Salamo 78:1-72
78 Egu orea taumui e, egu hahediba herevadia a kamonai,taiamui a hakala, lau udugu herevadia a kamonai.
2 Sivarai heḡereḡerena ta baina gwauraia,sene herevadia hehunidia;
3 ai a kamonai bona dibamai,tamamai ese vada e hamaoromai ḡaudia,baina gwaurai.
4 Besedia edia amo basia hunidia,a Iehova ena kara herea-daedia bona ena goada,bona hoa karadia ia ese vada e kara,uru gabena taudia baia hamaorolaidia.
5 Ia ese haheḡani e atoa Iakob ena,bona taravatu na Israel e henia.
Bena seneda e haḡanidia,idia ese natudia bae hadibadia eto;
6 uru gabena taudia bae diba totona,do asie vara memerodia danu;bena idia na bae tore isi,natudia ma bae hamaorolaidia.
7 Unu amo Dirava bae laroa,bona Dirava ena ḡaukara basie laloa boio,a ena haheḡani bae badinadia.
8 Unu amo danu tamadia ida basie heḡereḡere:lalo-auka bona gwau-edeede uruna bunai,lalodia asie hadai maoromaoro uruna,laumadia ese Dirava asie badinaia.
9 Efraim taudia mai edia peva natuari dinana ai e lou.
10 Dirava ena gwauhamata asie badinaia,bona ena taravatu irakalaina e dadaraia.
11 E kara ḡaudia e lalodia boio,bona ena hoa karadia e hahedinaraiva ḡaudia danu.
12 Senedia vairadiai ia ese hoa karadia e kara,Aigupto tanona ai bona Soan taorana ai.
13 Davara e hapararaia, bena idia ese e rakaia hanai,ranu na e haginia tao, senu ta na heto.
14 Dina ai ia ese ori dubuna amo e hakaudia,bona hanuaboi idoinai lahi mamana amo.
15 Tano ḡaḡaena ai nadi e hapararadia,inuinu ranuna momo e henidia, ranu dobuna heḡereḡerena.
16 Ranu na nadi amo e ha-arua lasi,ranu na e aru dobi, sinavai na heheto.
17 Ḡau tamona idia ese edia kara havara e habadaia ienai,tano ḡaḡaena ai Herea Mikamika e gwau edeede henia.
18 Lalodia ai Dirava e tohoa,edia ura anianidia e gwaurai;
19 Dirava e ihi-ihiraia, eto“Tano ḡaḡaena ai Dirava ese aniani baine dabaraia a?
20 Ia ese nadi e botaia, bena ranu e aru lasi,koupa-koupa e aru rohoroho;a aniani danu baine heni diba,eiava vamu na ena orea taudia baine henidia diba a?”
21 Taunabunai Iehova e kamonai negana ai na e badu dikadika,Iahi e ara Iakob enai,ena badu e ḡaraḡara Israel enai;
22 badina be Dirava asie abiabiraia,ena hahemauri siahuna asie abidadama henia.
23 Ḡau tamona, ia ese guba atai ai e haḡanidia,bona guba iduaradia e kehodia;
24 mana na latadiai e hadihoa medu na heto, adia,guba anianidia e henidia.
25 Taunimanima ese aneru adia aniani e aniva;ia na aniani momo e siaia, adia.
26 Guba ai lai mairiveina e toa, ena hahedua dainai,ena siahu amo lai diho e hakaua lasi;
27 vamu na latadiai e hadihoa ḡahu na heto,roho manudia e hadihodia kone mirina na heto;
28 ia ese e hamorudia edia taruha bogaraginai,edia noho gabudia heḡeḡemadai.
29 Idia na e aniani, bogadia e kunu;e gadodiava ai e urava ḡaudia na e henidia.
30 A dounu e gadova negana ai,aniani na dounu ududia ai,
31 Dirava ena badu na e vara latadiai;bena goada-herea taudia ia ese e aladia mase,Israel ena abi-hidi taudia ia ese e hamasedia.
32 Ena be unu e kara toma, to idia na dounu e kara havara;ena be ena hoa karadia e ita, to idia na asie abia dae.
33 Taunabunai, ia ese edia dina e ha-oredia, hahodi tamona na heto,edia laḡani danu gari ai e ha-oredia.
34 E aladiava negadia ai, idia ese ia e tahuava,e helalo kerehaiva, bona Dirava e tahua malaka-malakava.
35 E helalo taova, Dirava na edia nadi-gini,Dirava Herea Mikamika na idia ihamauridia.
36 A ududia amo e hanamoa kava,maladia amo e koia;
37 lalodia na asie hatutukadia ienai,ena taravatu asie badinaia.
