Roma 10:1-21
10 Varavaragu e, lalogu ena ura, bona egu noinoi Dirava enai danu, be Israel taudia do bae mauri.
2 Lau dibagu idia ese Dirava e ura heniamu; ḡau tamona, lalodia asie pararamu.
3 Badina be Dirava ena kara maoromaoro asi dibadia; sibodia edia kara maoromaoro e goadalaiamu, a Dirava ena kara maoromaoro asie badinaiamu.
4 Badina be taravatu ihaḡuḡuruna be Keriso: bae abidadama henia taudia iboudiai maorodia bae gwaurai, ia bagunai.
5 Mose ese taravatu ena kara maoromaoro e herevalaia, eto, E karamu taudia na unu ḡau daidiai do bae mauri.
6 A heabidadama ena kara maoromaoro ini e gwau tomamu: “Lalomui ai basioto, Daika guba ai baine dae, Keriso baine hakaua diho?
7 eiava, Daika gabu dobuna ai baine diho, Keriso mase taudia bogaragidia amo baine hakaua dae?”
8 Ma e tomu “Hereva na dekemu ai, udumu ai, lalomu ai”. Heabidadama herevana binai ai ese a harorolaiamu:
9 udumu ai Iesu Lohiabadana ba gwaurai, bona lalomu ai bavabia dae Dirava ese mase amo e hatorea isi; bena ba mauri.
10 Badina be lalo ena heabidadama amo kara maoromaoro e varamu, bona udu ena hegwaurai amo mauri e varamu.
11 Badina be buka ai e tomamu, Ia bae abiabiraia taudia iboudiai na basie hekwakwanai.
12 Iuda tauna na dia idau; Helene tauna na dia idau. Badina be iboudiai edia Lohiabada na tamona; bona e hahaneamu taudia iboudiai e harihari henidiamu;
13 bona Lohiabada ladana e hahaneamu taudia iboudiai na bae mauri.
14 A asie abiabiraia taudia na ede bae hahanea toma? Bona harina asie kamonai taudia na ede bae abiabiraia toma? Bona haroro tauna bema lasi, harina na ede bae kamonai toma?
15 Bona haida ese basie siaidia, haroro taudia na ede bae haroro toma? Buka ai e torea heḡereḡerena eto, Ḡau namodia haridia moaledia e mailaimu taudia aedia daka namo!
16 A haida na sivarai namo asie kamonai henia. Isaia eto, Lohiabada e, daika ese emai hereva vada e abi dae?
17 Taunabunai, heabidadama badina be kamonai, bona kamonai badina be Keriso ena hereva.
18 A lau na tomamu idia na asie kamonai a? Lasi, e kamonai.
Eredia na tanobada heḡeḡe-madai eha piua,Bona edia hereva na tanobada dokodia ela.
19 Ma na tomamu: Israel asi dibadia a? Be! Gunaguna Mose eto,
Asi besedia taudia ediai emu vaḡeḡe baina havaraia,Bona lalo-duhu besena enai emu badu baina havaraia.
20 Bona Isaia e hereva goadagoada, eto,
Asie tahugu taudia ese e davarigu,Bona asie nanadailaigu taudia ediai na hedinarai.
21 A ia ese Israel e herevalaia, eto, Dina idoinai gwau-edeede bona gwau-tubu besena na imagu na pala henia.
