Sekaria 5:1-11
5 Bena na gaga isi lou, na roha lao, buka helokuna ta na itaia, e rohova.
2 Ia ese e nanadaigu, eto, Dahaka o itaiamu a?
Lau na haere, nato, Buka helokuna ta rohona ai na itaiamu; ena lata na kiubit ruahui bona ena lababa na kiubit gwauta.
3 Bena ia ese e hamaorogu, eto, Ina na heuduguirai ḡauna, tano idoinai daenai e laomu; badina be ina murinai henao taudia iboudiai na bae henege daure, ia lalonai e hedinaraimu heḡereḡerena bona ia murinai e gwau hamata koikoimu taudia iboudiai na bae henege daure, ia lalonai e hedinaraimu heḡereḡerena.
4 Iehova Sabaota na e tomu: Lau ese baina siaia lao, henao tauna ena ruma lalonai baine vareai bona lau ladagu ai e gwau hamata koikoimu tauna ena ruma lalonai danu; bena ena ruma ai baine mia ela bona baine ha-orea, au bona nadi danu baine ha-oredia.
Peroveta tauna ena mata-hanai ihahituna
5 Bena lau ida a hereva-hereva aneruna e raka kahi mai, e hereva henigu, eto, A gaga isi, e lasimu ḡauna na ba itaia.
6 Bena lau nato, Una na dahaka?
Ia eto, Una na tohe ta e laomu. Ma eto, Ina na edia kara havara, tano idoinai lalonai.
7 Bena na itaia, auri-metauna ikaruhina na e heabi isi, bena tohe lalonai hahine ta e helaiva.
8 Bena ia eto, Ina na Kara Dika. Bena ma e doria dobi tohe lalonai, bona auri-metauna ikaruhina amo e karuhia ahu.
9 Bena na gaga dae, hahine rarua na itadia, e maiva. Lai ese hanidia e ha-evadia; hanidia na boḡe hanidia na heheto. Bena idia ese hari tohe e abia isi, tanobada bona guba padadiai.
10 Bena lau ida a hereva-hereva aneruna na na nanadaia, nato, Hari tohe na ede e laohaiamu?
11 Ia ese e hamaorogu, eto, Sinara tanona; unuseni ai dubuna bae haginia; baine gini vaitani bena tohe na ilahana latanai bae laia kau.
