Evanelia Mareko 16:1-20
16 Dina Helaḡa e ore ai, Maria, hane Magdala, bona Maria, Iakobo sinana, bona Salome, tatoiosi muramura mai bonadia e hoi, ia idahulaina.
2 Pura dinana gini-gunana ai, daba galuma-galumana ai, idia na gara ela.
3 Sibodia e hereva heheni, eto, Daika ese gara ikoulaina nadina baine kurea oho?
4 Bena e roha isi, nadi na dauhai heatona ai e itaia. Una nadi na bada herea.
5 Idia na gara lalonai e raka vareai, bena eregabe ta e itaia, idiba kahana ai e helai, ena dabua na kurokuro bona ḡaulatalata. Hahine na vada e gari.
6 A ia ese a hamaorodia, eto, Asio gari: umui na Iesu, Nasaret tauna, e hasatauroa tauna, o tahuamu. Ia na vada e tore isi: ia na dia iniseni ai. E atoa gabuna mani a itaia.
7 Vada aola, ena hahediba bona Petro ba hamaorodia, baoto “Ia ese baine gunalaimui Galilea ai; unuseni ai ba itaia, e hamaoromui heḡereḡerena”.
8 Bena idia na e raka lasi, gara e heautania, badina be taudia e heude-heude bona laumadia e daure. Bena hereva na tau ta asie hamaoroa, badina be e gari.
9 Pura dinana gini-gunana ai, daba matana ai, Iesu e tore isi; bena Maria, hane Magdala, enai e hedinarai guna. Una na lauma dikadia hahitu ena amo e halasidia hahinena.
10 Ia na vada ela, Iesu bamona edia kudou-hetaha bona edia taitai lalonai e hamaorodia.
11 Idia na e kamonai, vada e mauri bona Maria ese vada e itaia, to ena hereva asie abia dae.
12 Gabeamo idia rarua gunika ela, bena idia vairadiai e hedinarai, to oromana na e idau.
13 Bena raruosi ela, bamodia e hamaorodia, to edia hereva asie abia dae.
14 Ma nega ta gwauta-taosi anianidia ai ediai e hedinarai; bena e gwau henidia, edia gwau-edeede bona edia lalo-duhu daidiai; badina be ena tore-isi ai e itaia taudia asie kamonai henidia.
15 E hamaorodia, eto, Baola, tanobada idoinai sivarai namo taunimanima iboudiai vairadiai ba harorolaia.
16 Baine kamonai, bona ba bapatisoa tauna na do baine mauri; a basine kamonai tauna na do bae revaia.
17 Bae kamonai taudia na ini toa bae kara: lauma dikadia lau ladagu ai bae luludia lasi; gado matamatadia ai bae hereva;
18 gaigai dikadia bae abi isi; mase muramurana bae inua to basie mase; imadia na gorere taudia latadiai bae dau kau, bena bae mauri.
19 Lohiabada Iesu ese e hereva henidia vaitani, bena guba ai vada e heabi dae, Dirava idibana kahana ai e helai diho.
20 A idia na vada ela, tanobada heḡeḡe-madai e harorova; Lohiabada danu idia ida e ḡaukara hebouva, bona hoa karadia amo edia hereva e hamomokaniva.
