Salamo 60:1-12
60 Dirava e, oi ese vada o dadaraimai, vada o hadareremai,vada o badu; mani emu kara bavabimai dae lou.
2 Oi ese tano vada o haheude-heudea, vada o hapararaia;ba haginia lou, badina be e marere-mareremu.
3 Kara aukadia amo emu bese taudia vada o hahisidia;vine ranuna vada o henimai, vada a inua, vada a kekero.
4 Pepe vada o veria dae, e gari henimumu taudia edia,ienai bae hahegoada hebou, peva bae heautania negana ai; (Selah)
5 unu amo emu lalokau taudia na bae roho mauri.
Imamu idibana amo kwalimu ba henimai,bona ba haere henimai.
6 Dirava na ena gabu helaḡana ai vada e hereva, eto,Mai moalegu ida Sekem baina hapararaia,bona Sukoto kourana baina haria.
7 Gilead na lauegu; Manase na lauegu;Efraim na egu kwara ḡauna;Iuda na egu dagi auna.
8 Moab na imagu ihuridia dihuna;Edom Iatanai egu tamaka na tahoa kaumu;Filistia daenai na heaḡimu, na lolomu.
9 Daika ese hanua mai maḡuna lalonai baine hakaugu vareai?Daika ese Edom baine hakaugu lao?
10 Dirava e, vada o dadaraimai ani?Dirava e, emai tuari oreadia ida so raka lasimu.
11 Ame kahamai, inaimai ituari-henidia ai;badina be taunimanima edia hekaha na asi anina.
12 Dirava ida baita goada balaheni;ia ese ita inaida baine moidia tao.
