Salamo 80:1-19
80 Israel Ireḡuna e, a hakala!
Oi ese Iosef o hakauamu, mamoe serina na heto.
Kerubi latadiai o helaimu Diravana, a diari,
2 Efraim bona Beniamina bona Manase vairadiai.
Mai goadamu ida ba tore isi;ihamaurimai totona baoma.
3 Dirava e, ma bavabimai dae lou;oi vairamu baine diari, bena baia roho mauri.
4 Iehova Sabaota e, emu bese taudia edia ḡuriḡuri naba badulai ela bona edena nega ai?
5 Iruru-mata o ha-anilaidia,bona ma o ha-inulaidia davana.
6 Dekemai taudia edia ihi-ihirai ḡauna ai vada o halaomai;ai inaimai ese e kirikirilaimai hehenimu.
7 Iehova Sabaota e, ba hamaurimai;oi vairamu baine diari, bena baia roho mauri.
8 Vine auna ta Aigupto amo o mailaia;bese idau-idau o luludia lasi, bena o hadoa;
9 tano o lailaia, ia ihadona totona,ramuna e hedai, tano e vevea ahu.
10 Ororo na ia ese e hakerukerudia,sida audia badadia na ia rigina ese e lahea ahu;
11 ia rigina e toia roro ela bona davara,ia tuhutuhuna ela bona sinavai badana.
12 Dahaka dainai ia maḡuna vada o hamakohia,bena raka-hanai taudia iboudiai ese ia huahuana e burukimu?
13 Uda boromana ese e raḡaiamu;uda ḡaudia iboudiai ese e heubulaimu.
14 Iehova Sabaota e, a roha kerehai!
Guba amo a roha dobi, a itaia.
Ina vine auna a haḡerea,
15 ia na oi imamu idibana ese e hadoa ḡauna.
16 Idia ese lahi amo e doua, bona e utua oho;oi vairamu baduna ese baine hamasedia be namo.
17 Oi imamu na idibamu kahana tauna latanai baine mia,bona taunimanima natuna, o hagoadaia sibomu emu, latanai.
18 Bena oiemu amo basia raka muri;mauri ba henimai, bena oi ladamu baia hahanea.
19 Iehova Sabaota e, ba hamaurimai;oi vairamu baine diari, bena baia roho mauri.