Salamo 75:1-10
75 Dirava e, ai oi a hanamomumu, a imodaimumu;oi ladamu a hahaneamu, emu hoa karadia a gwauraidia hedinaraimu.
2 Na gwauraia guna negana baine kau,bena baina hahemaoro ḡoevaḡoeva.
3 Tanobada mai inoho-henina taudia iboudiai ida e raragararagamu negana ai,lau ese na imudadiamu. (Selah)
4 Hekokoroku taudia na hamaorodiamu, na tomu“Basio hekokoroku”.Kara dika taudia na hamaorodiamu, na tomu“Doamui basio abi isi;
5 doamui basio dudui isi atai ai;basio hereva aio haboḡe isi”.
6 Heabi-isi na dia dina-dae gabudia amo eiava dina-diho gabudia amo,bona dia tano ḡaḡaena amo se maimu;
7 a Dirava ese hahemaoro e karaiamu,ta e atoa dihomu, ma ta e abia isimu.
8 Badina be kehere ta na Iehova imana ai,lalonai vine ranuna na kakakaka,e buloa namonamo ḡauna;ia ese baine seia,bena tanobada ena kara dika taudia iboudiai ese bae inua ore.
9 A lau be baina moale hanaihanai,Iakob ena Dirava ihanamolaina anedia baina abi.
10 Kara dika taudia doadia iboudiai ia ese baine utu oho,a kara maoromaoro taudia doadia bae heabi isi.