Evanelia Mareko 11:1-33
11 Idia na e raka ela bona Ierusalem vada e kahira-kahira, Betefage bona Betania ai e kau, Olive ororona ai. Bena Iesu ese ena hahediba rarua e siaidia guna,
2 e hamaorodia, eto, Vairada hanuana aola, bena ba raka vareai gabuna ai doniki natuna ta hemata-kauna ai ba itaia, latanai tau ta do se helai kau. Ba ruhaia, bena ba mailaia.
3 A ta ese baine nanadaimui, baineto “Umui na dahaka o karamu?” umui baoto “Lohiabada ese e ura heniamu, bena ma baine siaia lou haraḡa.”
4 Bena raruosi vada ela, doniki natuna e davaria, ruma ta vairanai e mataia, bena vada e ruhaia.
5 Unuseni ginidia taudia haida ese e nanadaidia, eto, Umui na dahaka dainai ena doniki natuna o ruhaiamu?
6 Bena Iesu ena hereva e hamaorolaidia. Bena vada e kahua nege.
7 Idia ese doniki natuna na Iesu dekena e laohaia, bona edia dabua doruna ai e laha; bena Iesu e helai kau.
8 Bena hutuma ese edia dabua dala ai e laha, bona haida be reta imea ai e utu, dala ai e laha.
9 Bena mata taudia bona gabe taudia e hisi dae, eto,
Hosana! Lohiabada ladana ai e maimu tauna aita hanamoa.
10 Seneda David ena basileia vada e maimu aita hanamoa.
Atai doriva-dorivana ai hosana.
11 Ia na Ierusalem ai e kau, bena Dubu Helaḡa lalonai e raka vareai, ḡau iboudiai e ita hagau-hagau. Adorahi ai, ia na gwauta-rarua ida e raka lasi, Betania e lou lao.
Ierusalem ai
12 Daba ai Betania amo ma e lou, mai hitolona ida.
13 Bena ia ese suke auna ta mai rauna daudauna ai e itaia, bena huahuana iabina e lao henia, to asi huahuana, rauna mo; badina be suke edia huahua negana na do vairai.
14 Bena Iesu ese e gwau henia, eto, Oi huahuamu na tau ta ese basine ania, harihari ela hanaihanai. Una hereva na ena hahediba ese e kamonai.
15 Idia na Ierusalem ai e kau, bena ia na Dubu Helaḡa ai e raka vareai, hoihoi taudia e luludia lasi, bona moni e senisi taudia edia pata bona pune e hoi taudia edia helai ḡaudia e uhe hebubu,
16 bona kohu lato taudia e gwaudia tao.
17 E gwau henidia, eto, Ini se torea toma, a? Egu ruma na bese loḡora iboudiai edia ḡuriḡuri rumana bae gwauraia; to umui ese dadidadi taudia edia kohua ai vada o halaoa.
18 Hahelaḡa taudia bona itorena taudia ese harina e kamonai, bena ia ialana dalana e tahua; badina be ia garina e gariva, taunimanima iboudiai ese ena hahediba herevadia e hoalaiva dainai.
19 Adorahi iboudiai ia ese hanua badana e rakataniava.
20 Daba ai, raka hanaidia ai, hari suke e itaia, vada e marai vaitani.
21 Petro ese e helalolaia une, eto, Hahediba taumu e, mani a itaia, o gwau henia sukena na vada eme marai vaitani.
22 Iesu eto, Dirava bavabidadama henia.
23 Na hamaoromui momokanimu, ta ese ina ororo baine haḡania, baineto “Ba heraḡa, davara ai ba henege dobi”, bona lalona basine daradara, lalona idoinai baineto e gwauraia ḡauna na do baine hekara, ia ese e gwauraia ḡauna do baine abia.
24 Taunabunai na hamaoromuimu, o uramu ḡaudia iboudiai ḡuriḡuri ai ba noi, lalomui idoidiai baeto bavabi, be vada bavabi.
25 Ḡuriḡuri ai ba gini negadia ai na e hadikamui taudia edia dika ba gwau tao, bena Tamamui guba ai e nohomu ese umui emui dika danu baine gwau tao.
26 A umui ese edia dika basio gwau tao, Tamamui guba ai e nohomu danu emui dika basine gwau tao.
Iesu hanua lohiadia ida e hepapahuahu
27 Idia na Ierusalem ai ma e kau. Bena ia na Dubu Helaḡa lalonai rakana ai, hahelaḡa taudia bona itorena taudia bona hanua tau-badadia ia dekena ela,
28 e nanadaia, eto, Edena siahu ai ini ḡau o karamu, bona daika ese ina siahu e henimu?
29 Iesu e haere, eto, Lau ese danu umui aina nanadaimui: ba haere henigu, bena lau danu ini ḡau na karalaimu siahuna baina hamaorolaimui.
30 Ioane ena bapatiso na guba amo eiava taunimanima edia amo? Mani aogwa.
31 Idia na sibodia e hereva heheni, eto, Ita baitato “Guba amo”, ia baineto “Matona asio kamonai heniava”.
32 Baitato “Taunimanima edia amo”: to idia na aru taudia garidia e gariva, badina be iboudiai e tomava Ioane na peroveta tauna korikori.
33 Taunabunai idia ese Iesu e haere henia, eto, Asi dibamai. Bena Iesu ese e haere henidia, eto, Lau danu ini ḡau na karalaimu siahuna na basina hamaorolaimui.
