Salamo 36:1-12
36 Kerere ese kara dika tauna e hereva heniamu,ia lalona ai e herevamu;Dirava igari-henina naia matana ai se miamu.
2 Ia sibona matana ai e heaḡimu, e tomu,ena kara dika na ta ese basine davaria,bona basine inai henia diba.
3 Ia uduna herevadia na didika bona kokoikoi;aonega karadia bona kara namodia vada e hadoko.
4 Ena mahuta patana ai kara dikadia e haeromu;dala asi namona e rakalaiamu,kara dika na se dadaraiamu.
5 Iehova e, oiemu hebogahisi na guba e dae laomu,emu heabidadama na ori ai e kaumu.
6 Oiemu kara maoromaoro na Dirava ena ororo na heheto,emu hahemaoro na gadobada na heto.Iehova e, taunimanima bona mauri ḡaudia idau-idau danuoi ese o hamauridiamu.
7 Dirava e, emu hebogahisi na herea-dae;taunimanima natudia ese oi hanimu ikerukerudia ai e komumu.
8 Emu ruma anianidia e ani boga kunumu;emu moale sinavaina amo o ha-inudiamu.
9 Badina be mauri ranuna na oiemu amo e lohi lohi daemu,bona oiemu diari ai diari a itaiamu.
10 Emu hebogahisi ba hahesiriua, oiemu ai e manadamu taudia ediai;emu hahemauri danu, lalodia mamaoro-mamaoro taudia ediai.
11 Hekokoroku tauna aena ese basine moigu tao,kara dika tauna imana ese basine dorigu oho.
12 Kara dika taudia na e goru paraparamu;vada e doridia dobi, asi edia tore isi dalana ta.
