Evanelia Mataio 5:1-48
5 Iesu ese aru taudia e itadia, bena ororo ai e dara dae, e helai diho; bena ena hahediba na ia dekena ela.
2 Bena e hadibadia matama, eto,
3 Manau taudia be nanamo, badina be guba basileiana na idia edia.
4 Taitai taudia be nanamo, badina be taudia bae halodia.
5 Manada taudia be nanamo, badina be idia ese tanobada bae abia.
6 Kara maoromaoro hitolona e hitolomu bona ranu-masena e ranu masemu taudia be nanamo, badina be bogadia bae kunu.
7 Hebogahisi taudia be nanamo, badina be idia danu do bae bogadia hisi.
8 Lalodia ḡoḡoeva-ḡoḡoeva taudia be nanamo, badina be idia ese Dirava bae itaia.
9 Herohemaino taudia be nanamo, badina be idia na Dirava natuna bae gwauraidia.
10 Kara maoromaoro daidiai e daḡedaḡe henidia taudia be nanamo, badina be guba basileiana na idia edia.
11 Lau daigu ai umui bae uduguiraimui, bae daḡedaḡe henimui, bae gwau dika henimui koikoi, negadia ai na do ba namo.
12 Ba moale, ba moale hisi dae, badina be guba ai davamui baine bada; badina be e gunalaimui taudia, peroveta taudia, na unu e daḡedaḡe henidia tomava.
13 Umui na tanobada damenana. Damena na basinema tadika, dahaka ese bema hatadikaia? Asi ena namo, vada bae negea, taunimanima ese aedia ai bae moimoilaia.
14 Umui na tanobada diarina. Ororo dorina ai e hadaia hanuana na basine hehuni diba.
15 Lamepa bae haraia negana ai, maua henunai basie atoa, a lamepa gabuna korikori ai bae laia kau, ruma taudia iboudiai edia diari ai bainela.
16 Umui emui diari taunimanima vairadiai unu ba hahedinaraia toma, bena emui kara namodia bae ita bona Tamamui guba ai e nohomu na bae heatolaia.
Taravatu Gunana bona Taravatu Matamatana
17 Lalomui na basieto lau be taravatu bona peroveta herevadia iruhadia totona nama: dia iruhadia to ihaḡuḡurudia totona nama.
18 Badina be na hamaoromui momokanimu, harihari ela guba bona tanobada bae puki, taravatu ena leta ta eiava ena koma ta basine boio, ela bona anina idoinai baine vara.
19 Taunabunai, tau ta ese taravatu maraḡi-maraḡina ta baine tataia utu, ia na guba basileiana lalonai gabe tauna bae gwauraia. A tau ta ese baine badinadia, bona baine hahedibalaidia, ia na guba basileiana lalonai guna tauna bae gwauraia.
20 Na hamaoromuimu, umui emui kara maoromaoro ese itorena taudia bona Farisea taudia edia basine hereaia, umui na guba basileiana lalonai basio raka vareai, lasi ona lasi vaitani.
21 Vada o kamonai, sene taudia e haduadia, eto, Basio ala-ala; bona ala-ala tauna do bae hahemaoro henia.
22 A lau ese na hamaoromuimu, tadikakana baine badu henia tauna na do bae hahemaoro henia; bona tadikakana baine ḡonaḡonalaia tauna na kaunsil taudia vairadiai bae laohaia; bona tadikakana na kava tauna baine gwauraia tauna na Gehena lahina ai bainela.
23 Taunabunai, emu boubou ḡauna pata helaḡana ai bavatoa negana ai na ba helalo une, tadikakamu enai mai emu kerere,
24 emu boubou ḡauna pata helaḡana vairanai ba rakatania, baola, tadikakamu ida ba herohemaino guna, gabeamo ba lou lao, emu boubou ḡauna pata helaḡana latanai bavatoa.
