Salamo 97:1-12
97 Iehova na pavapava, tanobada baine moale,kone tanodia momo bae hisi dae.
2 Ori bona dagadaga ese e ḡeḡea ahumu,kara maoromaorodia bona hahemaoro ḡoevaḡoevadia na ena terono badidia.
3 Lahi na ia vairanai e daemu,inaina e aradia eva-evamu.
4 Ena kevaru ese tanobada idoinai e hadiariamu;tanobada ese e itaiamu, bena e heude-heudemu.
5 Ororo na e vevemu wax na heto, Iehova vairanai,tanobada idoinai Lohiana vairanai.
6 Guba ese ena kara maoromaorodia e gwauraidia hedinaraimu;bese iboudiai na ia hairaina e itaiamu.
7 Ḡau laulaudia e toma henidia dihomu taudia iboudiai na e hahemaraidiamu,kaivakuku asi anidia e heaḡilaidiamu taudia danu;dirava iboudiai na ia vairanai e goru dihomu.
8 Iehova e, Siona e kamonaimu, bena e moalemu,Iuda natuna kekenidia na e hisi daemu,oiemu hahemaoro herevadia daidiai.
9 Badina be, Iehova e, oi na herea dae tanobada idoinai daenai;oi na o heabi isi hereamu dirava iboudiai daediai.
10 Iehova ese kara dika e inai heniamu taudia na e ura henidiamu;ia ese ena helaḡa taudia e hamauridiamu,kara dika taudia imadia amo e harohodia maurimu.
11 Diari na e taramu, kara maoromaoro taudia edia;moale na e varamu, lalo-ḡoevaḡoeva taudia edia.
12 Kara maoromaoro taumui iboumui ai, Iehova ba moalelaia,ia ladana helaḡana ba heatolaia.