38 Ḡau tamona, ena hebogahisi dainaiia ese edia dika e gwau tao,bona se habuadia tari;nega momo ena badu e dogoa tao,ena badu siahuna idoinai asine havaraia.
39 E helalo tao, idia na hidio mo,lai nega tamona e toa bena ma se toa lou.
40 Nega momo idia ese tano ḡaḡaena ai e gwau edeede heniava,oibe, tano deḡedeḡe rahu ai lalona e hahisihisiava.
41 E tohoa loulouva,Israel edia Helaḡa Diravana e habaduava.
42 Ena siahu asie laloa taova,inai tauna imana amo e hamauridia dinana na asie laloa taova.
43 Una negana ai, ia ese ena toa e kara Aigupto ai,bona ena hoa karadia Soan taorana ai.
44 Edia sinavai na rara ai e halaodia,taunabunai edia sinavai ranudia asie inu dibava.
45 Lao momo herea e siaidia, idia taudia e ani,bona parapara danu, idia e habuadia.
46 Edia uma anidia na rautunutunu e henidia,bona edia hekwarahi huahuadia na kwadi e henidia.
47 Edia vine na medu hetari amo e habuadia tari,bona edia suke audia danu keru amo.
48 Edia boromakau na medu hetari amo e hadikadia,edia mamoe danu kevaru amo.
49 Ena badu ḡaraḡara na idia latadiai e halasia,badu bona daḡedaḡe bona hahehisi,hahedika anerudia oreana ta na heto.
50 Ena badu dalana e lailaia;mase amo se rauadia,a dai-hanai goreredia amo e hamasedia.
51 Aigupto taudia natudia roboadia iboudiai e aladia mase,edia goada roboadia, Ham ena kalaga lalodiai.
52 Bena ena orea taudia e hakaudia lasiva, mamoe na heheto,tano ḡaḡaena ai e hakaudiava, seri na heto.
53 Dala namona ai e hakaudia, taunabunai asie gari;a inaidia na davara ese e habubunidia.
54 Ena tano helaḡana ai e hakaudia lao,ia imana idibana e kwalimu ororona ai.
55 Bese idau-idau na idia vairadia amo e luludia oho,edia tano e haridia;Israel iduhudia naidia edia kalaga ai e hanohodia.
56 A idia ese Dirava Herea-mikamika e tohoa bona e gwau edeede henia;ena hereva momokanidia asie badinadia.
57 E raka muri, e kara koikoi, tamadia heḡereḡeredia;e kara gageva-gageva, peva dikana, koikoi ḡauna, na heto.
58 Badina be edia atai gabudia helaḡadia amo e habadua,edia kaivakuku e koro ḡaudia amo e havaḡeḡea.
59 Dirava e kamonai negana ai,ia na e badu dikadika,ia ese Israel e dadaraia vaitani.
60 Ena noho kalagana Silo ai e rakatania,taunimanima bogaragidiai e noholaiava ḡauna;
61 ena siahu e negea, heabi-mauri ḡauna ai ela.ia hairaina e negea, inai tauna imana ai.
62 Ena orea taudia na dare matana ai e henidia,ia dihina e badu henidia.
63 Lahi ese edia uhau e haḡoledia oho;edia ulato na asi edia headava anedia.
64 Edia hahelaḡa taudia na dare matana ai e moru,vabudia ese idia taidia asie tai.
65 Bena Ḡaubada na mahuta amo e noga,goada tauna vine ranuna e inua dainai e lolomu na heto;
66 ia inaina e hakarohodia rohoroho,e hahemaraidia ela hanaihanai.
67 Ia ese Iosef ena kalaga e dadaraia,bona Efraim iduhuna se abia hidi;
68 a Iuda iduhuna e abia hidi,Siona ororona, ena lalokau.
69 Ena gabu helaḡana e hadaia, guba doriva-dorivana na heto,eiava tanobada na heto, vada e hadaia mia hanaihanai ḡauna.
70 Ia ese David e abia hidi, ena hesiai tauna,mamoe maḡudia amo e abia;
71 mamoe hahinedia mai natudia ida ireḡudia amo e hakaua mai,ena orea taudia, Iakob besena, ireḡudia,ia dihina Israel ireḡudia totona.
72 Mai lalo-maoromaorona ida e reḡudia,bona mai ima namona ida e hakaudia.