25 Oi inaimu ida ba herohemaino haraḡa, hahemaoro dalana ai doini o raka heboumu negana ai; inaimu ese hahemaoro tauna imana ai baine atomu na garina, hahemaoro tauna ese dibura rumana igimana tauna imana ai baine atomu na garina, dibura rumana igimana tauna ese dibura rumana lalonai baine koumu na garina.
26 Na hamaoromu momokanimu, unu amo basio raka lasi ela bona davana ba haḡuḡurua vaitani.
27 Vada o kamonai, sene taudia e haduadia, eto, Basio heuda hanai.
28 A lau ese na hamaoromuimu, tau ta ese hahine ta baine raraia ela bona baine ḡahusia, ia lalona ai vada e heuda hanai vaitani.
29 Matamu idibana ese baine hahekwakwanaimu, ba giboa lasi, ba negea daure; badina be taumu regena ta baine boio be namo, a taumu idoinai Gehena ai bae tahoa dobi na dika.
30 Eiava imamu idibana ese baine hahekwakwanaimu, ba utua oho, ba negea daure; badina be taumu regena ta baine boio be namo, a taumu idoinai Gehena ai bae tahoa dobi na dika.
31 E haduadia danu, eto, Adavana baine hadihoa tauna ese hekoho revarevana baine henia.
32 A lau ese na hamaoromuimu, tau ta adavana dia heuda-hanai hahinena to baine hadihoa, ia ese heuda-hanai hahinena ai baine halaoa; bona una hahine ma baine adavaia tauna na heuda-hanai tauna.
33 Vada o kamonai, sene taudia e haduadia, eto, Basio gwau hamata koikoi; a emu gwauhamata Lohiabada enai ba hamomokani.
34 A lau ese na hamaoromuimu, basio gwau hamata, lasi ona lasi vaitani: dia guba ladana ai, badina be ia na Dirava ena terono;
35 dia tanobada ladana ai, badina be ia na aena edia moi-tao ḡauna; dia Ierusalem ladana ai, badina be ia na Pavapava hereana ena hanua.
36 Oi kwaramu danu basio gwau hamatalaia, badina be huimu tamona ihakurokurona eiava ihakoremana na asi dibamu.
37 Taunabunai emu hereva ba gwaurai: oibe, oibe, bona lasi, lasi. Ini e hereamu herevana na tau dikana ena amo.
38 Vada o kamonai, e haduadia, eto, Mata davana be mata; ise davana be ise.
39 A lau ese na hamaoromuimu, dika tauna basio gwaua tubu. Ia ese vahamu idibana baine pataia, laurina danu ba mede henia.
40 Tau ta ese baine hahemaoro henimu emu hahedoki iabina totona, emu rami danu ba henia.
41 Eiava tau ta ese baine haḡanimu kilomita ta ba raka, kilomita iharuana danu ia ida ba raka hebou.
42 Noinoi tauna na ba henia, bona emui ai baine abi torehai e tomu tauna na basio dadaraia.
43 Vada o kamonai, e haduadia, eto, Dekemu tauna ba lalokau henia; a inaimu ba inai henia.
44 A lau ese na hamaoromuimu, inaimui ba lalokau henidia, bona bae daḡedaḡe henimui taudia daidiai ba ḡuriḡuri.
45 Unu amo Tamamui guba ai e nohomu na natuna ai baola. Badina be ia ese ena dina na kara dika taudia bona kara namo taudia latadiai e hatataia dae rohamu, medu danu kara maoromaoro taudia bona kara kerere-kerere taudia latadiai e hadihoamu.
46 Badina be e lalokau henimuimu taudia mo ba lalokau henidia, davamui be dahaka bavabia? Tax gogo taudia na unu asie kara tomamu a?
47 Bona tadikakamui mo ba hanamodia, emui namo be dahaka? Idau bese taudia na unu asie kara tomamu a?
48 Taunabunai, umui na ba ḡoeva dae, Tamamui guba ai e nohomu na e ḡoeva daemu na heto.
