“Mase taudia do bae tore isi lou.”​​—Kara 24:​15, Buka Helaḡa.

Tauhalo bo davarimu, ena be o lalokau henidiamu taudia na e masemu.​​—2 Korinto 1:​3, 4.

Mase garina basio garimu.​—Heberu 2:15.

E hadibamumu o lalokau henidiamu taudia na mase amo bae toreisi lou.​​—Ioane 5:​28, 29.

Oibe, ini badi toi daidiai:

• Dirava na mauri badina. Baibul na e tomamu, Iehova Dirava ese “mauri bona laḡa bona ḡau idoidiai danu taunimanima iboudiai e henidiamu.” (Kara 17:​24, 25; Salamo 36:9) Mauri ḡaudia iboudiai ikaradia Diravana ena siahu na heḡereḡere vaitani e mase tauna ta baine hamauria lou totona.

• Guna negadiai Dirava ese e mase taudia haida na e hatoredia isi lou. Tanobada ai e tore isi lou taudia eit​—burukadia, tatau, hahine, memero, kekeni​—sivaraidia na Baibul ai bo davarimu. Haida na edia mase na se daudau, a tamona mo dina foa gara ai e noho!​—Ioane 11:​39-44.

• Dirava na e ura dikadikamu mase taudia baine hatoredia isi lou. Iehova ese mase na e inai heniamu. (1 Korinto 15:26) Ia e ‘uralaia lalo-dikamu’ ḡauna na mase baine haorea, bona tore isi lou baine havaraia. Ia na e ura dikadikamu e lalodiataomu taudia na baine hamauridia lou bena tanobada ai bae mauri hanaihanai.​—Iobu 14:​14, 15.