Solomon Ena Ane 7:1-13
7 Lohia kekenimu e,emu mai tamakadia ida be daka hairai!
Mamumu bauka-baukadia na herahera nadidia na heheto,karakara tauna namona ese e kara.
2 Hudomu na kehere kuboruna na heto,vine ranuna ai e honu hanaihanaimu.
Bogamu na uit isenuna ta,sosana* ese e haheḡeḡea daemu.
3 Ratamu ruaosi na uda nanidia natudia rua na heheto,uda nanina natuna vara-hekapa.
4 Aiomu na kohoro na heto,aivori* amo e hadaia ḡauna.
Matamu na Hesebon gohugohudia,Batarabim ikoukouna badibadinai.
Udu-baubaumu na Lebanon kohorona na heto,Damasko roha-hekeina.
5 Kwaramu na mai hairaina, Karamele ororona na heto;bona huimu heveriveridia na varo kakakakadia na heheto,hanua pavapavana na huimu ai vada e heau kau.
6 Lalokau e, moale ihavarana kekenimu,oi na hane namo, oi na mai hairaimu.
7 Emu lata na buatau auna na heto,bona ratamu na buatau takodia na heheto.
8 Lau na tomu, Buatau auna baina dae,bona takona baina abidia.
Ratamu na vine takodia ida bae heḡereḡere,udumu bonana na apolo bonadia heḡereḡeredia.
9 Emu haherahu na vine ranuna namo-hereana na heto,i’inuna na mai gaihona,bibinagu ai bona isegu ai.
10 Lau na egu lalokau tauna ena;ia ese e ura henigumu.
11 Egu lalokau e, aoma!
aita raka lasi tano paka ai,hanua maraḡidia ai baita noho;
12 daba ai vine imeadia baitala,baita itaia, vine vada e kobo dae eiava,baita diba, buredia vada e papa eiava,baita tahua, rimono* vada e tubu eiava lasi.
Unuseni ai baina ura henimu.
13 Dudai* bonadia na e daemu,emai iduara daediai na huahua namo-hereadia idau-idau,matamatadia bona gunadia,vada na haboudia oiemu,egu lalokau e!
Footnotes
^ “Sosana” na Heberu taudia edia herahera avana ta.
^ “Aivori” na elefant doana.
^ “Rimono” na Heberu taudia edia au huahua ta.
^ “Dudai” na Heberu taudia edia muramura avana ta.
