Numera 28:1-31
28 Iehova ese Mose e hereva henia, eto,
2 Israel taudia na ini ba haḡanidia toma, baoto: Egu boubou ḡaudia, Iahi ai o gabumu agu, bonana namo ḡaudia egu, ba lalodia tao bona ba henigu, nega korikoridia iboudiai.
3 Ma ba hamaorodia, baoto: Lahi boubouna binai Iehova ba henia, dina ta ta amo mamoe natudia mamaruanedia, laḡani tamona ḡaudia asi bebeka-bebekadia, rua rua amo ba heni, emu ḡole-oho boubouna ela hanaihanai.
4 Mamoe natuna ta be daba ai ba henia, iharuana be adorahi ai ba henia.
5 Flaoa namo-hereana efa ta ba karoaia, karoa gwauta, bona dehoro negari-negarina hini* ta ba karoaia, karoa hani; bena flaoa karoa ta bona dehoro karoa ta bavabi, ba bulo, ba gabu.
6 Ina na ḡole-oho boubouna, dina iboudiai ba hahelaḡaia, Sinai ororona ai na haḡanimui heḡereḡerena; ia na bonana namo ḡauna, lahi boubouna, Iehova ena.
7 Inuinu bouboudia danu ba heni: vine ranuna hini ta ba karoaia, karoa hani, bena karoa ta mamoe natuna ta ida, ma karoa ta mamoe natuna ta ida, unu ba heni toma; gabu helaḡana ai hari vine ranuna ba seia Iehova ena; emui inuinu boubouna bunai.
8 Mamoe natuna iharuana na adorahi ai ba hahelaḡaia, flaoa boubouna bona inuinu boubouna danu, daba ai o hahelaḡadia heḡereḡerena; ia na lahi boubouna, bonana namo ḡauna, Iehova ena.
Dina Helaḡa Bouboudia
9 Dina Helaḡa ai, mamoe natudia mamaruanedia rua, laḡani tamona ḡaudia asi bebeka-bebekadia, ba hahelaḡadia; bona flaoa namo-hereana efa ta ba karoaia, karoa gwauta, bena karoa rua dehoro ida ba bulo, bena ba hahelaḡaia; inuinu boubouna danu ba seia.
10 Dina Helaḡa iboudiai ḡole-oho bouboudia unu ba heni toma, dina kavakava ena ḡole-oho boubouna bona ena inuinu boubouna ida ba heni hebou.
Hua matamata Bouboudia
11 Hua matamatadia ai Iehova ena ḡole-oho boubouna na ini ba henia toma: boromakau natudia mamaruanedia rua, mamoe maruanena ta, bona mamoe natudia mamaruanedia hitu, laḡani tamona ḡaudia asi bebeka-bebekadia.
12 Flaoa namo-hereana efa ta ba karoaia, karoa gwauta, bena karoa toi toi be dehoro ida ba bulo, boromakau natudia ta ta ida ba heni; bona karoa rua be dehoro ida ba bulo, mamoe maruanena ida ba heni.
13 Ma efa ta ba karoaia, karoa gwauta, bena karoa ta ta be dehoro ida ba bulo, mamoe natudia ta ta ida ba heni. Ini be ḡole-oho boubouna ḡaudia, bonana namo ḡaudia; bae haḡoledia oho, Iehova ena.
14 A edia inuinu bouboudia be iniheto: vine ranuna hini ta ba karoaia, karoa rua, bena karoa ta ta ba sei, boromakau natudia ta ta edia; ma hini ta ba karoaia, karoa toi, bena karoa ta ba seia, mamoe maruanena ena; ma hini rua ba karoadia, karoa hani hani amo, bena karoa ta ta ba sei, mamoe natudia ta ta edia. Ini na hua ta ta edia ḡole-oho boubou ḡaudia, laḡani huadia iboudiai lalodiai.
15 Nani maruanena ta danu ba hahelaḡaia; ia na kara-dika iabi-ohona boubouna Iehova enai. Ini iboudiai na dina kavakava ena ḡole-oho boubouna bona ena inuinu boubouna ida ba heni hebou.
Lagau-hanai Bouboudia
16 Hua gini-gunana ena dina ihagwauta-hanina be Iehova ena Lagau-hanai.
17 Ina hua ena dina ihagwauta-imana na aria dinana: dina hitu lalodiai asie hatubua flaoana mo bae ania.
18 Dina gini-gunana ai hebou helaḡana bavabia. Una dina ai ḡaukara badana ta basio karaia,
19 a lahi boubouna ba haḡolea oho, Iehova ena: boromakau natudia mamaruanedia rua, mamoe maruanena ta, bona mamoe natudia mamaruanedia hitu, iboudiai na asi bebeka-bebekadia ḡaudia mo.
20 Edia flaoa bouboudia danu ba haḡole oho: flaoa namo-hereana efa ta ba karoaia, karoa gwauta. Karoa toi toi be dehoro ida ba bulo, boromakau natudia ta ta ida ba heni; bona karoa rua be dehoro ida ba bulo, mamoe maruanena ida ba heni.
21 Ma efa ta ba karoaia, karoa gwauta; bena karoa ta ta be dehoro ida ba bulo, mamoe natudia hituosi ta ta ida ba heni.
22 Nani maruanena ta danu ba hahelaḡaia, emui kara-dika iabi-ohona boubouna, herohemaino ḡauna.
23 Ini ḡau be vaia daba iboudiai o haḡole oho ḡaudia ida ba heni hebou.
24 Dina hituosi lalodiai unu mo ba kara toma, dina ta ta ai: boubou vamuna ba haḡolea oho, bonana namo ḡauna Iehova ena; ia bona dina kavakava ena ḡole-oho boubouna bona ena inuinu boubouna ba heni hebou.
25 Dina ihahituna ai hebou helaḡana bavabia, una dina ai ḡaukara badana ta basio karaia.
Taboro Bouboudia
26 Uma anidia ba utu matama dinana ai, emui pura ariana ai flaoa matamatana boubouna ba hahelaḡaia, Iehova ena; una negana ai hebou helaḡana bavabia, bona ḡaukara badana ta basio karaia.
27 Ḡole-oho boubouna ba hahelaḡaia, bonana namo ḡauna Iehova ena: boromakau natudia mamaruanedia rua, mamoe maruanena ta, bona mamoe natudia mamaruanedia hitu, laḡani tamona ḡaudia.
28 Edia flaoa bouboudia danu ba haḡole oho: flaoa namo-hereana efa ta ba karoaia, karoa gwauta. Karoa toi toi be dehoro ida ba bulo, boromakau natudia ta ta ida ba heni; bona karoa rua be dehoro ida ba bulo, mamoe maruanena ida ba heni.
29 Ma efa ta ba karoaia, karoa gwauta; bena karoa ta ta be dehoro ida ba bulo, mamoe natudia hituosi ta ta ida ba heni.
30 Nani maruanena ta danu ba hahelaḡaia, emui herohemaino ḡauna.
31 Ini ḡau be vaia emui ḡole-oho bouboudia mai edia flaoa bouboudia ida ba heni hebou. Ba ita, asi bebeka-bebekadia ḡaudia mo ba hahelaḡadia. Inuinu bouboudia danu ba sei.
Footnotes
^ “Efa” bona “Hini” na Heberu taudia edia hahetoho ḡaudia ladadia.
