei, bena hahediba hutuma bada e moale hisi dae, Dirava e imodaia, e itava karadia siahudia iboudiai daidiai.
38 Idia eto,Hanua Pavapavana, Lohiabada ladana ai e maimu, aita hanamoa;Maino guba ai baine bada,Bona heimodai guba doriva-dorivana ai.
39 Bena Farisea taudia haida ese hutuma bogaragidia amo ia e hamaoroa, eto, Hahediba taumu e, emu hahediba na a gwau henidia.
40 A ia ese e haere henidia, eto, Lau na hamaoromuimu, idia na bema asi reḡereḡedia, ini nadi bema lolo.
41 Ia na e raka kahira, hanua e itaia, bena e tai henia,
42 eto, Madi, hari dina ai emu maino badina boma diba boma namo; to matamui amo vada e hehuni.
43 Badina be negana do baine gini dae, oi inaimu ese tano bae larebaia, bae koumu heḡeḡe, asi emu raka lasi dalana.
44 Bena tano ai bae kohumu tao, natumu danu bae kohudia tao, bona nadi ta nadi ta latanai basine mia; badina be ivadivadi-henimu negana na asi dibamui.
Hoihoi taudia na Dubu Helaḡa amo e luludia lasi
45 Bena Dubu Helaḡa ai e raka vareai, hoihoi taudia e luludia lasi.
46 E gwau henidia, eto, Vada e torea, Egu ruma na ḡuriḡuri rumana; to umui ese dadidadi taudia edia kohua ai ome halaoa.
47 Dina iboudiai Dubu Helaḡa lalonai e hahedibava. Hahelaḡa taudia bona itorena taudia bona hanua tau-badadia ese ia ialana dalana e tahuava,
48 to dala ta asie davaria, badina be taunimanima iboudiai na ia ikamonaina e urava.
