Salamo 135:1-21
135 Iehova ba imodaia.
Iehova ladana ba imodaia;umui Iehova ena hesiai taumui, heimodai ba henia,
2 umui Iehova ena ruma ai o ginimu taumui,iseda Dirava ena ruma maḡudia ai o ginimu taumui.
3 Iehova ba imodaia, badina be Iehova na namo;ia ladana ba heatolaia emui ane ai,badina be ia na mai ena harihari-bada.
4 Badina be Iehova ese Iakob vada e abia hidi, ia sibona ena;Israel na iena korikori.
5 Badina be lau dibagu Iehova na bada;eda Ḡaubada ese dirava iboudiai e hereadiamu.
6 Badina be Iehova na sibona ena ura e karamu,guba ai bona tanobada ai,bona davara ai bona dobu gabudia iboudiai.
7 Ia ese ori e hadaediamu,tanobada dokona amo;bona kevaru e karaiamu, medu ena,bona lai na ena roge amo e halasidiamu.
8 Ia ese Aigupto ai natu-roboadia e aladia mase,taunimanima natudia roboadia bona boroma natudia roboadia.
9 Aigupto e, oi bogaragimu ai,ia ese toa bona hoa karadia e siaidia,Farao bona ena hesiai taudia iboudiai ihadikadia.
10 Ia ese bese momo e habuadia tari,bona pavapava mai siahudia e aladia mase:
11 Sihon, Amoro taudia edia pavapava,bona Og, Basan pavapavana,bona Kanaan basileiadia iboudiai.
12 Edia tano e heni lao, haida ese e ḡaunaia,ena orea taudia Israel ese e ḡaunaia.
13 Iehova e, oi ladamu na e hesiriu hanaihanaimu;Iehova e, oi harimu na laḡani laḡani e miamu.
14 Badina be Iehova ese ena orea taudia na maorodia baine gwaurai,bona ena hesiai taudia na baine bogadia hisi.
15 Bese idau-idau edia kaivakuku na silver bona gold amo e karadiamu,taunimanima imadia karakaradia:
16 mai ududia, to asie herevamu;mai matadia, to asie itamu;
17 mai taiadia, to asie kamonaimu;bona asi laḡadia ududia ai.
18 E karadiamu taudia na idia heḡereḡeredia ai baela;oibe, e abidadama henidiamu taudia iboudiai danu.
19 Israel besena e, Iehova ba hanamoa;Aaron iduhuna e, Iehova ba hanamoa;
20 Levi iduhuna e, Iehova ba hanamoa;Iehova garina o garimu taumui e, Iehova ba hanamoa.
21 Siona amo Iehova ba hanamoa;ia na Ierusalem ai e nohomu.
Iehova ba imodaia.