Salamo 107:1-43
107 Iehova ba hanamoa;badina be ia na namo,ena hebogahisi na e hesiriu hanaihanaimu.
2 Iehova ese vada e hamauridia taudia,hisihisi amo vada e rauadia taudia,
3 tano idau-idau amo,laurabada amo bona lahara amo,mirigini amo bona tahodiho amo,vada e haboudia taudia naunu bae gwau toma.
4 Haida na tano ḡaḡaedia ai e loava,bae noholaia hanuana ta dalana asie davaria;
5 idia na hitolo bona ranu-mase ese e abidiava,laumadia na lalodiai e manoriva.
6 Bena edia hisihisi ai idia ese Iehova e tai henia,bena ia ese edia hisihisi amo e hamauridia,
7 bona dala maoromaorona amo e hakaudia laova,ela bona bae noholaia hanuana ai e kau.
8 Iehova bae hanamoa,ena hebogahisi bona ena hoa karadia taunimanima natudia ediai daidiai.
9 Badina be ranu-mase tauna na ia ese e ha-inuamu,bona hitolo tauna na ḡau namodia amo bogana e hakunuamu.
10 Haida na hanuaboi diburana ai e nohova, bona lalodia e diburava,hisihisi ai bona auri iḡuidia ai;
11 badina be Dirava ena hereva vada e gwau ede ede henidia,bona Herea Mikamika ena hahealo vada e dadaraia.
12 Hekwarahi ese lalodia e hametaudia;idia na e keto, asi idurudia ta.
13 Bena edia hekwarahi lalonai idia ese Iehova e tai henia,bena ia ese edia hisihisi amo e hamauridia;
14 hanuaboi diburana bona lalo-dibura amo e hakaudia lasi,edia iḡui e hamotudia.
15 Iehova bae hanamoa,ena hebogahisi bona ena hoa karadia taunimanima natudia ediai daidiai.
16 Badina be ia ese auri labora-labora iduaradia e huaridia,bona auri e rahu utu.
17 Haida na e goreredia, edia kara dika daidiai,edia kara havara daidiai hisi e ani;
18 aniani idau-idau iboudiai e dadaraidia,mase ikoukoudia e raka henidia kahi.
19 Edia hisihisi ai Iehova e tai henia,bena ia ese edia hisihisi amo e hamauridia;
20 iena hereva e halasia, e hamauridia,hahebua-tari amo e harohodia mauri.
21 Iehova bae hanamoa,ena hebogahisi bona ena hoa karadia taunimanima natudia ediai daidiai;
22 boubou ḡaudia bae hahelaḡadia mai heimodai herevadia ida,iena kara bae gwauraidia hedinarai, edia moale anedia ai.
23 Haida na davara ai e laolaova,bona gadobada ai e ḡaukarava;
24 Iehova ena kara e itadia,ena hoa karadia dobu gabudia ai.
25 Badina be ia e gwau isi, lai gubana e hatoaia,bena davara hurehuredia na e heabi isi.
26 Guba ai e daeva, dobu gabudia ai e dihova,edia hekwarahi ai edia haheauka e veve ohova.
27 Matadia e madai-madai, e raraga, kekero taudia na heheto,daradia e doko.
28 Bena edia hekwarahi ai Iehova e tai henia,bena ia ese edia hisihisi amo e hamauridia.
29 Lai gubana e gwaua tao, bena e vea,bona davara hurehurena e gaima.
30 Bena e moaleva, laḡadia e aniva dainai;metai gabuna, e ura heniava gabuna, Ialonai e hakaudia vareai.
31 Iehova bae hanamoa,ena hebogahisi bona ena hoa karadia taunimanima natudia ediai daidiai.
32 Bese taudia edia hebou ai bae heatolaia,bona hanua tau-badadia edia henega ai bae imodaia.
33 Ia ese sinavai na tano ḡaḡaena ai e halaodiamu,bona ranu e lohilohimu gabudia na tano kaukaudia ai.
34 Tano mai anina na laguta ai e halaoamu,inoholaina taudia edia kara dika daidiai.
35 Ma tano ḡaḡaena na gohu ai e halaoamu,bona tano kaukauna na ranu e lohilohimu gabuna ai.
36 Unuseni ai ia ese hitolo taudia e hanohodiamu,bena idia ese hanua ta e hadaiamu, bae noholaia totona;
37 idia ese uma e karamu, bona vine imeadia e hadomu,anidia badadia e abimu.
38 lena hahenamo dainai idia na e hutuma e laomu;bona edia seri e gimadiamu, basie gadoi.
39 Daḡedaḡe eiava hekwakwanai eiava hisihisi daidiai,idia na e gadoimu bona e morumu,
40 una negana ai ia ese pavapava e ihi-ihiraidiamu,e siaidia laomu, tano ḡaḡaedia ai bae loaloa;
41 a ogoḡami taudia na edia hisihisi amo e abidia isimu,bona garadia e hahohodiamu, mamoe seridia na heheto.
42 Kara maoromaoro taudia ese e itaiamu, bena e moalemu;kara dika taudia iboudiai na ududia e hakapumu.
43 Daika na mai aonegana, ia ese ini ḡau do baine lalodia,taunimanima ese Iehova ena hebogahisi bae haeroa.
